بۇگىنگى تاڭدا جەلىدەن تونەتىن قاۋىپ كوپ. سونىڭ ءبىرى – قولدانۋشىلار دەرەكتەرىنىڭ ۇرلانۋى. سالدارىنان الاياقتاردىڭ قۇربانىنا اينالعانداردىڭ سانى كۇن ساناپ ءوسىپ بارادى. وسى تۇستا تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى كيبەرقاۋىپسىزدىكتى كۇشەيتىپ, تسيفرلىق ينفراقۇرىلىمدى نىعايتۋ ماقساتىندا ءتيىستى شارالاردى قولعا الدى.
كەيىنگى كەزدەرى اتا-انالار تاراپىنان بالالاردىڭ بيومەتريالىق دەرەكتەرىنىڭ زاڭسىز تارالۋىنا قاتىستى شاعىمدار كوبەيگەن. تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى شاعىمنىڭ نەگىزىندە تەكسەرۋ جۇمىستارىن جۇرگىزە كەلە, بيومەتريكالىق يدەنتيفيكاتسيا جۇيەلەرىن ازىرلەۋشىلەر مەن شىعارماشىلىق ۇيىرمەلەر ۇيىمدارىنىڭ زاڭ بۇزعانىن انىقتاعان. اتا-انالارىنىڭ كەلىسىمىنسىز ەكى بالاعا قاتىستى دەرەك زاڭسىز جينالعان. ءىس قورىتىندىسىنا سايكەس اكىمشىلىك ءىس قوزعالىپ, 332 280 مىڭ تەڭگە كولەمىندە ايىپپۇل سالىنعان.
مينيسترلىك ۇيىمداردىڭ جەكە دەرەكتەرگە جاۋاپكەرشىلىگىن كۇشەيتۋ ماقساتىندا «اكىمشىلىك قۇقىق بۇزۋشىلىقتار تۋرالى» كودەكسكە وزگەرىستەر ەنگىزۋدى ۇسىندى. وزگەرىستەرگە سايكەس ايىپپۇل كولەمى 3 ەسە وسەدى. سونداي-اق ەلەكتروندىق تسيفرلىق قولتاڭبانىڭ جابىق كىلتىن رۇقساتسىز پايدالانۋعا جاۋاپكەرشىلىك ەنگىزۋ جوسپارلانىپ وتىر.
تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ مالىمەتىنشە, «اقپاراتتىق قاۋىپسىزدىك ماسەلەلەرى بويىنشا زاڭناماعا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى اياسىندا ءبىر ميلليوننان استام سۋبەكتىنىڭ دەرەگىن وڭدەيتىن يەلەر مەن وپەراتورلار ءۇشىن مىندەتتى كيبەرساقتاندىرۋدى ەنگىزۋ باستامالارى ازىرلەنىپ جاتىر. سونىمەن قاتار قارجى نارىعىن رەتتەۋ جانە دامىتۋ اگەنتتىگىمەن بىرلەسىپ, ازاماتتارعا «ستوپ كرەديت» قىزمەتى ارقىلى قايتادان كرەديت الۋعا تىيىم سالۋدى دەربەس ەنگىزۋگە مۇمكىندىك بەرەتىن قارجىلىق قىلمىستاردان قورعاۋ تەتىگى ازىرلەندى. قىزمەت «eGov mobile» ءموبيلدى قوسىمشاسىندا جانە «ەلەكتروندىق ۇكىمەت» ۆەب-پورتالىندا قولجەتىمدى.
مينيسترلىك 2029 جىلعا قاراي كيبەرقاۋىپتەر تۋرالى حالىقتىڭ 100 پايىز حاباردار بولۋىنا قول جەتكىزۋ ماقساتىندا بەلسەندى جۇمىس ىستەپ جاتقانىن اتاپ ءوتتى. وسى جوبا اياسىندا, «citizensec.kz», «fingramota.kz», «nomadguard.kz» پلاتفورمالارى قۇرىلعان.
اقپاراتتىق قاۋىپسىزدىك كوميتەتىنىڭ توراعاسى رۋسلان ابدىقالىقوۆتىڭ ايتۋىنشا, تسيفرلىق دامۋ مينيسترلىگى ينتەرنەتتەگى الاياقتىق ماسەلەلەرى بويىنشا ۋاكىلەتتى ورگان بولماسا دا, Telegram مەن Meta-نىڭ الاياقتىققا قارسى سحەمالارىن بەلسەندى تۇردە قولدانىپ جاتىرمىز.
«ينتەرنەتتەگى الاياقتىقپەن كۇرەس جاھاندىق مىندەت بولعاندىقتان, بىرلەسكەن كۇش-جىگەردى تالاپ ەتەدى. كەزدەسۋ بارىسىندا Meta وكىلدەرى ەلىمىزدىڭ ينتەرنەتتەگى الاياقتىق ماسەلەسى كوپتەگەن ەل ءۇشىن ورتاق پروبلەما ەكەنىن اتاپ ءوتتى. تەك سوڭعى توقساندا Meta الەم بويىنشا 1,2 ميلليارد فەيك اككاۋنتتى جاساندى ينتەللەكت تەحنولوگيالارىن پايدالانا وتىرىپ بۇعاتتادى. كيبەرگيگيەنا – تسيفرلىق الەمدەگى قاۋىپسىزدىكتىڭ جاڭا دەڭگەيى, ءبىزدىڭ مىندەتىمىز – ازاماتتارعا وسى شارالاردىڭ ماڭىزىن تۇسىنۋگە كومەكتەسۋ», دەيدى ر.ابدىقالىقوۆ.