بيىل قىستا پاۆلودارلىق كوممۋنالشىلار كوكتايعاققا قارسى ەكولوگيالىق تۇرعىدان قاۋىپسىز رەاگەنت قولدانا باستادى. ول تۇرعىندار ءۇشىن ەرەكشە قاۋىپتى اۋماقتاردا قۇممەن بىرگە سەبىلەدى.
پاۆلودار قالاسىنداعى بارلىق كوشەنىڭ جالپى ۇزىندىعى 447 شاقىرىمداي. قىس مەزگىلىندە كوشە تازالىعىنا 250 بىرلىك تەحنيكا مەن 300 ادام جۇمىلدىرىلادى. كوشەلەردى كۇتىپ ۇستاۋعا «گوركومحوز-پاۆلودار» جشس مەن «حولدينگ-ترانسس-پاۆلودار» جشس جاۋاپتى. كاسىپورىنداردىڭ مالىمەتىنشە, قىس مەزگىلىندە كۇن سايىن 250 بىرلىك تەحنيكانى تارتا وتىرىپ 300-گە جۋىق جۇمىسشى پاۆلودار قالاسىنىڭ كوشەلەرىنەن قار جيناۋعا شىعادى.
– قاردى شىعارۋ ەكىنشى دارەجەلى كوشەلەرگە, جەكە سەكتورعا ءوتۋ ارقىلى قالانىڭ بارلىق ورتالىق ماگيسترالدارىندا, سونداي-اق اينالما جولداردا, جول وتكەلدەرىندە, ايرىقتاردا, قوعامدىق اۆتوكولىكتەردىڭ قوزعالىسىن قيىنداتاتىن جەرلەردە ۇنەمى جۇرگىزىلەدى. قالا كوشەلەرىنە كوكتايعاققا قارسى ماتەريال (قۇم) سەبۋ جۇمىستارى تۇراقتى تۇردە جۇرگىزىلەدى. قىس ماۋسىمىنا بارلىعى 28 مىڭ توننا قۇم دايىندالدى, – دەپ حابارلادى قالا اكىمدىگىنىڭ ءباسپاسوز قىزمەتىنەن.
شاھاردان شىعارىلاتىن قار ۋسپەن اۆتوجولىنا جاقىن ورنالاسقان تۇرمىستىق قالدىقتار پوليگونىنىڭ اۋماعىنداعى ارنايى بولىنگەن الاڭدارعا توگىلەدى. ونى ەسەپكە الۋ تۇرمىستىق قالدىقتار پوليگونىنىڭ تاۋلىك بويى جۇمىس ىستەيتىن ديسپەتچەرلىك قىزمەتى ارقىلى جۇزەگە اسىرىلىپ وتىر.
ال پاۆلودار قالاسىنىڭ اكىمى حاسار حابىلبەكوۆ بيىل قىستا ەرەكشە قاۋىپتى اۋماقتاردا قۇممەن قاتار, ەكولوگيالىق تۇرعىدان قاۋىپسىز, ءوزىن جاقسى كورسەتكەن جاڭا رەاگەنت قولدانىلاتىنىنىن جەتكىزدى.
– تۇرعىن ءۇي-كوممۋنالدىق شارۋاشىلىق ءبولىمى قىس مەزگىلىندە قالانى تازارتۋ جۇمىستارىن ۇيىمداستىرۋ ۇدەرىسىن قايتا قارادى. بۇعان دەيىنگى جىلدارى الدىمەن ماگيسترالدى كوشەلەر تازارتىلىپ, سودان كەيىن جاياۋ جۇرگىنشىلەر جولاعى مەن اۋلالارعا اپاراتىن جولدار تازالاناتىن ەدى. ەندىگى ماقسات – قالانىڭ بارلىق اۋماعىندا جولداردى, جاياۋ جۇرگىنشىلەر جولاقتارىن, اۋلالاردى تازارتۋ جۇمىستارىن ءبىر ۋاقىتتا جۇرگىزۋ. ول ءۇشىن بارلىق تەحنيكا مەن ادام رەسۋرستارىن بىركەلكى ۇيلەستىرۋ قاجەت. ءاربىر ۋچاسكە ءۇشىن قاراماعىمداعى جاۋاپتى قىزمەتكەرلەر بەكىتىلدى. ولار قار تازالاۋ ساپاسىنا جەكە جاۋاپ بەرەدى. قىسقى ۋاقىتتا پاۆلودارلىقتاردىڭ قاۋىپسىز قوزعالىسىن قامتاماسىز ەتۋ ءۇشىن مەردىگەرلەردىڭ جۇمىسىن تۇراقتى تۇردە تەكسەرىپ وتىرامىن, – دەيدى ول.
بۇعان دەيىن جەرگىلىكتى تۇرعىندار جاياۋ جۇرگىنشىلەر جولىنا سەبىلەتىن قۇم اياققا جابىسىپ, ءتىپتى جىلىمىق كۇندەرى باتپاققا اينالىپ كەتەتىنىنە نارازىلىق تانىتقان. قالا اكىمدىگىندەگىلەر قازىرگى ۋاقىتتا باعاسى مەن ساپاسى جاعىنان قۇمعا لايىقتى بالاما جوق دەپ وتىر.
«كوپشىلىك «نەلىكتەن قۇمنىڭ ورنىنا تۇز سەبىلمەيدى؟» دەپ جازىپ جاتادى. سەبەبى تۇزدى قولدانۋعا بولمايدى. جولعا شاشىلعان تۇزدىڭ كوپ بولىگى توپىراققا تۇسەدى. ال ول جاسىل جەلەكتەرگە كەرى اسەرىن تيگىزەدى. قۇم مينۋس 10 گرادۋسقا دەيىنگى تەمپەراتۋرادا قاردىڭ «قاتىپ قالۋىنا» جول بەرمەيدى. بۇل اسفالتتى ارنايى تەحنيكامەن تازالاۋدى جەڭىلدەتەدى. ايازدى كۇندەر كەلىپ, قار قۇرعاق بولا باستاعاندا, اق ۇلپانى قوسىمشا ماتەريالداردى قولدانباي-اق تازالاۋعا بولادى. سول كەزدە جولدارعا قۇم سەبۋدى توقتاتامىز», دەيدى ح.حابىلبەكوۆ.
پاۆلودار