شەتەلدىك ينۆەستورلار كەڭەسىنىڭ وتىرىسى اياسىندا پرەزيدەنت قاسىم-جومارت توقاەۆ Polpharma كومپانياسى باقىلاۋشىلار كەڭەسىنىڭ توراعاسى ەجي ستاراكتى قابىلدادى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
كەزدەسۋدە الەمدەگى جەتەكشى فارماتسەۆتيكالىق كومپانيانىڭ قازاقستان مەن ورتالىق ازياداعى قىزمەتىن كەڭەيتۋ ماسەلەلەرى تالقىلاندى.مەملەكەت باسشىسىنا كومپانيانىڭ ساپانى باقىلاۋ زەرتحاناسى مەن عىلىمي-زەرتتەۋ سىناق ورتالىعىنىڭ قۇرىلىسى اياقتالعانى جونىندە مالىمەت بەرىلدى. سونداي-اق تاياۋ ارادا جاڭا دارىلىك پرەپاراتتار ءوندىرىسىن ىسكە قوسۋ جوسپارى تانىستىرىلدى.قاسىم-جومارت توقاەۆ قازاقستاننىڭ فارماتسەۆتيكا يندۋسترياسىنداعى عىلىمي-زەرتتەۋ الەۋەتىن دامىتۋ جانە وقۋ باعدارلامالارىن ەنگىزۋ ماڭىزدى ەكەنىن اتاپ ءوتتى. مەملەكەت باسشىسى كوكتەمگى سۋ تاسقىنى كەزىندە زارداپ شەككەن وڭىرلەرگە قاجەتتى ءدارى-دارمەكتەردى جەدەل جەتكىزىپ بەرگەنى ءۇشىن پولشالىق ينۆەستورعا العىس ايتتى.كەزدەسۋ سوڭىندا ەجي ستاراك قاسىم-جومارت توقاەۆقا ەكى كىتاپ سىيعا تارتتى. ونىڭ ءبىرىنشىسى Polpharma كومپانياسىنىڭ دەمەۋشىلىگىمەن ءتۇسىرىلىپ جاتقان دەرەكتى فيلمگە ارنالعان. بۇل فيلمدە بەكەت اتا, قوجا احمەت ياساۋي, ارىستان باب كەسەنەلەرى, تاڭبالى پەتروگليفتەرى مەن بوتاي قونىسى سەكىلدى قازاقستاننىڭ كيەلى جەرلەرى تاسپالانعان.ەكىنشى كىتاپ – قازاقتىڭ بەلگىلى جازۋشىسى, پولشانى باسقىنشىلاردان ازات ەتۋگە قاتىسقان مايدانگەر كەمەل توقاەۆ تۋرالى عۇمىرباياندىق جيناق. بۇل باسىلىم پولشا-قازاقستان تاريحى كوميسسياسىنىڭ قولداۋىمەن ازىرلەندى.