عالام عاجاپتارى: سوعىمعا قيمايتىن قوي

نۇربەك قۇلباەۆ اسىل تۇقىمدى عيسسار قوي وسىرۋمەن اينالىسادى. العاشىندا ءبىراز ۋاقىت اقشا جيناپ, شەتەلدەن ءتولىن ساتىپ العان. قىلشىق ءجۇندى قوي – ءىرى, ورتاشا سالماعى 150 كيلوداي بولادى. 5-6 اي­لىق ءتولىنىڭ ءوزى كادىمگى قويدىڭ سالماعىنا تەڭ. بۇل ەرەكشە مال كوبىنە تاجىكستان, وزبەكستان, قىرعىزستاندا وسىرىلەدى. اسىل تۇقىمدى قويدىڭ قۇلاعى مەن بويى ۇزىن, ءبىتىمى وزگەشە. ال باعاسى ارينە, وتە قىمبات.

تابىت قۇنىنا تەڭ سىرعا

«وسكار» سىيلىعىنىڭ لاۋرەاتى, امە­ريكالىق اكتەر مورگان فريمان­نىڭ اتىن بىلمەسەڭىز دە, ءتۇرىن مىن­دەتتى تۇردە شىرامىتۋىڭىز كەرەك. ءتىپتى «ەر ادام سىرعا تاعا ما» دەپ سوككەن دە شىعارسىز...

دۇنيە ءجۇزىنىڭ بار داڭقىنا يە بولعان ول ۇنەمى ىزگىلىك ءسوزىن سويلەپ جۇرەدى. كورەرمەندەرى سوندىقتان دا ەرەكشە ىقىلاس تانىتادى. بىراق قۇلاعىنا ۇنەمى التىن سىرعا تاعىپ جۇرەتىنىن جۇرت قابىلداي قويمايتىن. ءبىر كۇنى مورگان «بۇل سىرعالاردىڭ وزىندىك سىرى بار. ەگەر مەن ۇيدەن, ەلدەن تىس جەردە جان تاپسىرسام, جۇرت سىرعانى ساتىپ, تابىت الادى. بۇل مەنىڭ تابىتىمنىڭ قۇنىنا تەڭ التىن ءارى ۇنەمى ءولىمدى ەسكە سالىپ تۇرادى», دەپ ءتۇسىندىردى. وسىدان كەيىن اكتەرگە جۇرتتىڭ قۇرمەتى ودان سايىن ارتا ءتۇستى.

جەتپىس جىلدان كەيىن تابىلدى

اقش-تا 70 جىل بۇرىن ۇرلانعان بالا تابىلدى. وعان دنق سىناعى كومەكتەستى.

لۋيست ارماندو البينو 1950 جىلى جوعالىپ كەتكەن ەكەن. ونى بىرەۋلەر ۇرلاپ, اسىراپ العان. تۋىستارى قانشا جىل ىزدەپ, تابا الماعاننان كەيىن كۇدەرىن ۇزگەن كورىنەدى. بيىل اعاسى مەن بالالارى سوڭعى رەت تىرىسىپ كورەمىز دەپ بەل بۋادى. وزدەرىنىڭ دنق سىناعىن دەرەكقورعا سالىپ, وزگەلەرمەن ۇقساستىعىن سارالايدى. سوندا تەست بەيتانىس اداممەن 22% ۇقساستىق تاپقان. سودان تۋىستارى الگى ادامنىڭ مەكەنجايىن تاۋىپ, ىزدەپ بارادى, تىلدەسەدى. راسىندا دا ول قانشا جىل بۇرىن جوعالعان باۋىرى بولىپ شىعادى. امەريكالىقتار «تەحنولوگيا باۋىرلاردى تابىستىردى» دەپ شۋلاسىپ جاتىر. راس-اۋ!