جاڭا نىسان

اقجاردا ءسۇت وڭدەۋ كاسىپورنى اشىلدى تارباعاتاي اۋدانىنىڭ اقجار اۋىلىندا ءسۇت زاۋىتى اشىلدى. اۋىل ماڭايىنداعى ەلدى مەكەندەردەن ءسۇت قابىلداپ, ءوز دۇكەندەرىندە ونىمدەرىن دەلدالسىز ساتۋدى جوس­پارلاپ وتىرعان جاڭا كاسىپورىن «جۇمىسپەن قامتۋ-2020» باع­دار­لاماسىنىڭ قولداۋىمەن ىسكە قوسىلدى. «ايزات» جشس جەتەك­شىسى باقىتجان قۇنافيانوۆ اتال­عان نىسانعا جەكە قاراجاتىن دا سا­لىپتى. ءسۇت تسەحىنىڭ ءونىم­دەرى اۋدانداعى مەكتەپتەر مەن با­لا­باقشالاردى جەرگىلىكتى ونىممەن قامتاماسىز ەتىپ, سەمەي مەن وسكەمەن قالالارىنداعى دۇكەن سورەلەرىنە دە تۇسپەك. – بۇل  ەلباسىنىڭ 100 ناقتى قادامىن جۇزەگە اسىرۋ اياسىندا قولعا الىنعان جوبا. ءسۇت جانە ءسۇت ءوندىرىسىن  دامىتۋ اۋدانداعى تىڭ قادام بولىپ سانالادى. ەندى اقجار اۋىلدىق وكرۋگىندەگى تۇرعىندار وسى تسەحقا ءسۇت وتكىزە الادى. سونىمەن قاتار تۇتىنۋشىلار ساپالى ءسۇت ونىمدەرىن قولايلى باعاعا الاتىن بولادى, – دەدى زاۋىتتىڭ اشىلۋ سالتاناتىنا قاتىسقان تارباعاتاي اۋدانىنىڭ اكىمى دىلدابەك ورازباەۆ. كاسىپورىن ءسۇت, ىرىمشىك, سارى ماي, ايران, سۇزبە سىندى ءتۇرلى ءسۇت ونىمدەرىن شىعارادى. رەسەي مەن قىتاي ەلدەرىنىڭ قۇرال-جابدىقتارىمەن جابدىقتالعان نىسان 5 ماماندى جۇمىسپەن قامتىپ وتىر. كاسىپكەر كەلەشەكتە جۇمىس ورنىن كوبەيتۋدى كوزدەپ وتىرعانىن جەتكىزدى. جاڭادان اشىلعان تسەح جۇمىسىنا قىزۋ كىرىسكەن جاس زەرتحاناشى اياۋجان سەرىكقىزىنىڭ ايتۋىنشا, زاۋىتتىڭ قۋاتى كۇنىنە 5 توننا ءسۇت وندىرۋگە جەتەدى. قابىلدانعان ءسۇتتىڭ قۇرامى مەن تازالىعى زەرتحانالىق تەكسەرۋدەن وتەدى. وبلىس اكىمىنىڭ تاپسىرماسى بويىنشا بيىل تارباعاتاي اۋدانىندا «جۇمىسپەن قامتۋدىڭ جول كارتاسى-2020» باعدارلاماسى ارقىلى ءسۇت باعىتىنداعى ءىرى قارا مالىن وسىرۋگە, ءسۇت ءون­دى­رۋگە 30 ملن. تەڭگە قارجى ءبولىندى. بۇگىندە باعدارلاماعا قاتى­سۋ­شى 11 شارۋاشىلىق ءوز جۇمىس­تارىن باستادى. اۋداندا ءسۇت تاپ­سىراتىن جەكە تۇلعالار مەن شارۋا­شىلىقتارداعى ءىرى قارا مالىنىڭ ۆەتەريناريالىق جاعدايىن باقىلاۋ قىزمەتى جولعا قويىلدى. وسى ارقىلى تۇرعىندار ساپالى ءارى تازا سۇتپەن قامتاماسىز ەتىلمەك. دۋمان اناش, «ەگەمەن قازاقستان». شىعىس قازاقستان وبلىسى, تارباعاتاي اۋدانى.