بۇگىندە تسيفرلىق تەحنولوگيالاردىڭ كومەگىمەن جەتىلدىرىلگەن ونلاين كۋرستار پەداگوگيكالىق قۋاتتى قۇرالعا اينالدى. ۋاقىت پەن ورىن تاڭداماستان, كاسىبي قۇزىرەتتىلىكتى ۇنەمى جەتىلدىرىپ وتىرۋعا مۇمكىندىك بەرەتىن كۋرستارعا كەز كەلگەن قۇرىلعىدان كىرىپ وقي بەرۋگە بولادى, دەپ جازادى Egemen.kz.
ءال-فارابي اتىنداعى قازاق ۇلتتىق ۋنيۆەرسيتەتى جۋرناليستيكا فاكۋلتەتىنىڭ عالىمدارى قازاقستاندا تۇڭعىش رەت EdApp پلاتفورماسىندا موبيلدىك قوسىمشاعا ارنالعان ء«وڭىر – ورتا ازيا: كوشى-قون ماسەلەلەرى بويىنشا جۋرناليستىك ءبىلىم بەرۋ» اتتى قازاقستان, قىرعىزستان, تاجىكستان جانە وزبەكستان ەلدەرىنىڭ تاجىريبەسىنە نەگىزدەلگەن بەس تىلدەگى مۋلتيلينگۆالدىق ونلاين-كۋرس ازىرلەپ, ىسكە قوستى. جوبانى يۋنەسكو-نىڭ كوممۋنيكاتسيانى دامىتۋ حالىقارالىق باعدارلاماسى قولدادى. مۋلتيمەديالىق تەحنولوگيا مۇمكىندىكتەرىن پايدالانا وتىرىپ جاسالعان كۋرس ورتا ازياداعى جۋرناليستىك ءبىلىم بەرۋ پلاتفورماسىن دامىتۋعا ەلەۋلى ۇلەس قوسادى.
يۋنەسكو-نىڭ جۋرناليستىك ءبىلىم بەرۋ سەرياسىنىڭ «ميگرانتتار مەن بوسقىندار تۋرالى رەپورتاجدار» وقۋ قۇرالىنا نەگىزدەلگەن پراكتيكالىق كۋرستىڭ قۇرامى باق-تا كوشى-قون ماسەلەلەرىن جازۋدىڭ بارلىق مودۋلدەرى مەن ەلەمەنتتەرىن قامتيدى. كۋرس كوشى-قوندى ساۋاتتى جازۋ ماشىعىن قالىپتاستىرادى, سوندىقتان, ستۋدەنتتەرمەن بىرگە, وسى سالادا قالام تەربەپ جۇرگەن جۋرناليستەرگە دە ارنالعان. تىڭداۋشىلار كۋرستى كەز كەلگەن موبيلدىك قۇرىلعىدان كىرىپ, ۆيرتۋالدى انيمە كەيىپكەرلەرمەن بىرگە وقىپ, شەبەرلىكتەرىن شىڭداي الادى. ونلاين كۋرس ويىنعا, قىزىقتى وقيعالارعا نەگىزدەلگەن تاپسىرمالارعا, كوشى-قون سالاسىنداعى مىسالدارعا, كەڭەستەرگە تولى تانىمدىق باي ماتەريالدارمەن, فوتو, ۆيدەو, گرافيك, دەرەككوزدەرگە سىلتەمەلەرمەن تولىقتىرىلعان.
وسىدان ءبىر جىل بۇرىن, كۋرستىڭ ستارتتىق كەزدەسۋىنە ورتا ازيانىڭ 42 ۋنيۆەرسيتەتى, بۇۇ, يۋنەسكو حالىقارالىق ۇيىمدارىنىڭ وكىلدەرى مەن 25 مەديايندۋستريا وكىلدەرى قاتىسىپ, جۋرناليستىك ءبىلىم بەرۋ باعدارلامالارىنىڭ ساپاسى مەن قاشىقتان وقىتۋ رەسۋرستارىن ارتتىرۋ, جۋرناليستيكا وقىتۋشىلارىنىڭ الەۋەتىن كوتەرۋ, ورتا ازياداعى كوشى-قون ماسەلەلەرىنىڭ جازىلۋى مەن جۋرناليستىك ءبىلىم بەرۋ پلاتفورماسىنىڭ بولاشاعىن تالقىلاعان ەدى. جوبانىڭ جۇمىس توبى (فيلول.ع.د. ن. شىڭعىسوۆا, فيلول.ع.كانديتاتتارى ە. دۋدينوۆا, ا. روجكوۆ, م. نەگىزباەۆا, PhD ا.سكريپنيكوۆا) ءبىر جىل بويى حالىقارالىق جانە ورتاازيالىق كەيستەر مەن رەسۋرستاردى زەرتتەپ, كوشى-قوننىڭ باق-تا جازىلۋىن حالىقارالىق ستاندارتتامەن سالىستىرمالى تۇردە ساراپتاپ, اشىق ءبىلىم بەرۋ رەسۋرستارىنىڭ قاعيدالارى مەن نۇسقاۋلىقتارىن زەردەلەدى. كۋرستار ساراپشىلار سىناعىنان ءساتتى ءوتتى.
ونلاين كۋرس ىسكە قوسىلعان كەزدەسۋدە كۋرستى وقىپ, تەستەن وتكىزگەن قازاقستان, قىرعىزستان, وزبەكستان ەلدەرىنىڭ جوو وكىلدەرى, جۋرناليستەر مەن ستۋدەنتتەر يننوۆاتسيالىق, ينكليۋزيۆتى كۋرس تۋرالى جاعىمدى پىكىرلەرىن ورتاعا سالدى.
مۋلتيمەديا مەن انيماتسيانىڭ كومەگىمەن جاسالعان اقىسىز ونلاين كۋرستى ءتيىمدى اياقتاعان تىڭداۋشىلارعا سەرتيفيكات بەرىلەدى.
قازىرگى تاڭدا open.kaznu.kz پلاتفورماسىندا جۋرناليستيكا سالاسى بويىنشا سەگىز جاوك بار, سونىڭ تورتەۋىن «مەدياتدم» جوباسىنىڭ جۇمىس توبى ازىرلەگەن, بۇل كۋرستار دا يۋنەسكو-نىڭ رەسۋرستارىنا نەگىزدەلگەن, پلاتفورماعا سەگىز تىلگە اۋدارىلعان مۋلتيلينگۆيستيكالىق وقۋ قۇرالى دا ورنالاستىرىلدى. بۇگىندە بۇل كۋرستاردى تەك ستۋدەنتتەر عانا ەمەس, جۋرناليستەر, بلوگەرلەر, ءباسپاسوز قىزمەتىنىڭ ماماندارى دا وقىپ, سەرتيفيكات يەمدەندى. اقش, نورۆەگيا, قىرعىزستان, وزبەكستان ەلدەرىنەن دە تىڭداۋشىلار بار.
اتالعان ونلاين كۋرستار قازاقستانداعى اشىق ءبىلىم بەرۋ ۇلتتىق پلاتفورماسىن دامىتۋعا ەلەۋلى ۇلەس قوسادى.
نازگۇل شىڭعىسوۆا
ءوڭىر – ورتا ازيا: كوشى-قون ماسەلەلەرى
بويىنشا جۋرناليستىك ءبىلىم بەرۋ»
جوباسىنىڭ جەتەكشىسى
ءال-فارابي اتىنداعى قازۇۋ