ورال قالاسىنىڭ تۇرعىنى جەكە كاسىپ اشىپ, جيھاز شىعارۋ ءۇشىن تسەح عيماراتىن جالعا الىپ, قىلمىستىق ارەكەتتەرىن جاسىرعان, دەپ حابارلايدى Egemen.kz.
الەۋمەتتىك جەلىلەردە, سونداي-اق ءارتۇرلى ينتەرنەت-جارناما پلاتفورمالارىندا جيھاز جاساۋدى ۇسىناتىن اقپاراتتى ورنالاستىرعان. كاسىپكەرلىك قىزمەتتىڭ كورىنىسىن جاساي وتىرىپ, ول تۇتىنۋشىلاردىڭ ۇيىنە كەلىپ, قاجەتتى ولشەمدەردى جاساپ, كەيىننەن ازاماتتاردى تاپسىرىستىڭ ورىندالىپ جاتىرعانىنا سەندىرگەن.
«تاپسىرىستى ورىنداۋ ءۇشىن جالعان جيھاز جاساۋشى ازاماتتارعا جيھازدىڭ قوسالقى زاتتارىنىڭ فوتوسۋرەتتەرىن جىبەرگەن, سونىمەن قاتار ماتەريالدى ساتىپ الۋ ءۇشىن ءۇشىنشى تۇلعالارمەن كەلىسىمدەر بار دەپ سەندىرگەن, وسىلايشا جابىرلەنۋشىلەردى الداعان. ناتيجەسىندە 7 جابىرلەنۋشىگە 8 633 000 تەڭگە كولەمىندە ماتەريالدىق شىعىن كەلتىرىلگەن», دەپ حابارلادى باس پروكۋراتۋرانىڭ ءباسپاسوز قىزمەتى.
سوتتا سوتتالۋشى جابىرلەنۋشىلەرمەن ازاماتتىق-قۇقىقتىق قارىم-قاتىناستىڭ بار ەكەنىن العا تارتىپ, كىناسىن مويىنداماعان. الايدا مەملەكەتتىك ايىپتاۋشى سوتتالۋشىنىڭ كىناسىن تولىق دالەلدەگەن.ناتيجەسىندە, كىنالى تۇلعا ەكى نەمەسە ودان دا كوپ ادامعا قاتىستى ءىرى كولەمدە جاسالعان الاياقتىق ءۇشىن 3 جىل 6 ايعا باس بوستاندىعىنان ايىرىلدى.