ءبىر ايدان سوڭ مەكتەپ ءبىتىرۋ كەشى وتەدى: قىمبات كەش − مارتەبە مە, ىسىراپ پا؟

ءساۋىر ايىندا وقۋ-اعارتۋ مينيسترلىگى ءبىلىم الۋشىلار مەن اتا-انالارعا قاراجات جيناۋعا قاتاڭ تىيىم سالعان بولاتىن. الايدا ۆەدومستۆونىڭ بۇل ۇندەۋىنە قۇلاق اسار جان جوق. سەبەبى كوپ مەكتەپتە قارجى جيناۋ جۇمىستارى بىلتىر, ياعني جەلتوقسان ايىندا باستالىپ كەتكەن.

« ۇلىم 11-سىنىپتى ءبىتىرىپ جاتىر. جاڭا جىلدىڭ الدىندا اتا-انالار كوميتەتى مەيرامحانا تاۋىپ, اسابامەن دە كەلىسىپ قويدى. قازىر شوۋدىڭ بارىسى مەن سىيلىقتار جاعى تۇگەندەلىپ جاتىر. ءبىز ءار ادامعا 54 مىڭ تەڭگەدەن جينادىق. اسابانىڭ قىزمەت اقىسى دا سول قاراجاتتىڭ ىشىندە», دەيدى استانالىق اتا-انا تەمىرلان جانعوزى. 

قالا تۇرعىنىنىڭ ايتۋىنشا, قارجى جيناۋ مۇنىمەن بىتپەيدى. بالاسىن قاتاردان قالدىرعىسى كەلمەگەن اكە ءبىر ايلىق جالاقىسىن جۇمساعانىن ايتادى.

لەنتا – 1500 تەڭگە البوم – 16500 تەڭگە سۋرەتكە 2 وبراز – 43000 تەڭگە كوستيۋم-شالبار – 75000 تەڭگە مۇعالىمگە سىيلىق – 10000 تەڭگە

سوڭعى قوڭىراۋ: ەلىمىزدە 215 مىڭنان استام تۇلەك مەكتەپپەن قوشتاستى

استانالىق تۇرعىن دانا ءابدىراحمانوۆا دا بالاسىنىڭ مەكتەپ ءبىتىرۋ كەشىنە ۇساق-تۇيەكتى ساناماعاندا 130 مىڭداي قارجى جۇمساعان.

ء«بىر مەكتەپ ءبىتىرۋ كەشى ءۇشىن كوپ سوما دەپ ويلامايمىن. قازىر ءبارى قىمبات. مەكتەپ ءبىتىرۋ كەشى بالانىڭ ماڭگى ەسىندە قالادى. اسا ىسىراپشىلدىق دەپ ويلامايمىن. ءبارى ءوز جونىمەن ۇيىمداستىرىلىپ جاتىر», دەدى ول.

بۇل ۇل بالالاردىڭ اتا-انالارىنىڭ شىعىنى. ال قىزداردىكى بۇدان قىمبات بولارى ءسوزسىز. ولاردىڭ بەت, تىرناق ارلەۋ جۇمىستارىنان بولەك, كويلەكتەرىنىڭ ءوزى قوماقتى قاراجاتقا ءتۇسىپ وتىر. كەمى 70-80 مىڭ تەڭگە. ءساندى كويلەكتى ءبىر كۇنگە جالعا العاننىڭ وزىندە وسىنشاما شىعىن شىعادى.

بۇدان بولەك, مەكتەپ تۇلەكتەرى ليمۋزين جالداپ, وتشاشۋ ۇيىمداستىرادى. قازىر اسابانىڭ قىزمەت اقىسى دا شارىقتاپ تۇر. باعا 250 مىڭ تەڭگەدەن باستالىپ, 1-1,5 ملن تەڭگەدەن اسىپ جىعىلادى. ارينە, مۇنىڭ ءبارى اتا-انانىڭ قالتاسىنا سالماق, بىراق بالاسى ءۇشىن ەشكىم قاتاردان قالماق ەمەس.

«سالتاناتتى كەشتە 60 ادامنان اسپاسا باعا 250 مىڭ تەڭگە شاماسىندا. ەگەر 2-3 سىنىپ بىرىگىپ وتكىزەتىن بولسا, سايكەسىنشە, قىزمەتاقى دا قىمباتتايدى. بۇل قالاداعى ەڭ ارزان باعا», دەيدى اسابا رۋسلان.

