اقتوبەدەگى سپورت مەكتەبى وقۋشىسىنىڭ ولىمىنە قاتىستى سوت شەشىمى شىقتى

سوت مالىمەتىنشە, بيىل 11 ساۋىردە ق.ەسەت باتىر اتىنداعى وليمپيادا رەزەرۆىنىڭ وبلىستىق مامانداندىرىلعان مەكتەپ-ينتەرنات-كوللەدجىنىڭ 2-كۋرس ستۋدەنتى وسى وقۋ ورنىنىڭ ەركىن كۇرەسپەن اينالىساتىن 8-سىنىپ وقۋشىلارىنىڭ تارتىپتەرى مەن سپورتتاعى ناتيجەلەرىنىڭ ناشارلاۋىنا بايلانىستى جينالىس ۇيىمداستىرۋ قاجەت دەپ شەشكەن. سول كۇنى كەشكى جاتتىعۋدان كەيىن 8-سىنىپتاردىڭ وقۋشىلارىنا مامانداندىرىلعان مەكتەپ-ينتەرنات-كوللەدجىنىڭ بولمەسىنە جينالۋ قاجەت ەكەنىن ايتقان. ال ولاردى جيناۋدى ج.-عا جانە باسقا دا 9-10-سىنىپتىڭ وقۋشىلارىنا تاپسىرعان.

ج. سوتتالۋشى ق.-پەن ويى ءبىر ەكەنىن ءبىلدىرىپ, سول كۇنى ساعات 21:00 شاماسىندا 8-سىنىپ وقۋشىلارىن بولمەگە جيناۋعا قاتىسقان. كەيىن بولمەگە ق. كەلىپ, 8-سىنىپ وقۋشىلارىن ءبىر ساپقا تۇرعىزىپ, ولارعا مورالدىق جانە فيزيكالىق قىسىم كورسەتىپ, جينالىس جاساۋعا ەشقانداي وكىلەتتىگى بولماسا دا, ولاردىڭ ءتارتىبى مەن سپورتتاعى ناتيجەلەرىنىڭ تومەندەپ كەتكەنىن ايتىپ, ج.-عا جانە باسقا دا 9 جانە 10-سىنىپتىڭ وقۋشىلارىنا 8-سىنىپ وقۋشىلارىن ۇرىپ وتۋگە نۇسقاۋ بەرگەن.

ق. 9-سىنىپ وقۋشىلارى ح. مەن ۇ.-عا 8-سىنىپ وقۋشىلارىن جاي ۇرعاندارىن ايتىپ, قايتا قاتتىراق ۇرۋدى تالاپ ەتكەن. ولار قايتا 8-سىنىپ وقۋشىلارىن ۇرىپ شىققان.

- كەيىن ج. 8-سىنىپ وقۋشىسى ءا.-گە كەلىپ, ونىڭ ەكى بەتىنەن الاقانمەن ۇرىپ, ونىمەن توقتاماي, ەكى يىعىنان ەكى قولىمەن ۇستاپ, وڭ تىزەسىمەن ءا.-ءنىڭ ءتوس بولىگىنە سوققى جاساپ, ونىڭ دەنساۋلىعىنا قاساقانا اۋىر زيان كەلتىرگەن. سونىڭ سالدارىنان ءا. ەسىن جوعالتىپ, ارقاسىمەن قۇلاپ, كەيىن قايتىس بولعان, - دەپ جازىلعان حابارلامادا.

سوت وتىرىسىندا پروكۋرور سوتتالۋشى ج.-عا 6 جىل 8 ايعا, ق.-عا 9 جىلعا باس بوستاندىعىنان ايىرۋ جازاسىن تاعايىنداۋدى سۇرادى. جابىرلەنۋشىلەر جانە ونىڭ وكىلى سوتتالۋشىلارعا قاتاڭ جازا تاعايىنداۋدى سۇرادى. سوتتالۋشىلار ءوز كىنالارىن مويىندامادى, ال ولاردىڭ قورعاۋشىلارى ق.-نى اقتاۋدى, ال ج.-نىڭ قىلمىستىق ارەكەتتەرىن قك-ءنىڭ 104-بابىنىڭ 1-بولىگىنە قايتا سارالاۋدى سۇرادى.

سوت قىلمىستىق جازا تاعايىنداۋ كەزىندە سوتتالۋشىلاردىڭ بۇرىن سوتتالماعانىن, سوتتالۋشى ج.-نىڭ كامەلەت جاسقا تولماعانىن قىلمىستىق جاۋاپتىلىق پەن جازاسىن جەڭىلدەتەتىن ءمان-جاي دەپ تانىدى. اۋىرلاتاتىن ءمان-جايلار انىقتالمادى.

سوت ۇكىمىمەن سوتتالۋشى ق. كىنالى دەپ تانىلىپ, وعان 9 جىل مەرزىمگە باس بوستاندىعىنان ايىرۋ جازاسى, ال سوتتالۋشى ج. كىنالى دەپ تانىلىپ, وعان 6 جىل 8 اي مەرزىمگە باس بوستاندىعىنان ايىرۋ جازاسى تاعايىندالدى.