اقوردا رەزيدەنتسياسىندا قازاقستانعا رەسمي ساپارمەن كەلگەن ارمەنيا پرەزيدەنتىن سالتاناتتى تۇردە قارسى الۋ ءراسىمى ءوتتى. قاسىم-جومارت توقاەۆ پەن ۆااگن حاچاتۋريان ءبىر-بىرىنە رەسمي دەلەگاتسيا مۇشەلەرىن تانىستىردى. قۇرمەت قاراۋىلىنىڭ باستىعى پرەزيدەنتتەرگە راپورت بەرىپ, ەكى ەلدىڭ ءانۇراندارى شىرقالدى. سودان سوڭ قاسىم-جومارت توقاەۆ پەن ۆااگن حاچاتۋريان كەلىسسوز وتكىزدى.
ىقپالداستىقتى نىعايتاتىن قادام
مەملەكەت باسشىسى ارمەنيا پرەزيدەنتىنە ءىلتيپات كورسەتىپ, ەلىمىزدىڭ قازاق-ارميان ىنتىماقتاستىعىن مۇلدەم جاڭا دەڭگەيگە كوتەرۋگە مۇددەلى ەكەنىن ايتتى.
– بۇگىنگى ۋاعدالاستىقتار ءوزارا بايلانىستىڭ نىعايا تۇسۋىنە ىقپال ەتەدى دەپ سەنەمىن. ءبىز قازاق-ارميان سەرىكتەستىگىنىڭ نەگىزى سانالاتىن جوعارى دەڭگەيدەگى كەزدەسۋلەرىمىزگە ەرەكشە ءمان بەرەمىز. قازاقستان ارمەنيامەن دوستىق قارىم-قاتىناستى جوعارى باعالايدى. قازاق ەلىنىڭ ارميان حالقىنا ىقىلاسى ەرەكشە. ارمەنيا – ەلىمىزدىڭ سەنىمدى ءارى ۋاقىت سىنىنان وتكەن جاقىن سەرىكتەسى. ءبىزدىڭ حالىقتاردى بەرىك دوستىق, ورتاق تاريح جانە ۇقساس مادەني-گۋمانيتارلىق قۇندىلىقتار بايلانىستىرادى. ەكىجاقتى قاتىناستار بارلىق سالادا قارقىندى دامىپ كەلە جاتقانىن ايرىقشا اتاپ وتكىم كەلەدى, – دەدى قاسىم-جومارت توقاەۆ.
مەملەكەت باسشىسى بيىل قازاقستان مەن ارمەنيا اراسىنداعى دوستىق پەن ىنتىماقتاستىق تۋرالى شارتقا قول قويىلعانىنا 25 جىل تولعانى اتالىپ وتەتىنىن, وسى ۋاقىت ارالىعىندا اۋقىمدى ينستيتۋتسيونالدىق بازا قالىپتاسقانىن ايتتى.
– ساۋدا-ەكونوميكالىق ىقپالداستىقتان بولەك, قوس حالىق اراسىنداعى مادەني-گۋمانيتارلىق بايلانىستار سونى سەرپىنمەن دامىپ كەلەدى. بىلتىر ەرەۆاندا ارمەنياداعى قازاق تەاترىنىڭ كۇندەرى ءوتتى. كەلەسى جىلى ءسىزدىڭ ەلىڭىزدە قازاقستان مادەنيەتىنىڭ ونكۇندىگىن ۇيىمداستىرۋ جوسپارلانىپ وتىر. بۇگىن وزىڭىزبەن بىرگە ارمەنيانىڭ قازاقستانداعى مادەنيەت كۇندەرىنىڭ سالتاناتتى اشىلۋ راسىمىنە قاتىسامىز, – دەدى قازاقستان پرەزيدەنتى.
ءوز كەزەگىندە ۆااگن حاچاتۋريان قاسىم-جومارت توقاەۆقا قوناقجايلىلىق تانىتقانى ءۇشىن العىس ايتىپ, قازاقستانمەن ءوزارا ءتيىمدى ىنتىماقتاستىقتى ودان ءارى دامىتۋعا بەيىلدى ەكەنىن جەتكىزدى.
– قاسيەتتى قازاق جەرىنە كەلگەنىمە قۋانىشتىمىن. قازاقستاننىڭ دامۋ جانە وركەندەۋ قارقىنىنا ءتانتى بولدىم. ەكى ەل اراسىنداعى دوستىق قارىم-قاتىناستار ۇزاق جىلدارعا جالعاسادى دەپ سەنەمىن. ويتكەنى ونىڭ تاريحي تامىرى تەرەڭدە جاتىر. قازاقستان – ءبىزدىڭ سەنىمدى ءارى دوستاس سەرىكتەسىمىز. بۇعان قوسا, ەكى ەل اراسىنداعى ەكونوميكالىق بايلانىس تابىستى دامىپ كەلە جاتقانىن اتاپ وتكىم كەلەدى, – دەدى ارمەنيا پرەزيدەنتى.
كەلىسسوز بارىسىندا تاراپتار ساۋدا-ەكونوميكالىق, كولىك-لوگيستيكا, اۋىل شارۋاشىلىعى, قارجى, مادەني-گۋمانيتارلىق جانە تسيفرلاندىرۋ سالالارىنداعى ىقپالداستىقتى نىعايتۋدىڭ پەرسپەكتيۆالارىن تالقىلادى. سونداي-اق ايماقتىق جانە حالىقارالىق كۇن تارتىبىندەگى وزەكتى ماسەلەلەر قاراستىرىلدى.
قاسىم-جومارت توقاەۆ قازاقستان تاراپى ازەربايجان مەن ارمەنيانىڭ بەيبىت كەلىسىمگە كەلۋى ءۇشىن الماتى الاڭىن الداعى ۋاقىتتا دا ۇسىنۋعا دايىن ەكەنىن راستادى.
ارمەنيانىڭ قازاقستانداعى مادەنيەت كۇندەرى باستالدى
قاسىم-جومارت توقاەۆ پەن ۆااگن حاچاتۋريان ارمەنيانىڭ قازاقستانداعى مادەنيەت كۇندەرىنىڭ اشىلۋ سالتاناتىنا قاتىستى. وسىناۋ كونتسەرت قاليبەك قۋانىشباەۆ اتىنداعى قازاق ۇلتتىق مۋزىكالىق دراما تەاترىندا ءوتتى.
پرەزيدەنتتەر, ەڭ الدىمەن, داڭقتى ارميان كينورەجيسسەرى جانە سۋرەتشىسى سەرگەي پارادجانوۆتىڭ 100 جىلدىق مەرەيتويىنا ارنالعان تەاتر فويەسىندەگى فوتوكورمەنى تاماشالادى.
كونتسەرتتە ارمەنيانىڭ مەملەكەتتىك دجاز وركەسترى مەن ينگا ارشاكيان, گور سۋدجيان سەكىلدى ونەرپازدارى الەمگە ايگىلى ارميان كومپوزيتورلارى كوميتاستىڭ, شارل ازناۆۋردىڭ, جورج گارۆارەنتستىڭ جانە ارنو بابادجانياننىڭ مۋزىكالىق شىعارمالارىن ورىندادى.
سونىمەن قاتار كەشە باستالعان استاناداعى ارمەنيا كينوسىنىڭ كۇندەرى بۇگىن دە جالعاسادى. ال سوس ساركيسيان اتىنداعى «امازگاين» تەاترى كورەرمەن نازارىنا دانيل حارمس شىعارماسىنىڭ جەلىسىمەن قويىلعان «ليۋ-بەف» سپەكتاكلىن ۇسىنادى.