الماتى وبلىسىندا «اۋىلدىق دەنساۋلىق ساقتاۋدى جاڭعىرۋ» ۇلتتىق جوباسى اياسىندا 47 دەنساۋلىق ساقتاۋ نىسانىنىڭ قۇرىلىسى جۇرگىزىلىپ جاتىر, ونىڭ 38-ءى اۋىلدىق ەلدى مەكەندەردىڭ ينفراقۇرىلىمىن جاقسارتۋعا باعىتتالعان. سونداي-اق, ءوڭىردىڭ اعىمداعى جىلعى الەۋمەتتىك-ەكونوميكالىق دامۋ قورىتىندىلارى تۋرالى دا ايتىلدى, دەپ حابارلايدى Egemen.kz.
ايماق باسشىسى مارات سۇلتانعازيەۆتىڭ ايتۋىنشا, نەگىزگى جوبالاردىڭ ءبىرى – ىلە اۋدانى, بايسەركە اۋىلىندا 200 توسەكتىك كوپسالالى اۋرۋحانا قۇرىلىسى. قۇنى 37 ميلليون اقش دوللارىن قۇرايتىن جاڭا مەديتسينالىق مەكەمە كۇردەلى اۋرۋلاردى, سونىڭ ىشىندە كارديولوگيا مەن نەيروحيرۋرگيانى ەمدەۋگە ارنالعان زاماناۋي قۇرال-جابدىقتارمەن جابدىقتالادى. اۋرۋحانا كورەيالىق Hyundai كلينيكاسىمەن سەرىكتەستىكتە سالىنادى, ول ەمدەۋدىڭ وزىق ادىستەرىن ەنگىزىپ, جەرگىلىكتى تۇرعىندار ءۇشىن مەديتسينالىق قىزمەتتەردىڭ قولجەتىمدىلىگىن ارتتىرادى.
«بايسەركە اۋرۋحاناسى جوباسى وڭىردەگى دەنساۋلىق ساقتاۋ سالاسىن جاقسارتۋعا باعىتتالعان ماڭىزدى قادام بولىپ تابىلادى. بۇل, اسىرەسە, بۇرىن اۋىر سىرقاتتاردى ەمدەۋگە مۇمكىندىك بولماعان ايماقتارداعى مەديتسينالىق كومەكتىڭ ساپاسىن ايتارلىقتاي جاقسارتاتىنىنا سەنىمدىمىز», دەدى م.سۇلتانعازيەۆ.
سونىمەن قاتار, سوڭعى ءۇش جىلدا وبلىستىڭ مەديتسينالىق مەكەمەلەرىنىڭ جابدىقتالۋى 90 پايىزعا دەيىن وسكەن. سونداي-اق وبلىس اكىمىنىڭ گرانتىنىڭ ارقاسىندا مەديتسينالىق جوو-نىڭ 53 تۇلەگى وڭىرلەرگە جۇمىسقا جىبەرىلىپ, دارىگەرلەر تاپشىلىعى ايتارلىقتاي تومەندەگەن. قازىرگى تاڭدا وبلىستا نەبارى 61 مەديتسينا مامانى جەتىسپەيدى.
«كادرلاردىڭ جاعدايى جاقساردى, بۇل رەتتە اۋىلعا جۇمىسقا كەلگەن جاس مامانداردىڭ قوسقان ۇلەسى زور», دەدى ايماق باسشىسى.
بۇل شارالار الماتى وبلىسىنىڭ اۋىلدىق جەرلەرىندە مەديتسينالىق كومەكتىڭ قولجەتىمدىلىگىن ارتتىرۋعا جانە ءومىر ءسۇرۋ ساپاسىن جاقسارتۋعا باعىتتالعان, بۇل ءوز كەزەگىندە جالپى ءوڭىردىڭ دامۋىنا ىقپال ەتەدى.
ايتا كەتەيىك, الماتى وبلىسىندا مادەنيەت پەن سپورت بەلسەندى تۇردە دامىپ كەلەدى, بۇل جەرگىلىكتى حالىقتىڭ ءومىر ءسۇرۋ ساپاسىن جاقسارتۋعا تىكەلەي ىقپال ەتىپ جاتىر. وبلىس اكىمى مارات سۇلتانعازيەۆ ءمالىم ەتكەندەي, سوڭعى جىلدارى وبلىستا ينفراقۇرىلىمدى دامىتۋ مەن جاڭعىرتۋدىڭ جالپى باعىتىن كورسەتەتىن بىرنەشە ءىرى مادەني جانە سپورتتىق جوبالار جۇزەگە اسىرىلدى.