بۇۇ دامۋ باعدارلاماسى (بۇۇدب) مەن ءال-فارابي اتىنداعى قازاق ۇلتتىق ۋنيۆەرسيتەتى (قازۇۋ) ەكوتۋريزمدى دامىتۋ سالاسىنداعى ىنتىماقتاستىق تۋرالى مەموراندۋمعا قول قويدى.
ەكىجاقتى ىنتىماقتاستىقتىڭ ماقساتى – تۇراقتى دامۋ سالاسىنداعى ءوزارا ءىس-قيمىلدى كۇشەيتۋ, ەلىمىز ۋنيۆەرسيتەتتەرىنىڭ وقۋ ۇدەرىسىنە ءتۋريزمدى ىلگەرىلەتۋ, قورشاعان ورتانى قورعاۋ سەكتورىنا قاتىستى زاماناۋي تاجىريبەلەردى ەنگىزۋ. كەلىسىمگە ەلىمىزدە التى قارجىلىق شەشىمدى ىسكە اسىراتىن بيوارتۇرلىلىكتى قارجىلاندىرۋ باستاماسى – بيوفين شەڭبەرىندە قول قويىلدى, ونىڭ ءبىرى – ەكوتۋريزم سالاسىندا سەرتيفيكاتتاۋعا نەگىز قۇرۋ.
بيوفين جوباسى اياسىندا بيوارتۇرلىلىكتى ساقتاۋ, ينۆازيالىق تۇرلەردى باقىلاۋ, ەكو-اعارتۋ, قاتتى تۇرمىستىق قالدىقتاردى قايتا وڭدەۋ, ەنەرگيا ۇنەمدەۋ تەحنولوگيالارىن پايدالانۋ ماسەلەلەرىن قوسا العاندا, ەكوتۋريزمگە قويىلاتىن جالپى, قوسىمشا تالاپتاردى بەلگىلەيتىن قر ست 2993 «تۋريستىك قىزمەتتەر. ەكولوگيالىق تۋريزم. جالپى تالاپتار» ۇلتتىق ستاندارتىن قايتا قاراۋعا باستاما جاسالدى. ستاندارت ۇلتتىق كونتەكسكە بەيىمدەلگەن, ەكوتۋريزمدە قولدانىلاتىن حالىقارالىق تاجىريبەگە سايكەس كەلەدى.
ەكولوگيالىق تۋريزم – تۋريستىك يندۋستريانىڭ ەڭ جىلدام دامىپ كەلە جاتقان سەكتورى, ونىڭ ۇلەسىنە الەمدىك ءتۋريزمنىڭ 25%-ى تيەسىلى. ناقتىلى دەرەكتەرگە سۇيەنسەك, ەكوتۋريستەر سانى جىل سايىن 20%-عا ارتىپ كەلەدى. تازا, تامىلجىعان تابيعي نىساندارى كوپ ەلىمىزدىڭ ەكوتۋريزمدى دامىتۋدا زور الەۋەتكە يە. ەتنومادەني تۋريزممەن ۇيلەسكەن قىزىقتى تابيعي لاندشافتار, بىرەگەي ەكولوگيالىق باعىتتار ءتىپتى تالعامپاز تۋريستەردى دە ەرىكسىز تاڭداي قاقتىرادى.
ەكوتۋريزمنىڭ باستى ەرەكشەلىگى – تابيعي اۋماقتارعا بارعان كەزدە بيوالۋانتۇرلىلىك پەن ەكوجۇيەلەردى ساقتاۋ. سول تۇرعىدا ەكوتۋريزم قورشاعان تابيعي ورتانى قورعاۋ, قالپىنا كەلتىرۋ قوعام دامۋىنىڭ بارعان سايىن ەلەۋلى ولشەمدەرى بولىپ تابىلاتىن كەز كەلگەن ەلدىڭ ەكونوميكاسىن دامىتۋعا ۇلەس قوسا الاتىنىن ءاردايىم ەستە ۇستاعان ءجون.
ەكولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتىنىڭ دەرەكتەرىنە سايكەس, ەلدىڭ ەرەكشە قورعالاتىن تابيعي اۋماقتارىنىڭ جالپى اۋدانى 26 ملن گەكتاردى قۇرايدى, ياعني شامامەن 0,26 ملن شارشى كم, ەكوتۋريزمى جاقسى دامىعان بىرقاتار ەلگە قاراعاندا الدەقايدا كەڭ. ەكوتۋريستەر سانى جىلىنا 2 ملن ادامنان اسادى. مۇنداي ناتيجەگە ەلىمىز زاڭنامالىق دەڭگەيدە رەتتەلەتىن ۇلتتىق تابيعي پاركتەردەگى ءتۋريزمدى باسقارۋدىڭ جولعا قويىلعان جۇيەسىنىڭ ارقاسىندا قول جەتكىزدى.
بۇۇ دب-نىڭ قازاقستانداعى تۇراقتى وكىلىنىڭ ورىنباسارى سۋحروب حودجيماتوۆتىڭ ايتۋىنشا, ەكولوگيالىق تۋريزم قورشاعان ورتاعا, بيوارتۇرلىلىككە انتروپوگەندىك اسەردى جۇمسارتۋعا مۇمكىندىك بەرەتىن, ادام مەن تابيعات اراسىنداعى تەپە-تەڭدىككە قول جەتكىزۋگە باعىتتالعان ءتيىمدى ادىستەردىڭ ءبىرى.
«بۇگىنگى تاڭدا الەمدە ەكولوگيالىق تۋريزمگە كوبىرەك كوڭىل بولىنەدى. تۇراقتى تۋريزم جەرگىلىكتى تۇرعىنداردىڭ قالادان تىس جۇمىسپەن قامتىلۋى مەن تابىسىنىڭ وسۋىنە اسەر ەتە وتىرىپ, جاڭا ەكونوميكالىق مۇمكىندىك تۋعىزادى. قازاقستان ورتالىق ازيادا ۇلتتىق پاركتەر مەن قورىقتاردىڭ كەڭ تابيعي اۋماقتارىنا يە. ەكوتۋريزم وسى ەرەكشە قورعالاتىن تابيعي اۋماقتاردى تۇراقتى دامىتۋ, باسقارۋ الەۋمەتتىك, ەكونوميكالىق, گۋمانيتارلىق اسپەكتىلەردى قامتۋعا كوپ اسەر ەتەدى», دەدى س.حودجيماتوۆ.
ايتا كەتۋ كەرەك, ءال-فارابي اتىنداعى قازۇۋ-مەن بىرلەسىپ بيوفين شەڭبەرىندە قازاق, ورىس تىلدەرىندە تۋريزم سالاسىنداعى ۇلتتىق ستاندارت بويىنشا ترەنينگ مودۋلدەرىنىڭ قۇرىلىمى مەن فورماتىن جاڭارتۋ, سونداي-اق ولاردى ەلىمىزدىڭ جوعارى وقۋ ورىندارىنىڭ ءبىلىم بەرۋ باعدارلاماسىنا دايەكتى ينتەگراتسيالاۋ جونىندە باستامالار جۇرگىزىلىپ جاتىر.
«جوعارى ءبىلىم سالاسىنداعى كوشباسشىلاردىڭ ءبىرى رەتىندە ءال-فارابي اتىنداعى قازۇۋ قازىرگى زاماناۋي حالىقارالىق تاجىريبەلەردى ەنگىزۋ جونىندەگى باستامالاردى بەلسەندى قولدايدى. بۇۇ دب-مەن ەكوتۋريزمدى دامىتۋ سالاسىنداعى مەموراندۋم بىزگە بىلىكتى كادرلاردى دايارلاۋعا مۇمكىندىك بەرەدى», دەپ اتاپ ءوتتى ۋنيۆەرسيتەت باسقارما توراعاسىنىڭ ورىنباسارى – ءبىرىنشى پرورەكتور ەركىن دۇيسەنوۆ.