ەلوردادا قر تۋريزم جانە سپورت ءمينيسترى ەربول مىرزابوسىنوۆتىڭ توراعالىعىمەن IX قىسقى ازيا ويىندارىنا ۇلتتىق قۇرامانىڭ دايىندىعىنا ارنالعان جيىن ءوتتى. بايراقتى باسەكە 2025 جىلدىڭ 7-14 اقپانىندا قىتايدىڭ حاربين قالاسىندا وتەدى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
ءىس-شاراعا مينيسترلىككە باعىنىستى ۇيىمداردىڭ باسشىلارى, قىسقى سپورت تۇرلەرى فەدەراتسيالارىنىڭ باس حاتشىلارى, مەملەكەتتىك جاتتىقتىرۋشىلار جانە ۇلتتىق قۇراما كوماندالارىنىڭ باس جاتتىقتىرۋشىلارى قاتىستى.
جيىندا ەربول مىرزابوسىنوۆ قىسقى ازيا ويىندارىنىڭ باستالۋىنا ساناۋلى اي قالعانىن ەسكە سالىپ, سارى قۇرلىق دوداسىنا قۇرامانى تىنعىلىقتى دايىنداۋعا قاتىستى ناقتى ماسەلەلەردى اشىق تالقىلاۋ كەرەك ەكەنىن جەتكىزدى.
«ەل نامىسى سىنالاتىن وسىنداي حالىقارالىق دودالاردا ۇلتتىق قۇرامانىڭ تابىستى ونەر كورسەتۋى قازاقستاننىڭ ءيميدجىن كوتەرەدى. قىسقى ازيا ويىندارىندا ءبىزدىڭ سپورتشىلار ءتاۋىر ناتيجە كورسەتىپ ءجۇر. سوندىقتان الداعى بايراقتى باسەكەدە جوعارى جەتىستىككە جەتۋ ءۇشىن بار كۇشىمىزدى سالۋ قاجەت», دەدى تۋريزم جانە سپورت ءمينيسترى.سونداي-اق جيىندا ەلىمىزدە قىسقى سپورت تۇرلەرىن دامىتۋ ماسەلەلەرى دە تالقىلاندى.
ايتا كەتەيىك, قىسقى ازيا ويىندارى 1986 جىلدان بەرى تۇراقتى تۇردە وتكىزىلىپ كەلەدى. ال حاربين اتالعان ويىنداردى وسىمەن ەكىنشى مارتە قابىلداماق. ءبىرىنشى رەت 1996 جىلعى وتكىزگەن بولاتىن. الداعى ويىنداردا 11 سپورت تۇرىنەن جۇلدەلەر ساراپقا سالىنادى. سپورتشىلار شورت-ترەك, كونكيمەن جۇگىرۋ, مانەرلەپ سىرعاناۋ, شايبالى حوككەي, كەرلينگ, تاۋ شاڭعىسى, سنوۋبوردينگ, فريستايل, شاڭعى جارىسى, بياتلون جانە شاڭعى الپينيزمىنەن سىنعا تۇسەدى.