قازاق ونەرىنىڭ كوگىندە تاعى ءبىر جارقىن جۇلدىز جانۋعا ءازىر. ءداستۇر مەن جاڭاشىلدىقتى توعىستىرعان, رۋح پەن شەبەرلىكتى تارازىعا سالعان حالىقارالىق ۆوكالدىق بايقاۋ – روزا باعلانوۆا اتىنداعى ونەر دوداسى بيىل دا كەڭ تىنىسپەن قانات جايدى.
مادەنيەت جانە اقپارات مينيسترلىگىنىڭ قولداۋىمەن ءوتىپ جاتقان ايتۋلى جوبا ەكىنشى جىل قاتارىنان ونەرسۇيەر قاۋىمنىڭ نازارىن وزىنە اۋدارىپ وتىر. بيىلعى بايقاۋعا 150 ۇمىتكەردىڭ ءوتىنىم بەرۋى – سونىڭ ايقىن دالەلى. بۇل – تەك ساننىڭ كورسەتكىشى ەمەس, ساپانىڭ, سەنىمنىڭ ءھام شىعارماشىلىق باسەكەنىڭ جاڭا بەلەسكە كوتەرىلگەنىنىڭ كورىنىسى.
بايقاۋ شەكارا تالعامايدى. قازاق دالاسىنان باستاۋ العان اۋەزدى ونەر دوداسىنا تۇركيا, بەلارۋس, وزبەكستان, قىرعىزستان ەلدەرىنەن دە تالانتتى جاستار ءۇن قوسىپ, ونەردىڭ ورتاق ءتىل ەكەنىن تاعى ءبىر مارتە دالەلدەپ وتىر. ءساۋىردىڭ 8-ىندە ءوتىنىم قابىلداۋ كەزەڭى ءتامامدالىپ, قازىر قاتىسۋشىلار ىرىكتەۋ سىنىنان ءوتىپ جاتىر. ونلاين فورماتتا ءوتىپ جاتقان العاشقى كەزەڭ – تالانت پەن دايىندىقتىڭ سىنالار شاعى. بۇل كەزەڭدە ءاربىر قاتىسۋشىنىڭ داۋىس مۇمكىندىگى عانا ەمەس, ساحنا مادەنيەتى, ورىنداۋشىلىق شەبەرلىگى دە جان-جاقتى ساراپقا سالىنادى. ال مامىردىڭ 13-ىندە وتەتىن وفلاين كەزەڭ – ناعىز ونەر مەرەكەسىنە اينالماق. ىرىكتەۋدەن سۇرىنبەي وتكەن ۇمىتكەرلەر ۇلكەن ساحنادا باق سىناپ, كورەرمەن جۇرەگىن باۋراۋعا تىرىسادى. بايقاۋدىڭ شەشۋشى كەزەڭى – 14 مامىر. وسى كۇنى وتەتىن گالا-كونتسەرتتە جەڭىمپازدار ەسىمى جاريالانىپ, ۇزدىكتەردىڭ ونەرى كوپشىلىككە جول تارتادى.
ايتۋلى جوبا – ۇلتتىڭ رۋحاني مۇراسىن ۇلىقتايتىن, روزا باعلانوۆا سىندى دارا تۇلعانىڭ ونەردەگى ولمەس ءىزىن كەيىنگى بۋىنعا اماناتتايتىن تاعىلىمدى الاڭ. حالىق قاھارمانىنىڭ ەسىمىمەن اتالۋىنىڭ ءوزى بايقاۋدىڭ مازمۇنىن تەرەڭدەتىپ, ماڭىزىن ارتتىرا تۇسەدى. ونەردىڭ ءورىسىن كەڭەيتىپ, تالانتتىڭ تامىرىن تەرەڭگە تارتقان بۇل باستاما – ۇلتتىق مادەنيەتتىڭ مەرەيىن وسىرەتىن ماڭىزدى قادام. بايقاۋدى ۇيىمداستىرىپ وتىرعان «قازاقكونتسەرت» ۇجىمى وسى ارقىلى جاس دارىندارعا ۇلكەن مۇمكىندىك ۇسىنىپ وتىر.