الماتىدا اۋا رايىنىڭ كۇرت ناشارلاۋىنا بايلانىستى قالانىڭ كوممۋنالدىق قىزمەتتەرى كۇشەيتىلگەن دايىندىق رەجيمىنە اۋىستىرىلدى. قالا بيلىگى تۇرعىنداردىڭ قاۋىپسىزدىگىن قامتاماسىز ەتۋ ءۇشىن تاۋلىك بويى باقىلاۋ مەن جەدەل ارەكەت شارالارىن ۇيىمداستىرعان, دەپ جازادى Egemen.kz.
قالالىق كوممۋنالدىق ينفراقۇرىلىم جانە تۇرعىن ءۇي ينسپەكتسياسى باسقارماسىنىڭ مالىمەتىنشە, «الماتى تازالىق» مكك جانە مەردىگەر ۇيىمدار تاۋلىك بويى كەزەكشىلىككە كوشتى. جۇمىستارعا 104 ارنايى تەحنيكا, 74 موتوپومپا جانە 12 اسسەنيزاتورلىق كولىك تارتىلعان. ونىڭ ىشىندە 9 تەحنيكا سۋ باسۋ قاۋپى جوعارى اۋماقتارعا ورنالاستىرىلدى.
قالادا 75 جەدەل بريگادا جاساقتالىپ, ولاردىڭ قۇرامىندا 425 جول سالاسى جۇمىسشىسى بار. سونىمەن قاتار 2300 قۇم تولتىرىلعان قاپ دايىندالدى. جالپى تاۋلىكتىك كەزەكشىلىككە 2710 قىزمەتكەر جۇمىلدىرىلىپ وتىر.
الماتى قالاسىنىڭ قۇتقارۋ قىزمەتى دە كۇشەيتىلگەن رەجيمدە جۇمىس ىستەپ جاتىر. ولار 15 موتوپومپا مەن 1 اسسەنيزاتورلىق كولىكتى كەزەكشىلىككە شىعارعان. ال توتەنشە جاعدايلار دەپارتامەنتى 53 تەحنيكا مەن 240 قىزمەتكەردى جۇمىلدىردى.
بولجامدار ناقتىلانا تۇسپەك: «قازگيدرومەت» سۋپەركومپيۋتەردى پايدالانا باستادى
«قازگيدرومەت» بولجامىنا سايكەس, 16 ساۋىردە كۇن الا بۇلتتى بولىپ, ساعات 16:00-دەن 17 ءساۋىر 02:00-گە دەيىن كەي جەرلەردە 17 مم-گە دەيىن نوسەر جاڭبىر جاۋدى. نايزاعاي ويناپ, جەلدىڭ ەكپىنى 15-18 م/س-قا دەيىن جەتەدى. كۇندىز اۋا تەمپەراتۋراسى +17…+19°س شاماسىندا بولعان.
17 ءساۋىر كۇنى ساعات 11:00-دەن باستاپ كۇن بويى 12 مم-گە دەيىن جاڭبىر كۇتىلەدى. نايزاعاي ويناپ, جەلدىڭ ەكپىنى 18 م/س-قا دەيىن كۇشەيۋى مۇمكىن. تۇندە اۋا تەمپەراتۋراسى +8…+10°س, كۇندىز +11…+13°س بولادى.
قالالىق قىزمەتتەر جاعدايدى تۇراقتى باقىلاۋدا ۇستاپ, قاجەت بولعان جاعدايدا تۇرعىندار مەن قالا قوناقتارىنىڭ قاۋىپسىزدىگىن قامتاماسىز ەتۋ ءۇشىن جەدەل شارالار قابىلدايدى.
جاڭبىر, داۋىل, تۇمان: ەلىمىزدە اۋا رايى كۇرت قۇبىلادى