ءوز ءمانىن قايتا تاپقان رەسپۋبليكا كۇنى مەرەكەسىنىڭ ونەر ادامدارىنا بەرىپ جاتقان ىرزىق-نەسىبەسى, قۋانىشى مول. ءبىزدىڭ ەركەلەپ, وسىلاي مەرەيىمىز تاسىپ, «حالىق ءارتىسى» اتانىپ جاتقانىمىز دا ەڭ اۋەلى وسى ەلدىگىمىزدىڭ ارقاسى بولسا, ەكىنشىدەن, ونەرىمىزدى باعالاپ, توبەسىنە كوتەرىپ, بۇگىنگە دەيىن قوشەمەتىن اياماي كەلە جاتقان حالقىمىزدىڭ, پاتشا كوڭىلدى كورەرمەندەرىمىزدىڭ رياسىز پەيىل-تىلەۋىنىڭ ارقاسى دەپ بىلەمىن. بۇل قۇرمەتتى اتاققا مەنەن بۇرىن سول جاناشىرلارىم قاتتى قۋانعان سياقتى. كوشەدە كورىپ قالعان ادامداردىڭ ءوزى تانىپ, قۇتتى بولسىن ايتىپ جاتىر. تانىساق تا, تانىماساق تا قۇشاقتاسىپ, كەشەدەن بەرى مارە-سارە كۇيدەمىز. مۇنىڭ بارلىعى كوڭىلدى ەرەكشە تولقىتادى ەكەن, كوزىمە جاس كەلدى. «وسى ۋاقىتقا دەيىن ونەر جولىندا بەكەر جۇرمەگەن ەكەنبىز, ەڭبەگىمىز ەش كەتپەپتى» دەپ شۇكىرشىلىك ەتتىم.
ارينە, مەملەكەتىمىزدىڭ قولداۋىنىڭ ارقاسىندا بۇگىنگە دەيىن اتاق پەن ماراپاتتان كەندە بولعان جوقپىز. دەسە دە حالىق ءارتىسى رەتىندە رەسمي مويىندالۋدىڭ قۋانىشى بولەك ەكەن. ايتۋلى اتاقتان بايىپ, اسىپ-تاسىپ كەتپەسىمىز انىق. بىراق كوڭىلدىڭ اسپانداپ, قيانعا شىققانى راس. بۇل – مەنىڭ ۇرپاعىما, كورەرمەندەرىمە قۋانىش. مەنى العا قاراي جىلجۋعا, ونەرگە ءارى قاراي دا قالتقىسىز قىزمەت ەتۋگە جەتەلەي بەرەتىن جاڭا ءبىر سەرپىلىس بولعانى انىق.
ءارتىس دەگەن حالىق وتە اسەرشىل كەلەدى. وسى قۇرمەتكە يە بولا الماي ارماندا كەتكەن قانشاما تالانتتى اكتەرلەرىمىز بار. شىن مانىندە ادامنىڭ كوزىنىڭ تىرىسىندە ەڭبەگىنىڭ باعالانعانىنا نە جەتسىن! سوندىقتان دا اللاعا مىڭ دا ءبىر تاۋبە دەيمىن. ۇزاق جىلدان بەرى ءۇزىلىپ قالعان اتاقتى قايتا جاڭعىرتقانى, قالپىنا كەلتىرگەنى, ەلدىگىمىزدى ەڭسەلى ەتە تۇسكەنى ءۇشىن پرەزيدەنتىمىز قاسىم-جومارت توقاەۆقا زور العىسىمدى جەتكىزەمىن. تاۋەلسىزدىگىمىز تۇعىرلى, ۇرپاعىمىز عۇمىرلى بولعاي. ۇلت ونەرى ماڭگى جاساي بەرسىن!
ليديا كادەن,
قازاقستاننىڭ حالىق ءارتىسى