«داڭعويلىق جارمەڭكەسىنە اينالدى»: دەپۋتات مەكتەپ ءبىتىرۋ كەشتەرىنە قىرۋار قارجى جيناۋ تۋرالى

جوعارىدا ايتىپ وتكەندەي, وقۋ-اعارتۋ مينيسترلىگى بيىل دا ءبىلىم بەرۋ ۇيىمدارىندا مەكتەپ ءبىتىرۋ ءىس-شارالارىن وتكىزۋ تۋرالى تالاپتاردى ناقتىلادى. ۆەدومستۆو بەلگىلەنگەن تالاپتارعا سايكەس, ءبىتىرۋ كەشتەرىن مەكتەپتەردەن تىس جەرلەردە ۇيىمداستىرۋعا جول بەرىلمەيتىنىن جەتكىزدى.

«قابىلدانعان شارالار ءبىلىم الۋشىلاردىڭ قاۋىپسىزدىگىن قامتاماسىز ەتۋدى, ولاردىڭ قۇقىقتارىن قورعاۋدى جانە قۇقىق بۇزۋشىلىقتاردىڭ الدىن الۋدى قاراستىرادى. اتتەستاتتاردى تابىستاۋ ءراسىمى تەك ءبىلىم بەرۋ ۇيىمدارىنىڭ عيماراتتارىندا ۇيىمداستىرىلادى. جەرگىلىكتى اتقارۋشى ورگاندارعا قارجىلىق شىعىنداردى تالاپ ەتپەيتىن تاربيەلىك جانە مادەني-اعارتۋشىلىق ءىس-شارالاردى ۇيىمداستىرۋ جانە ءتۇسىندىرۋ جۇمىستارىن جۇرگىزۋ تاپسىرىلدى. ىشكى ىستەر ورگاندارى تاراپىنان قۇقىق بۇزۋشىلىقتاردىڭ الدىن الۋ, قوعامدىق ءتارتىپتى ساقتاۋ جانە ءبىلىم الۋشىلاردىڭ قاۋىپسىزدىگىن قامتاماسىز ەتۋ بويىنشا شارالار تاپسىرىلدى», دەلىنگەن اقپاراتتا.

مينيسترلىك جىلدا مەكتەپ ءبىتىرۋ كەشى تويلانباسىن دەگەنمەن, ونى ءسان-سالتاناتىمەن ۇيىمداستىراتىندار جەتەرلىك. ەسكەرتۋگە قۇلاق اسىپ جاتقاندار از. از دەيتىن سەبەبىمىز, مۇنداي داڭعازالىققا قارسى مەكتەپ تۇلەكتەرى دە بار.

«مەن اتا-اناما تەك سوڭعى قوڭىراۋعا قاتىسىپ, تويحانادا وتەتىن ءبىتىرۋ كەشىنە قاتىسپايتىنىمدى ايتتىم. الايدا ولار مەنىڭ بۇل شەشىمىمە قارسىلىق تانىتىپ وتىر. سىنىپتا 30 وقۋشىنىڭ 9-ى باس تارتتى. مەنىڭشە, ءبىتىرۋ كەشىن شاعىن ورتادا اتاپ ءوتۋ كەرەك. ال ءبىزدىڭ ءبىتىرۋ كەشىمىزگە 150-دەي ادام جينالماق», دەيدى جاس تۇلەك مانسۇر ەرلان.

100 مىڭنان استام مەكتەپ تۇلەگى ەلىمىزدى كوگالداندىرۋعا اتسالىستى

بۇل پىكىردەن اتا-انالاردىڭ دا مال شاشۋعا بەيىم تۇراتىنىن اڭعارۋعا بولادى. ولار بالالارىنىڭ ءبىتىرۋ كەشى ەستەن كەتپەستەي بولعانىن قۇپ كورەدى. الايدا قاراجات ماسەلەسى شەشىلگەنىمەن, قاۋىپسىزدىكتى دە ەستەن شىعارماعان ءجون.

ايتا كەتەيىك, بۇعان دەيىن اتالعان ماسەلەگە قاتىستى ءماجىلىس دەپۋتاتى اسحات ايماعامبەتوۆ پىكىر ءبىلدىرىپ, ەلىمىزدەگى كوپتەگەن مەرەكەنىڭ الدەقاشان «داڭعويلىق جارمەڭكەسىنە» اينالىپ كەتكەنىن ايتقان بولاتىن. دەپۋتات كەيبىر وتباسىلاردىڭ ءبىتىرۋ كەشىنە 300 مىڭنان باستاپ, ءبىر ميلليون تەڭگەگە دەيىن اقشا سۇرالاتىنىنا شاعىمداناتىنىن ايتتى.