13 قىركۇيەك كۇنى الماتى قالاسىنداعى «قازاقستان» قوناق ۇيىندە «وتانداستار» قورىنىڭ ۇيىمداستىرۋىمەن شەتەلدەگى جانە قازاقستانداعى وتانداس كاسىپكەرلەر اراسىنداعى ىسكەرلىك بايلانىستاردى نىعايتۋعا باعىتتالعان بيزنەس-فورۋم ءوتىپ جاتىر, دەپ جازادى Egemen.kz.
بيزنەس فورۋمعا الەمنىڭ 12 ەلىنەن: اقش, اۋستريا, جاپونيا, يران, قىرعىزستان, قىتاي, مالايزيا, موڭعوليا, وڭتۇستىك كورەيا, وزبەكستان, رەسەي, تۇركيادان 50-دەن استام قانداس كاسىپكەر ارنايى كەلدى. جالپى قازاقستانداعى كاسىپكەرلەردى قوسا العاندا شاراعا 200-گە جۋىق قاتىسۋشى جينالعان. فورۋمدا شەتەلدەگى جانە قازاقستانداعى بيزنەس قاۋىمداستىق وكىلدەرى بىرلەسە جۇمىس ىستەۋ جانە تاجىريبە الماسۋ ماسەلەسىن ورتاعا سالدى.
شارا بارىسىندا قانداستارىمىزعا قازاقستاننىڭ ەكونوميكالىق باعدارلامالارى مەن ينۆەستيتسيالىق مۇمكىندىكتەرى تانىستىرىلىپ, شەتەلدىك كاسىپكەرلەرگە زاڭنامالىق قولداۋ كورسەتىلەتىنى ايتىلدى.
فورۋم بارىسىندا قاتىسۋشىلاردىڭ باستاماسىمەن «شەتەلدەگى جانە قازاقستانداعى وتانداس كاسىپكەرلەردىڭ كەڭەسىن» قۇرۋ ۇسىنىلدى. بۇل كەڭەس شەتەلدەگى ەتنيكالىق قازاقتاردىڭ بيزنەس بەلسەندىلىگىن ارتتىرۋ جانە ولاردىڭ مادەني-گۋمانيتارلىق قۇندىلىقتارىن ساقتاپ قالۋ ماقساتىندا جۇمىس ىستەمەك.