ورتالىق كوممۋنيكاتسيالار قىزمەتىنىڭ الاڭىندا الماتى وبلىسىنىڭ اكىمى مارات سۇلتانعازيەۆ ءوڭىردىڭ وتكەن جىلداعى ەلەۋلى ەكونوميكالىق تابىستارى تۋرالى ايتىپ, الداعى جوسپارلارىمەن ءبولىستى, دەپ حابارلايدى Egemen.kz.
وبلىس اكىمىنىڭ ايتۋىنشا, قازاقستان پرەزيدەنتى قاسىم-جومارت توقاەۆتىڭ ەكونوميكانىڭ التى پايىزدىق ءوسىمىن قامتاماسىز ەتۋگە باعىتتالعان تاپسىرماسىن ورىنداۋ باستى مىندەت. بيىلعى جىلدىڭ 11 ايىندا وبلىس قىسقا مەرزىمدى ەكونوميكالىق كورسەتكىشكە 109,1% قول جەتكىزدى, بۇل نەگىزگى سالالاردى دامىتۋدىڭ تۇراقتى سەرپىنىن كورسەتەدى.
مارات سۇلتانعازيەۆ وڭىردە ونەركاسىپ ءوندىرىسى 6,9 پايىزعا ارتقانىن, بۇل ورتاشا رەسپۋبليكالىق كورسەتكىشتەن 2,7 پايىزعا اسىپ تۇسەتىنىن اتاپ ءوتتى. بۇل وبلىستىڭ رەسپۋبليكا بويىنشا بەسىنشى ورىن الۋىنا مۇمكىندىك بەردى. باسقا سالالاردا دا ايتارلىقتاي ءوسىم بايقالادى: ساۋدا – 13,2%-عا, قۇرىلىس – 20,6%-عا, كولىك قىزمەتى – 21%-عا ءوستى.
سونىمەن قاتار اكىم ەكسپورتتىق الەۋەتكە باسا نازار اۋداردى. بۇگىندە الماتى وبلىسى الەمنىڭ 63 ەلىنە ءونىم ەكسپورتتايدى, ەكسپورتتىڭ 90 پايىزىن وڭدەلگەن تاۋارلار قۇرايدى. ەكسپورت كولەمى ءبىر جىلدا 565-تەن 581 ميلليون دوللارعا دەيىن ءوستى.
«بۇل ءبىزدىڭ كاسىپورىنداردىڭ حالىقارالىق نارىقتاعى جوعارى باسەكەگە قابىلەتتىلىگىن دالەلدەيدى», دەدى م.سۇلتانعازيەۆ.
جالپى, الماتى وبلىسى جاڭا ەكونوميكالىق بيىكتەرگە سەنىمدى تۇردە قادام باسىپ كەلەدى, بۇل ءوڭىردىڭ بۇكىل ەلدەگى پوزيتسياسىن نىعايتۋعا ىقپال ەتەدى.
الماتى وبلىسى قوماقتى ينۆەستيتسيالار مەن ءىرى حالىقارالىق جوبالاردى جۇزەگە اسىرۋدىڭ ارقاسىندا ەكونوميكالىق ءوسۋدىڭ جوعارى قارقىنىن كورسەتىپ وتىر. وبلىس اكىمى مارات سۇلتانعازيەۆ ءبىر جىل ىشىندە وبلىس ەكونوميكاسىنا 780 ميلليارد تەڭگەدەن استام ينۆەستيتسيا تارتىلعانىن, بۇل وتكەن جىلمەن سالىستىرعاندا 22,5 پايىزعا ارتىق ەكەنىن ايتتى. بۇل كورسەتكىش رەسپۋبليكالىق ورتاشا ينۆەستيتسيا ءوسىمى 3,1%-دان ايتارلىقتاي اسىپ تۇسەدى.