«AMANAT» پارتياسى فراكتسياسىنىڭ مۇشەسى, پارلامەنت ءماجىلىسىنىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ ءتورايىمى ايگۇل قۇسپان تومەنگى پالاتانىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اسكەري-پاتريوتتىق تاربيە ماسەلەلەرى بويىنشا تولىقتىرۋلار ەنگىزۋ تۋرالى» قازاقستان رەسپۋبليكاسى زاڭىنىڭ جوباسى جونىندە بايانداما جاسادى, دەپ حابارلايدى Egemen.kz.
«وزدەرىڭىزگە بەلگىلى, مەملەكەت باسشىسى قاسىم-جومارت كەمەل ۇلى توقاەۆ 2022 جىلعى 11 قاڭتارداعى قازاقستان رەسپۋبليكاسى پارلامەنتى ءماجىلىسىنىڭ وتىرىسىندا سويلەگەن سوزىندە: «كوپتەگەن جاس ازاماتتارىمىز قارۋلى كۇشتەر قاتارىندا اسكەري بورىشىن وتەۋدەن قاشادى. اسكەري بيلەتكە يە بولۋ جاستاردىڭ ماقتانىشىن تۋدىرمايدى جانە وتانعا قىزمەت ەتۋدىڭ بەلگىسى سانالمايتىن بولدى» دەپ ايتقان. سوندىقتان ەل پرەزيدەنتى وسى ماسەلەگە باسا نازار اۋدارىپ: «جاستارىمىزدى اسكەري بورىشىن وتەۋگە قالاي ىنتالاندىرۋعا بولاتىنىن ءبىز بۇكىل قوعام بولىپ ويلاستىرۋىمىز كەرەك» دەپ باسىپ ايتقان. ايگىلى جازۋشى مۇحتار اۋەزوۆتىڭ «ەل بولام دەسەڭ, بەسىگىڭدى تۇزە» دەگەن تەرەڭ دە ءماندى ناقىلى بار. سوندىقتان وتاندى ءسۇيۋ, وتانعا قىزمەت ەتۋدى بالا كەزدەن ۇيرەتۋ كەرەك. الايدا, بۇگىنگى كۇنى ەلىمىزدە بالالار مەن جاستاردىڭ پاتريوتتىق تاربيەسى, ياعني وتانعا ادال قىزمەت ەتۋ, ازاماتتىق بورىش پەن نەگىزگى كونستيتۋتسيالىق مىندەتتەردى ورىنداۋ زامان تالاپتارىنا ساي كەلمەيدى», دەدى ايگۇل قۇسپان.
ونىڭ ايتۋىنشا, جاۋاپتى ۋاكىلەتتى ورگانداردىڭ ءوزارا ءىس-قيمىلى فورمالدى سيپاتقا ءتان. اتقارىلىپ وتىرعان جۇمىستارى ازاماتتاردىڭ بويىندا پاتريوتتىق سانانى بەرىك قالىپتاستىرمايدى.
«2022 جىلى ۇكىمەتكە ازاماتتاردى اسكەري-پاتريوتتىق تاربيەلەۋ ءتارتىبىن ايقىنداۋ قۇقىعى بەرىلگەن بولاتىن. سول جىلى-اق ءتيىستى ەرەجەلەر قابىلداندى, بىراق بۇل ءىس-ارەكەت قالىپتاسقان جاعدايدى وزگەرتپەدى. وسىلاردى ەسكەرە وتىرىپ, ءبىز, پارلامەنتتىڭ ءبىر توپ دەپۋتاتتارى ەلىمىزدەگى اسكەري-پاتريوتتىق تاربيەنى جەتىلدىرۋگە باعىتتالعان زاڭ جوباسىن ازىرلەدىك. زاڭ جوباسى «اسكەري قىزمەت تۋرالى» زاڭىن «اسكەري-پاتريوتتىق تاربيە», «اسكەري-پاتريوتتىق تاربيە جۇيەسى» تەرميندەرىنىڭ مازمۇنىن زاڭنامالىق تۇرعىدان ايقىندايتىن جاڭا باپپەن تولىقتىرادى», دەدى «AMANAT» پارتياسى فراكتسياسىنىڭ مۇشەسى ايگۇل قۇسپان.
