انەۋگۇنى ارىپتەستەرىمىزبەن اڭگىمەلەسىپ تۇرعاندا, توبەمىزدەن اۋەلەپ قۇستار ۇشتى. جاي ۇشپادى, ءۇشبۇرىش جاساپ نەمەسە V تاسىلىمەن ۇشتى. سوعان تاڭىرقاي قاراعان ارقايسىمىزدىڭ ىشىمىزدە «نەگە؟» دەگەن سۇراق قالىپ كەتتى.
سويتسەك, وسىلاي ۇشۋ ارقىلى قۇستار ەنەرگيا ۇنەمدەيدى ەكەن. الدىڭعى قاتارداعى قۇس قاناتتارىن قاعىپ, ارتىنداعىلارعا اۋا اعىنىن تۋدىرادى. سوندا ارتقى قاتارداعىلار از كۇش جۇمساپ, وڭايىراق ۇشادى. كوش باسىنداعى قۇس شارشاعاندا, كەيىنگىلەرىمەن اۋىسادى. وسى ءتاسىل اۆياتسيادا «اەروديناميكالىق سۇيرەۋ» دەپ تە اتالادى.
قۇتقارۋشى قاز
جاقىندا كوشەدەن جارالى كوگەرشىن كوردىم. نان تابۋ مەن ءمان تابۋدىڭ اراسىندا سابىلىپ ءجۇرىپ, ەشتەڭە ىستەمەستەن, ءوتىپ كەتتىم. ال كەيىن مىنا ءبىر وقيعانى وقىپ, قاتتى وكىندىم...
2021 جىلى لوندوندا ەرەكشە وقيعا بولعان ەكەن. جارالى قاز وزىنە كومەك كەرەگىن ءبىلدىرۋ ءۇشىن ادامدارعا جاقىنداعان. سول جەردە جۇرگەن دارىگەر دجواننا تريگانو ۆەتەرينارعا اپارماق بولادى. قاز تاڭعالارلىق تۇردە دارىگەردىڭ ارتىنان ەرىپ, كلينيكاعا بارعان, ەمدەلگەن. كەيىننەن دارىگەر دجواننا جۇمىس ىستەيتىن اۋرۋحاناعا اۋىر جاراقات العان ادام تۇسەدى. ەڭ عاجابى, ول ادام «مەن كوشەدە قانسىراپ جاتتىم, كومەككە ادامداردى ءبىر قاز شاقىردى. قاز ادامداردى ماعان قاراي قۋدى» دەگەن. دجواننا كىشكەنتاي قۇتقارۋشىنىڭ ءوزى ەمدەگەن قاز ەكەنىنە ەش كۇماندانبادى.
قۇرمەتكە بولەنگەن كوگەرشىن
«ەل تىلەگىن الىپ ۇش, ادامزاتتىڭ باعىنا. قارا بۇلتتى جارىپ ۇش, مۇحيتتىڭ ارعى جاعىنا». نىعمەت بايمۇحامەدوۆ جازعان وسى جولداردى وقىعاندا, اندەتە جونەلەتىنىڭىزگە ءشۇبام جوق. ال وسى ءاندى جازعان احمەت جۇبانوۆ مىنا ءبىر وقيعانى ءبىلدى مە ەكەن...
ءبىرىنشى دۇنيەجۇزىلىك سوعىس كەزىندە امەريكالىق ساربازداردىڭ ءبىر توبى فرانتسۋز جەرىندە قورشاۋدا قالادى. ولار بايلانىس ورناتۋ ءۇشىن شەر امي اتتى كوگەرشىنگە حات بەرىپ, سەنىم ارتقان. كوگەرشىنگە جولدا وق تيەدى. سوعان قاراماستان, ول حاباردى جەتكىزىپ, ساربازداردى قۇتقارۋعا كومەكتەسەدى. وسى ەرلىگى ءۇشىن قاناتتى بايلانىسشى «فرانتسيانىڭ اسكەري قۇرمەت بەلگىسى» ماراپاتىنا يە بولعان.