ءماجىلىس توراعاسى قابيبوللا جاقىپوۆ ءبىزدىڭ ەلىمىزدە ساپارمەن جۇرگەن قىرعىزستان جوگوركۋ كەنەشىنىڭ توراعاسى اسىلبەك جەەنبەكوۆپەن كەزدەستى, دەپ حابارلادى ءماجىلىستىڭ ءباسپاسوز قىزمەتى.
جۇزدەسۋدە ساۋدا-ەكونوميكالىق قاتىناستاردى نىعايتۋ, پارلامەنتارالىق ىنتىماقتاستىقتى تەرەڭدەتۋ, سونداي-اق, مەملەكەتتەر اراسىنداعى كەلىسىمدىك-زاڭنامالىق بازانى جەتىلدىرۋ تۋراسىندا اڭگىمە قوزعالدى. اسىرەسە, قىرعىز رەسپۋبليكاسىنىڭ ەاەو-عا كىرۋى جونىندە كەلىسىمدى راتيفيكاتسيالاۋدى جەدەلدەتۋدىڭ ماڭىزدىلىعىنا كوڭىل ءبولىندى.
ەكى ەل اراسىنداعى ىنتىماقتاستىقتىڭ ستراتەگيالىق ماڭىزدىلىعىنا نازار اۋدارا كەلىپ, قابيبوللا جاقىپوۆ ەلباسى باستاماشى بولعان 5 ينستيتۋتتىق رەفورما تۋرالى جانە «100 ناقتى قادام – ۇلتتىق جوسپارى» تۋرالى باياندادى.
ا.جەەنبەكوۆ ءوز كەزەگىندە قازاقستان پرەزيدەنتىنىڭ كورەگەندىگى مەن قازاقستاندىقتاردىڭ بەرەكە-ءبىرلىگىنىڭ ارقاسىندا كەلگەن زور تابىستارعا توقتالىپ, ءبىزدىڭ ەلىمىزدىڭ العا قويعان اۋقىمدى ماقساتتارعا ۋاقىتىنان بۇرىن جەتەتىنىنە سەنىم ءبىلدىردى. ا.جەەنبەكوۆ ءوز سوزىندە:
– قازاقستان – دامۋدىڭ, بەيبىتشىلىك پەن تۇراقتىلىقتى ساقتاۋدىڭ جارقىن ۇلگىسى, – دەدى.
ەكسپو-2017 كورمەسىنە دە كوڭىل بولگەن مارتەبەلى مەيمان ءبىزدىڭ ەلىمىزدىڭ الەۋەتىن پاش ەتۋدىڭ ايرىقشا ءمۇمكىندىگى ەكەنىن ايتىپ, وعان قىرعىزستاننىڭ دا بەلسەنە قاتىساتىنىن جەتكىزدى.