تۇركىستان وبلىسىندا ايەل مەن ونىڭ قىزىن ولتىرگەن كۇدىكتىنىڭ سوتى اشىق وتەدى

Otyrar.kz سايتىنىڭ مالىمەتىنشە, قىلمىستىق ءىس القابيلەردىڭ قاتىسۋىمەن قارالادى. بۇگىندە القابيلەر تاڭدالىپ تا قويىلعان. ايىپتالۋشىعا 3 بىردەي قىلمىستىق باپ بويىنشا كىنا تاعىلىپ وتىر.

تۇركىستان وبلىستىق سوتىنىڭ ءباسپاسوز قىزمەتى ءىس ماتەريالدارىنا سايكەس, سوتقا دەيىنگى تەرگەپ-تەكسەرۋ ورگاندارى سوتتالۋشىعا قىلمىسقا دايىندالۋ جانە قىلمىسقا وقتالۋ (قك 24-بابى 3-بولىگى), كامەلەتكە تولماعان ادامدى زورلاۋ (قك 120-بابى 3-1-بولىگى 1-تارماعى), ەكi نەمەسە ودان كوپ ادامدى ءولتىرۋ (قك 99-بابى 2-بولىگى 1, 3, 10, 14-تارماقتارى) قىلمىستىق ارەكەتتەرى بويىنشا ايىپ تاعىپ, سوتقا جولداعانىن, سوتتالۋشىنىڭ ءوتىنىش حاتى بويىنشا ءىس القابيلەردىڭ قاتىسۋىمەن اشىق سوت وتىرىسىندا قارالاتىنىن حابارلادى.

ەسكە سالساق, 12 قىركۇيەك كۇنى كەلەس اۋدانىندا جانتۇرشىگەرلىك قاندى قىلمىس بولعان ەدى. ماڭايدا تۇراتىن اۋىل تۇرعىنى شىرت ۇيقىدا جاتقان 46 جاستاعى ايەل مەن ونىڭ 15 جاسار قىزىن ءولتىرىپ كەتكەن. الەۋمەتتىك جەلىدە تاراعان اقپاراتقا سايكەس, كۇدىكتى مۇعالىم بولىپ قىزمەت اتقارىپ ءجۇرىپ, وقۋشى قىزعا قىرىنداعان. مۇنى بىلگەن اناسى پەداگوگتىڭ ۇستىنەن ارىز تۇسىرگەن. جۇمىستان قۋىلعان ەر ادام ەكى بىردەي ادامنان كەك العان كورىنەدى. ءىستىڭ انىق-قانىعى ەندى سوت پروتسەسىندە بەلگىلى بولادى.