ماقساتىمىز - قازاقستاننىڭ رۋحاني جاۋھارىن تانىتۋ - ايگۇل بەكبولاتوۆا

- ايگۇل حانىم, فرانكفۋرت كىتاپ كورمەسى كوپتەگەن ەل ءۇشىن ادەبي بايلانىس ورناتۋعا مۇمكىندىك بەرەتىن الەمدىك الاڭ سانالادى. ءسىز ءۇشىن وسى كورمەگە قاتىسۋدىڭ نەگىزگى ءمانى مەن ماڭىزى نەدە بولدى؟

- فرانكفۋرت كىتاپ كورمەسىنە قاتىسۋىمىز – بۇل Arman-PV باسپاسى ءۇشىن عانا ەمەس, جالپى ەلىمىز ءۇشىن دە مادەنيەت پەن رۋحانيات سالاسىنداعى ماڭىزدى قادام. الەمنىڭ ءار بۇرىشىنان جينالعان زيالى قاۋىمعا قازاقستاننىڭ ادەبي مۇراسى مەن رۋحاني بايلىعىن پاش ەتۋ – ءبىزدىڭ باسپامىز ءۇشىن ۇلكەن مارتەبە. بۇرىن ءار باسپا ءوز الدىنا كورمەگە قاتىسسا, بيىلعى جىلى قر-نىڭ مادەنيەت جانە اقپارات مينيسترلىگى بىزگە تۇتاس پلاتفورما جاساپ, ۇلكەن قولداۋ كورسەتتى. بۇل پاۆيلون وتاندىق ادەبيەتتى جاھاندىق دەڭگەيدە كورسەتۋگە ەرەكشە مۇمكىندىك سىيلاپ, ۇلتتىق قۇندىلىقتارىمىزدى جان-جاقتى تانىتۋعا جول اشتى. كورمەنىڭ ۇيىمداستىرىلۋىندا ۇلتتىق مەملەكەتتىك كىتاپ پالاتاسى ماڭىزدى ءرول اتقاردى. Arman-PV جانە باسقا دا جەتەكشى باسپالار, اتاپ ايتقاندا, الماتىكىتاپ, اتامۇرا, Steppe&World, مەكتەپ, كوكجيەك-گوريزونت باسپالارى ءبىر پاۆيلون اياسىندا ءبىرتۇتاس قۇرىلىم رەتىندە جۇمىس ىستەپ, قازاقستاننىڭ رۋحاني مۇراسىن الەمدىك ساحناعا شىعارۋعا اتسالىستى.

- فرانكفۋرت كورمەسىندە قانداي تاقىرىپتار كوتەرىلدى, ءسىز ءۇشىن قايسىسى ەرەكشە ماڭىزدى بولدى؟

- بيىلعى فرانكفۋرت كىتاپ كورمەسىنە 4,300-دەن استام باسپا مەن ۇيىمدار 100-گە جۋىق ەلدەن جينالىپ, ءوز جۇمىستارىن تانىستىردى. بۇل شارادا تۇراقتى دامۋ, تسيفرلىق تەحنولوگيالار, مادەني الماسۋ جانە جاساندى ينتەللەكتتىڭ قوعامعا اسەرى سياقتى وزەكتى ماسەلەلەر تالقىلاندى. جاھاندىق كليماتتىڭ وزگەرۋى مەن دەموكراتيالىق قۇندىلىقتاردى قولداۋ سىندى ماڭىزدى باعىتتارعا ەرەكشە نازار اۋدارىلدى.

كورمە بارىسىندا كىتاپتاردىڭ ءبىلىم مەن اقپارات كوزى عانا ەمەس, سونىمەن قاتار قوعام الدىنداعى جاھاندىق جاۋاپكەرشىلىك پەن بولاشاققا ىقپال ەتۋ قۇرالى ەكەنى ايقىندالدى. ءارتۇرلى تاقىرىپتىق باعىتتارداعى پىكىرتالاستار, كەزدەسۋلەر, مادەني بايلانىستار ءبىزدى جاڭا يدەيالار مەن جوبالاردى ىسكە اسىرۋعا شابىتتاندىردى. وسى تالقىلاۋلاردىڭ ناتيجەلەرى ءبىزدىڭ وقۋ ماتەريالدارى مەن باسىلىمدارعا يننوۆاتسيالىق كوزقاراسپەن قاراۋىمىزدى جانە ولاردى جەتىلدىرۋگە دەگەن ىنتامىزدى ارتتىردى.

