شىعىس قازاقستان وبلىسىنىڭ كۇرشىم اۋدانىندا زاڭسىز التىن ءوندىرىپ كەلگەندەر انىقتالدى. وبلىستىق پروكۋراتۋرانىڭ مالىمەتىنشە, قازبا جۇمىستارى «كولشىلىك» ۋچاسكەسىندە جۇرگىزىلگەن, دەپ حابارلايدى Egemen.kz.
تەكسەرۋ اۋدان پروكۋراتۋراسى, ۇقك دەپارتامەنتى جانە كۇرشىم ورمان شارۋاشىلىعى قىزمەتكەرلەرىنىڭ بىرلەسكەن رەيدى كەزىندە انىقتالعان. كۇدىكتىلەر پايدالى قازبالاردى اۋىر تەحنيكا مەن سپۋتنيكتىك بايلانىس قۇرالدارىن پايدالانىپ وندىرگەن.
وقيعا ورنىندا ءتورت ادام ۇستالدى. ولاردىڭ اراسىندا قازاقستان اۋماعىندا زاڭسىز جۇرگەن وزبەكستان ازاماتى دا بار.
تۇركىستان وڭىرىندە زاڭسىز التىن وندىرگەن 12 كۇدىكتى ۇستالدى
كۇدىكتىلەردەن شىنجىر تاباندى ەكسكاۆاتور, اۆتوكولىك, موتوتسيكل, قىمبات مەتالل ىزدەگىشتەر, قول قۇرالدارى جانە وزگە دە جابدىقتار تاركىلەندى.
اتالعان دەرەك بويىنشا قىلمىستىق كودەكستىڭ 295-1-بابى – «باعالى مەتالداردىڭ زاڭسىز اينالىمى» بويىنشا ءىس قوزعالدى. تەرگەۋ جالعاسىپ جاتىر.