ورتالىق كوممۋنيكاتسيالار قىزمەتىندە «كاسىبي مەملەكەتتىك اپپاراتتى قالىپتاستىرۋ» تاقىرىبىندا بريفينگ ءوتتى. وعان پرەزيدەنت جانىنداعى مەملەكەتتىك باسقارۋ اكادەمياسىنىڭ پروفەسسورلارى جاڭىلجان ءجۇنىسوۆا مەن ءلايلا اسىلبەكوۆا قاتىستى.
سپيكەرلەر مەملەكەتتىك قىزمەت سالاسىن ۋاقىت تالابىنا ساي جەتىلدىرۋدىڭ كۇن تارتىبىنە شىعارىلۋى ەل دامۋىنا جاڭاشا سەرپىن بەرەتىنىن ايتا كەلىپ, قازىرگى تاڭدا وسى باعىتتا اتقارىلىپ جاتقان شارالارعا توقتالدى.
جيىن بارىسىندا ءلايلا اسىلبەكوۆا:
– كاسىبي مەملەكەتتىك اپپاراتتى قۇرۋ ءۇشىن ەڭ الدىمەن مەملەكەتتىك قىزمەتشىنىڭ جاعىمدى كەلبەتىن قالىپتاستىرۋ قاجەت. ماسەلەن, مەملەكەتتىك قىزمەتكەردىڭ بويىندا ماقساتقا جەتسەم دەگەن تالپىنۋشىلىق, مىنەز-ق ۇلىق ادەپتىلىگى, ىنتىماقتاستىق, ۇيىمداستىرۋشىلىق دارىن, باسەكەگە قابىلەتتىلىك, جان-جاقتىلىق, بەيىمدەلۋ مەن باعدارلاۋ قاسيەتتەرى بولعانى ءجون. مۇنداي باعالاۋ تالابى «ا» كورپۋسىمەن قاتار «ب» كورپۋسىنا ىرىكتەلۋدە سىنالاتىن ۇمىتكەرلەرگە دە قويىلادى, – دەدى.
سونداي-اق, ول پرەزيدەنت جانىنداعى مەملەكەتتىك باسقارۋ اكادەمياسىنىڭ وقىتۋ باعدارلاماسى تۇرعىسىندا ءسوز ەتە وتىرىپ, ازاماتتاردىڭ بىلىكتىلىك تاجىريبەسىن, مىنەز-ق ۇلىق ادەپتىلىگىن جانە ءوزارا ءتۇسىنىستىك قاعيداتىن بىرىكتىرە وقىتۋ مەملەكەتتىك قىزمەت جۇيەسىندە ورىن الاتىن جەمقورلىقتىڭ الدىن الۋعا سەپ بولادى ءارى قىزمەتشىنىڭ جەكە قاسيەتتەرىنىڭ دەڭگەيىن سىناۋعا مۇمكىندىك بەرەدى دەپ ەسەپتەيتىنىن جەتكىزدى.
بريفينگتە سپيكەرلەر مەملەكەت باسشىسى نۇرسۇلتان نازارباەۆ ۇسىنعان «ماڭگىلىك ەل» ۇلتتىق يدەياسى قازاقستان حالقىنىڭ بولمىسىنا تولىقتاي سايكەس كەلەتىنى جونىندە دە اڭگىمەلەپ بەردى.
ءوز كەزەگىندە جاڭىلجان ءجۇنىسوۆا:
– كەز كەلگەن ەلدىڭ دامۋى ءۇشىن سول حالىقتىڭ ەڭ جاقسى قاسيەتتەرىن بىرىكتىرەتىن جانە وعان سايكەس كەلەتىن, العا باستايتىن ءبىر يدەيا قاجەت. مىسالى, «امەريكا ارمانى» بىزگە جارامايدى, سەبەبى, ونىڭ نەگىزى قازاقستاندىقتارعا ءتان ەمەس. ءبىزدىڭ ءدىلىمىز دە, سالت-ءداستۇرىمىز دە باسقا, – دەدى.
ونىڭ ايتۋىنشا, «ماڭگىلىك ەل» يدەياسىندا ازاماتتىق تەڭدىك, ەڭبەكقورلىق, عىلىمعا دەگەن قۇشتارلىق, تولەرانتتىلىق, ادىلدىك, وتانسۇيگىشتىك سەكىلدى تازا قازاقستاندىق رۋحاني قۇندىلىقتار وتە جاقسى ۇيلەسىم تاپقان.
باسقوسۋدا بەلگىلى بولعانداي, «نۇر وتان» پارتياسىنىڭ قوعامدىق ساياسات ينستيتۋتى جاقىندا ازاماتتىق بىرتەكتىلىك تۋرالى ساۋالناما جۇرگىزىپتى. سۇراۋ سالىنعانداردىڭ 70 پايىزى وزدەرىن, ەڭ الدىمەن, قازاقستان ازاماتتارى رەتىندە سەزىنەتىنىن ايتقان. بۇل – اسا جوعارى كورسەتكىش.
جولدىباي بازار,
«ەگەمەن قازاقستان».