- بىلۋىمشە, Arman-PV باسپاسى ۇزاق جىلدار بويى وقۋ ادەبيەتىن شىعارۋمەن اينالىسىپ كەلەدى. نەگە ينتەراكتيۆتى جانە تانىمدىق كىتاپتارعا قىزىعۋشىلىق تانىتتىڭىزدار, تولىعىراق ايتىپ بەرە الاسىز با؟

- ءبىز 22 جىلدان بەرى وقۋلىقتار شىعارۋ ىسىمەن اينالىسىپ كەلەمىز. وسى ۋاقىت ارالىعىندا ەلىمىزدىڭ ءبىلىم بەرۋ سالاسىندا ساپالى وقۋ قۇرالدارىن ۇسىنۋ ءبىزدىڭ باستى ماقساتىمىزعا اينالدى. دەگەنمەن, زامان تالابىنا ساي العا جىلجۋ جانە وقىتۋ ۇدەرىسىن قىزىقتى ءارى ينتەراكتيۆتى ەتۋ قاجەتتىلىگىن سەزىندىك. سوندىقتان جاڭا فورماتتار مەن ادىستەردى ىزدەپ, دامىتا بەرۋدى كوزدەيمىز.

وتكەن جىلى فرانكفۋرتتاعى كىتاپ كورمەسىندە ءبىز يتاليالىق Nui Nui باسپاسىمەن تانىستىق, بۇل كەزدەسۋ ءبىزدىڭ جۇمىسىمىزعا جاڭا باعىت اكەلدى. بىرلەسە وتىرىپ, كونە وركەنيەتتەر جايلى پوپ-اپ جانە 3D كىتاپتار جاسادىق, سونىمەن قاتار قازاقستاننىڭ مادەنيەتى مەن تاريحىنا ارنالعان ءدال وسىنداي جوبالاردى ىسكە اسىرۋعا كىرىستىك. بۇل كىتاپتار وقۋشىلاردى ۆيزۋالدى ءارى قىزىقتى فورماتتا ءبىلىم الۋعا ىنتالاندىرادى.

سونداي-اق كورمەدە ءبىز ينتەراكتيۆتى اۋديوكىتاپتارىمىزدى – «اعىلشىن ءتىلىن وڭاي ۇيرەنەمىز», «ۋچيم انگليسكي لەگكو», «ۋچيم كازاحسكي لەگكو» كىتاپتارىن تانىستىردىق. بۇل كىتاپتار جاس وقىرماندارىمىزعا ءتىلدى وڭاي, ءارى ءتيىمدى مەڭگەرۋگە كومەكتەسەدى. سونىمەن قاتار, قازاقستان مادەنيەتىن ناسيحاتتايتىن «اباي» ەنتسيكلوپەدياسى, «عارىش قۇپيالارى» سىندى ءۇش تىلدە جارىق كورگەن بالالار كىتاپتارى ەۋروپاداعى وتانداستارىمىزدىڭ ەرەكشە قىزىعۋشىلىعىنا يە بولدى. مۇنىڭ بارلىعى ءبىزدىڭ ەلىمىزدىڭ مادەني مۇراسىن ساقتاپ, ونى الەمگە تانىتۋعا قوسقان ۇلەسىمىز دەپ سانايمىن.

- كورمە بارىسىندا جاڭا سەرىكتەستەر تاپتىڭىزدار ما, جانە وسى سەرىكتەستىكتەر Arman-PV باسپاسىنىڭ بولاشاعى مەن دامۋىنا قانداي ىقپال ەتۋى مۇمكىن؟

- كورمەنىڭ ءبىز ءۇشىن ەڭ ۇلكەن جەتىستىكتەرىنىڭ ءبىرى – قىتايدىڭ بالالارعا ارنالعان ءبىلىم بەرۋ ادەبيەتىن شىعارۋمەن اينالىساتىن Beijiao Children Joy Education & Technology كومپانياسىمەن كەلىسسوزدەر باستاۋىمىز بولدى. بۇل سەرىكتەستىك بىزگە شەتەل نارىعىندا دا, ءوز ەلىمىزدە دە جوعارى سۇرانىسقا يە بىرەگەي وقۋ ماتەريالدارىن جاساۋعا مۇمكىندىك بەرمەك.

