مەملەكەت باسشىسى قاسىم-جومارت توقاەۆتىڭ بەلگرادقا رەسمي ساپارى اياسىندا سەربيا ازاماتتارى لازار كويچ پەن دراگومير كاريچتى ماراپاتتاۋ ءراسىمى ءوتتى. ولار قازاقستان رەسپۋبليكاسىنا سىڭىرگەن ەرەكشە ەڭبەگى ءۇشىن II دارەجەلى «دوستىق» وردەنىمەن ماراپاتتالدى. بۇل جوعارى ماراپاتتاردى پرەمەر-ءمينيستردىڭ ورىنباسارى سەرىك جۇمانعارين تاپسىردى. بۇل تۋرالى اقوردا ءباسپاسوز قىزمەتى حابارلادى, دەپ جازادى Egemen.kz.
لازار كويچ – قازاقستاندا جۇگەرىنىڭ جاڭا سورتتارىن ءوسىرۋ جونىندەگى عىلىمي جوبانىڭ جەتەكشىسى. ول – ەلىمىزدەگى جۇگەرى سەلەكتسياسى جانە تۇقىم شارۋاشىلىعى باعدارلاماسىنىڭ تۇراقتى باسشىسى جانە باس سەلەكتسيونەر. ونىڭ جۇمىسى ارقىلى قازاقستاندا جۇگەرىنىڭ 18 بىرلەسكەن قازاق-سەرب گيبريدتەرى ءتۇزىلدى. ناتيجەسىندە قازاقستان وسى داقىلدىڭ تۇقىمىن يمپورتتىق الماستىرۋدى جۇزەگە اسىردى, ەلىمىز تۇقىم ماتەريالى يمپورتىنان تاۋەلسىز بولدى. جىل سايىن ل.كويچ ەڭبەك ەتەتىن «بۋدان» جشس ءبىرىنشى بۋىننىڭ جۇگەرى تۇقىمىن وندىرەدى جانە ەل نارىعىنىڭ 85%-ىن قامتاماسىز ەتەدى.
ال دراگومير كاريچ – «براتيا كاريچ» كوپسالالى حولدينگىنىڭ تەڭ قۇرىلتايشىسى ءارى تەڭ يەسى. د.كاريچ قازاقستان-سەربيا قارىم-قاتىناسىن نىعايتۋعا, ەكىجاقتى ساياسي ديالوگ پەن ساۋدا-ەكونوميكالىق ءارى ينۆەستيتسيالىق ءوزارا ءىس-قيمىلدى دامىتۋعا ەلەۋلى ۇلەس قوستى. سونداي-اق ول ەكى ەل اراسىنداعى پارلامەنتتىك بايلانىستاردىڭ دامۋىنا سەرپىن بەرىپ, قازاقستاننىڭ وڭ ءيميدجىنىڭ قالىپتاسۋىنا ىقپال ەتتى. 2019 جىلدىڭ قاراشا ايىندا «پرەزيدەنتتىك ينستيتۋت: قازاقستاندىق مودەل» حالىقارالىق پارلامەنتتىك كونفەرەنتسياسىنا قاتىسۋ ءۇشىن سەربيا پارلامەنتى دەپۋتاتتارىنىڭ دەلەگاتسياسىن باستاپ كەلدى. ول ۇزاق جىلدار بويى سەربيا اۋماعىندا ءتۇرلى مادەني ءىس-شارالاردى وتكىزۋگە, سونىڭ ىشىندە قازاقستاندىق ارتىستەر مەن شىعارماشىلىق ۇجىمداردىڭ كونتسەرتتىك باعدارلامالارىن ۇيىمداستىرۋعا قولداۋ كورسەتتى.