قازاقستاننىڭ 18 جاسقا دەيىنگىلەر اراسىنداعى ءبىرىنشى راكەتكاسى ءامىر ومارحانوۆ جۇپتىق سىندا اقش-تىڭ فلوريدا شتاتىندا وتكەن ITF Juniors J500 Orange Bowl ءتۋرنيرىنىڭ چەمپيونى اتاندى, دەپ حابارلايدى Egemen.kz.
قازاقستان تەننيسشىسى رەسەيلىك تيموفەي دەريپاسكومەن بىرگە 18 جاسقا دەيىنگىلەر اراسىندا ۇزدىك اتاندى.
«وتانداسىمىز بەن رەسەي سپورتشىسى فينالدا شۆەيتساريالىق انري بەرنو – چەحيالىق دەنيس پەتاكپەن باس جۇلدەنى ساراپقا سالدى. ومارحانوۆ – دەريپاسكو كامبەكپەن جەڭىسكە جەتتى. ەسەپ: 3:6, 6:1, 10:1», دەپ حابارلادى قازاقستان تەننيس فەدەراتسياسى.
Orange Bowl جىل سايىن پلانتەيشەندە وتكىزىلەدى. جارىس جاسوسپىرىمدەر اراسىندا رەسمي ەمەس الەم چەمپيوناتى بولىپ ەسەپتەلەدى.