Arman-PV باسپاسى ءۇشىن مۇنداي حالىقارالىق بايلانىستاردىڭ بولۋى – ءبىزدىڭ ماقساتىمىزعا جەتۋ جولىنداعى ۇلكەن قادام. ءبىزدىڭ وقىرماندارىمىز ساپالى, زاماناۋي جانە ينتەراكتيۆتى وقۋ قۇرالدارىنا قول جەتكىزۋى ءتيىس. وسى جوبالار اياسىندا ءبىز وقۋ پروتسەسىن تارتىمدى, وقۋشىلارعا قولايلى فورماتتا جەتكىزۋدى كوزدەيمىز. بۇل ءبىزدىڭ ەلىمىزدەگى وقىرماندارىمىز ءۇشىن عانا ەمەس, جالپى ءبىلىم بەرۋ سالاسىنا قوسقان ۇلەسىمىز دەپ سانايمىن.

بۇل ساپارىمىز بارىسىندا قازاقستاننىڭ ماينداعى فرانكفۋرت قالاسىنىڭ كونسۋلدىعىندا قازاقستاننىڭ باس كونسۋلى تاۋبالدى ۇمبەتباەۆ مىرزامەن كەزدەسۋ ءوتتى. بىزگە ەرەكشە قوناقجايلىلىق كورسەتىلدى. كونسۋلدىقتا وتكەن كەزدەسۋدە باسپامىزدىڭ جەتىستىكتەرى مەن الداعى جوسپارلارىمىز تۋرالى پىكىر الماسىپ, شەت ەلدە ءجۇرىپ, ءوزىمىزدى تۋعان ەلدە جۇرگەندەي سەزىندىك. سونىمەن قاتار, ۇلتتىق مەملەكەتتىك كىتاپ پالاتاسىنىڭ توراعاسى ءادىل قويتانوۆ, جازۋشىلار وداعىنىڭ توراعاسى مەرەكە كۇلكەنوۆ, جازۋشى-عالىم ورازالى سابدەن سىندى تۇلعالارمەن پىكىر الماسۋ مۇمكىندىگىنە يە بولدىق. وسى قولداۋ ءبىز ءۇشىن الداعى جولدا ۇلكەن سەنىم مەن شابىت بەردى.

- Arman-PV باسپاسى مەن وتاندىق كىتاپ باسۋ سالاسىنىڭ الداعى جوسپارلارى قانداي ستراتەگيالىق باعىتتاردى قامتيدى, جانە حالىقارالىق كورمەلەردەن الىنعان تاجىريبە مەن جاڭا سەرىكتەستىكتەردىڭ ەلدىڭ ءبىلىم بەرۋ جانە مادەنيەت سالاسىنا تيگىزەتىن ىقپالى قانداي بولۋى مۇمكىن؟

- الگىندە ايتقانىمداي, ءبىز 22 جىل بويى وقۋلىقتاردى شىعارۋ ىسىندە ساپاعا ەرەكشە كوڭىل ءبولىپ كەلەمىز جانە بۇل باعىتتاعى جۇمىسىمىزدى ودان ءارى جالعاستىرامىز. ەلىمىزدىڭ ءاربىر وڭىرىندەگى وقۋشىعا ساپالى, تۇسىنىكتى, زاماناۋي وقۋلىقتار ۇسىنۋ – ءبىزدىڭ باستى ماقساتىمىز. قازىرگى ۋاقىتتا حالىقارالىق سەرىكتەستىكتەرمەن جۇمىس جاساپ, قازاق وقىرماندارىنا جاڭا ءبىلىم بەرۋ تاسىلدەرىن تانىستىرۋدى كوزدەيمىز. بۇل كورمەدەن ۇيرەنگەنىمىزدى كىتاپتارىمىزدا عانا ەمەس, جالپى ءبىلىم بەرۋ ۇدەرىسىنە ەنگىزۋگە تىرىسامىز.

Arman-PV باسپاسىنىڭ ماقساتى – قازاقستان وقىرماندارىنا الەمدىك دەڭگەيدە مويىندالعان ساپالى ادەبيەتتى جەتكىزۋ, وقىتۋ مەن تاربيەلەۋ ۇدەرىسىن جاڭارتۋ جانە مادەني مۇرالارىمىزدى ساقتاۋ. مۇنداي حالىقارالىق كورمەلەرگە قاتىسۋ ءبىزدىڭ تاجىريبەمىزدى بايىتىپ, جاڭا سەرپىن بەرەدى.