مارقاكول مەن كاتونقاراعاي اراسىنداعى تاۋ بيىگىندەگى كەڭ جازىقتا ارحەولوگيالىق قازبا جۇمىستارى جۇرگىزىلىپ, VII-IX عاسىرلارعا جاتاتىن جاۋىنگەرلەر مەن جىلقىلاردىڭ جەرلەۋ ورىندارى تابىلعان. كەيىننەن سول ورىننان تابىلعان قيماق جاۋىنگەرىنىڭ جاڭعىرتپاسى جاسالىپ, وبلىستىق تاريحي-ولكەتانۋ مۋزەيىنە ۇسىنىلدى.
مۋزىكالىق اسپاپ اسىنعان قيماق جاۋىنگەرى كيىمىنىڭ جاڭعىرتپاسى 2012–2014 جىلدارى قالپىنا كەلتىرىلگەن. ەسكەرتكىشتەردىڭ بىرەگەيلىگى سول, جەرلەنگەن جاۋىنگەرلەرمەن بىرگە جىبەك ماتادان تىگىلگەن كيىمدەردىڭ قالدىقتارى, قارۋ-جاراق, ات ابزەلدەرى جانە ءۇش بىردەي مۋزىكالىق اسپاپ تابىلعان.
VIII عاسىردىڭ جاۋىنگەر-مۋزىكانتىنىڭ كيىمىن, ساۋىت-سايماندارىن جانە قارۋ-جاراعىن عىلىمي تۇرعىدا ارحەولوگ زەينوللا ساماشەۆ پەن سۋرەتشى, ەتنوگراف-قارۋتانۋشى قاليوللا احمەتجان قالپىنا كەلتىردى. كوستيۋم جيىنتىعىن دايىنداۋ كەزىندە ورتاعاسىرلىق كوشپەلىلەردىڭ كيىمىن تىگۋ جانە ءپىشۋ ادىستەرىنە بارىنشا جاقىن تەحنولوگيا قولدانىلىپ, قيماقتاردىڭ كيىمىنە ءتان ەرەكشەلىكتەر كورسەتىلدى.
جاۋىنگەردىڭ ۇستىندەگى كيىمى سارى, جەڭى قىزعىلت ءتۇستى جىبەك ماتادان تىگىلىپ, تولىقتاي ويۋ-ورنەكپەن كومكەرىلگەن. بەلدىكتىڭ التىن جاپسىرمالارى تۇگەلدەي قاراقابا وباسىنان تابىلعان ارتەفاكتىلەر نەگىزىندە جاسالىپتى. جاۋىنگەردىڭ باسىنا تەمىردەن توقىلعان, شىنجىر تورلى مويىن ساۋىتپەن بىرىكتىرىلگەن دۋلىعا كيىلگەن. دۋلىعانىڭ جوعارعى جاعىندا كىشكەنتاي قىزىل ءتۇستى جالاۋشا ورناتىلعان. بۇل جاۋىنگەردىڭ الەۋمەتتىك مارتەبەسى مەن اسكەري لاۋازىمىن كورسەتۋى مۇمكىن. سونداي-اق شايقاس كەزىندە ايرىقشا بەلگى رەتىندە قولدانىلعان. مۇنداي ەلەمەنتتەر كوشپەلىلەردىڭ اسكەري مادەنيەتىندە ءجيى كەزدەسكەن. جاۋىنگەردىڭ قولىندا ەكى ىشەكتى دومبىراعا ۇقسايتىن مۋزىكالىق اسپاپ بار. بۇل ونىڭ جاۋىنگەر عانا ەمەس, مۋزىكانت بولعانىن دا كورسەتەدى. بەلىندە بەلدىككە بايلانعان قىسقا قىلىش جانە قوسىمشا جابدىقتارى بار. بەينەنىڭ ەرەكشەلىگى – كوشپەلى مادەنيەتتىڭ, تۇرمىس پەن ونەردىڭ ۇيلەسىمىن بەينەلەپ, سول ءداۋىردىڭ تاريحي بولمىسىن ناقتى كورسەتەدى.
شىعىس قازاقستان وبلىسى