سونىمەن قاتار, وسى نورما رەسپۋبليكالىق جانە وڭىرلىك دەڭگەيلەردە اسكەري-پاتريوتتىق تاربيە جونىندەگى ۇيلەستىرۋ كەڭەستەرىن قۇرۋدى كوزدەيدى.
ايگۇل قۇسپاننىڭ ايتۋىنشا, كەڭەستەردىڭ نەگىزگى مىندەتتەرى تومەندەگىدەي:
- اسكەري-پاتريوتتىق تاربيەنى دامىتۋ ماسەلەلەرى بويىنشا ۇسىنىستار ازىرلەۋ;
- باعدارلامالىق ءىس-شارالاردى ۇيىمداستىرۋ بارىسىندا ازاماتتاردى اسكەري-پاتريوتتىق تاربيەلەۋدە بارلىق مۇددەلى مەملەكەتتىك ورگاندار مەن ۇيىمداردىڭ جانە قوعامدىق بىرلەستىكتەردىڭ كۇش-جىگەرى مەن مۇمكىندىكتەرىن بىرىكتىرۋ;
- جاستاردىڭ بويىندا قازاقستان ارمياسىنىڭ جاعىمدى بەينەسىن قالىپتاستىرۋ ءۇشىن كوركەم جانە دەرەكتى فيلمدەر جاساۋ, مۋزىكا جانە ادەبي شىعارمالار تۋدىرۋ, باسپا ونىمدەرىن شىعارۋ, تەلەارنالاردا اسكەرلەر تۋرالى تسيكلدى حابارلار جۇرگىزۋ جانە الەۋمەتتىك جەلىلەردە شىنايى اقپارات بەرۋ.
اسكەري-پاتريوتتىق تاربيە ماسەلەلەرىندە ۇيلەستىرىلگەن جانە كەلىسىلگەن جۇمىستى ءىس جۇزىندە جۇزەگە اسىرۋ ءۇشىن «قورعانىس جانە قارۋلى كۇشتەر تۋرالى» زاڭىندا كوزدەلگەن ورتالىق جانە جەرگىلىكتى اتقارۋشى ورگانداردىڭ فۋنكتسيالارىنا ءتيىستى تولىقتىرۋلار ەنگىزۋ ۇسىنىلادى.
«سونداي-اق, «مەملەكەتتىك جاستار ساياساتى تۋرالى» زاڭىنا مادەنيەت سالاسىنداعى ۋاكىلەتتى ورگاننىڭ جاستار ۇيىمدارىمەن اسكەري-پاتريوتتىق تاربيە ماسەلەلەرى بويىنشا ءوزارا ءىس-قيمىلى مەن ىنتىماقتاستىعىن جۇزەگە اسىرۋ بولىگىندە تولىقتىرۋ ەنگىزىلەدى. زاڭ جوباسىن قاراۋ بارىسىندا دەپۋتاتتار اسكەري-پاتريوتتىق تاربيەنى جەتىلدىرۋگە, اسكەري قىزمەتتىڭ بەدەلى مەن تارتىمدىلىعىن ارتتىرۋعا باعىتتالعان بىرقاتار تۇزەتۋلەردى ۇسىندى.
وسىعان بايلانىستى زاڭ جوباسى مازمۇندىق جانە تۇجىرىمدامالىق جاعىنان ءبىرشاما جاقساردى. وسى ءۇشىن ازىرلەۋشىلەر اتىنان جۇمىس توبىنىڭ مۇشەلەرىنە جانە قاتىستى دەپۋتاتتارعا العىس بىلدىرگىم كەلەدى.
قۇرمەتتى ارىپتەستەر, مەملەكەت باسشىسى 2023 جىلى وتكەن بۇكىلارميالىق كەڭەستە جاستارىمىزدى وتانشىلدىققا تاربيەلەۋدىڭ قاجەت ەكەنىن ايتقانى بارشامىزدىڭ ەسىمىزدە.
ۇسىنىلىپ جاتقان زاڭ جوباسى وسكەلەڭ ۇرپاقتى وتانىمىزدىڭ ناعىز جاناشىرىنا اينالدىرۋعا, ولاردىڭ اسكەري-پاتريوتتىق رۋحىن ارتتىرۋعا اسەر ەتەتىنى ءسوزسىز. وسىعان بايلانىستى ونى قولداۋلارىڭىزدى سۇرايمىن», دەپ قورىتىندىلادى بايانداماسىن.