«Siemens» – قازاقستان نارىعىنا شىققان العاشقى نەمىس كومپانيالارىنىڭ ءبىرى. وسى ۋاقىت ىشىندە ول رەسپۋبليكانىڭ تەحنولوگيالىق دامۋىنا ءوز ۇلەسىن قوسىپ ۇلگەردى. جاقىندا «سامۇرىق-قازىنا» قورى سەرىكتەستىكتىڭ جالعاسى رەتىندە ەكى جاڭا قۇجاتقا قول قويدى.
اتالعان قۇجاتتار گفر كانتسلەرى ولاف ءشولتستىڭ ەلىمىزگە رەسمي ساپارى اياسىندا راسىمدەلدى.
ءبىرىنشى قۇجات – «Siemens» جشس-مەن جاسالعان ستراتەگيالىق كەلىسىم, وعان قازاقستان-گەرمانيا ىسكەرلىك فورۋمى اياسىندا قول قويىلدى.
بۇل كەلىسىم بويىنشا تۇركىستان وبلىسىندا شىعىن ولشەگىشتەرىن شىعاراتىن بىرلەسكەن كاسىپورىن قۇرۋ كوزدەلگەن. شىعىن ولشەگىشتەر ەلەكتروتكىزگىش سۇيىقتىقتاردىڭ شىعىنىن ولشەۋگە, ونى ەسەپكە الۋعا ارنالعان. مۇنداي اسپاپتار ۋران وندىرۋدە كەڭىنەن قولدانىلادى. وسى ورايدا ەلىمىزدىڭ ۋران وندىرەتىن كاسىپورىندارىمەن ۇزاقمەرزىمدى كەلىسىمشارت جاساۋ كوزدەلگەن.
«نەمىس كونگلومەراتىمەن سەرىكتەستىك رەسپۋبليكادا ولشەۋ تەحنيكاسى مەن اۆتوماتتاندىرۋ سالاسىندا جاڭا ءتيىمدى تەحنولوگيالاردى قولدانۋعا, جوعارى كورپوراتيۆتىك ستاندارتتاردى دامىتۋعا جانە بيزنەستى جۇرگىزۋدىڭ وزىق تاجىريبەلەرىن ەنگىزۋگە ىقپال ەتەدى», دەيدى قور باسشىسى نۇرلان جاقىپوۆ.
«Siemens» جشس قۇرىلتايشىسى «Siemens AG» – 133 ميلليارد ەۋرو كاپيتاليزاتسياسى بار ۇيىم. ول ەلەكترتەحنيكا, ەلەكترونيكا, ەنەرگەتيكالىق جابدىقتار, كولىك, مەديتسينالىق جابدىقتار مەن جارىقتاندىرۋ تەحنيكاسى سالالارىندا, سونداي-اق ونەركاسىپ, كولىك جانە بايلانىس سالالارىندا ارنايى قىزمەتتەرمەن اينالىساتىن نەمىس كونگلومەراتى.
ەكىنشى قۇجات – «سامۇرىق-قازىنا» اق مەن «Siemens Energy» اراسىنداعى سەرىكتەستىك تۋرالى مەموراندۋم. «Siemens Energy» كومپانياسى ەلىمىزدەگى «Siemens Energy» پاركىنە عانا ەمەس, كورشىلەس ورتالىق ازيا ەلدەرىندەگى وكىلدىكتەرىنە دە قىزمەت كورسەتەتىن سەرۆيس حابىن قازاقستاندا قۇرۋ مۇمكىندىگىن قاراستىرىپ جاتىر.
«Siemens Energy» – «Siemens» ەنشىلەس ۇيىمى, ول ەنەرگەتيكالىق جابدىقتاردى وندىرۋگە, ەنەرگەتيكا سالاسىنداعى قىزمەتتەردى ۇسىنۋعا ارنايى قۇرىلعان.