وتانداسىمىز نادەجدا نوگاي – اۋىر اتلەتيكادان الەم چەمپيونى!

استانا. 15 ماۋسىم. پولشانىڭ ۆروتسلاۆ قالاسىندا وتكەن اۋىر اتلەتيكادان جاسوسپىرىمدەر اراسىنداعى الەم چەمپيوناتىندا قازاقستان سپورتشىسى نادەجدا نوگاي چەمپيون اتاندى. بۇل تۋرالى قازاقستان اۋىر اتلەتيكا فەدەراتسياسىنىڭ ءباسپاسوز قىزمەتى حابارلادى. +75 كيلو سالماق دارەجەسىندە سىنعا تۇسكەن نادەجدا جۇلقا كوتەرۋدە 125 كيلو زىلتەمىردى باعىندىردى. ال سەرپە كوتەرۋدە وتانداسىمىز 150 كيلو تارتاتىن شتانگانى ىرقىنا كوندىردى. ناتيجەسىندە ول قوس جاتتىعۋ قورىتىندىسى بويىنشا 275 كيلومەن جەڭىمپاز اتاندى. ەكىنشى ورىن العان تايلاند ەلىنىڭ اتلەتى دۋانگانكسورن چايدي 259 كيلومەن شەكتەلسە (113+146), قولا جۇلدەگەر اتانعان تۋنيس سپورتشىسى يوسرا ءديبتىڭ كورسەتكىشى – 251 كگ. (111+140). نادەجدا نوگايدىڭ جەڭىسى تۋرالى ۇلتتىق قۇرامانىڭ باس جاتتىقتىرۋشىسى الەكسەي ني: «ءبىز ناديانىڭ كۇش-قۋاتىنا سەنگەندىكتەن, ودان كوپ نارسە تالاپ ەتتىك. قارسىلاسىنان 16 كگ.-عا وزىپ كەتۋ ول ءۇشىن تۇك ەمەس. نادەجدانىڭ مۇمكىندىگى بۇدان دا جوعارى ناتيجە كورسەتۋگە جەتەدى», – دەدى. ەلامان قوڭىر. دەرەك: قازاقستان اۋىر اتلەتيكا فەدەراتسياسىنىڭ ءباسپاسوز قىزمەتى. سۋرەت. sports.kz.