ۇكىمەت وتىرىسىندا پرەمەر-مينيستر جۇمىسشى ماماندىقتارى ءۇشىن كادر دايارلاۋ ساپاسىن ارتتىرۋ بويىنشا قابىلدانىپ جاتقان شارالاردىڭ جەتكىلىكسىز ەكەنىن اتاپ ءوتتى. وسى باعىتتاعى جۇمىستاردىڭ نەگىزگى مىندەتتەرى بەلگىلەندى, دەپ حابارلايدى Egemen.kz.
ايتا كەتەيىك, 2024 جىلى بيۋدجەت ەسەبىنەن كوللەدجدەرگە 142,5 مىڭ ستۋدەنت قابىلدانعان. بۇل 2023 جىلمەن سالىستىرعاندا 1,5 ەسەگە كوپ ەكەنى حابارلاندى.
ۇكىمەت باسشىسى ۋنيۆەرسيتەتتەر مەن كوللەدجدەردىڭ ءبىلىم بەرۋ باعدارلامالارى اراسىنداعى ساباقتاستىقتى قامتاماسىز ەتۋ كەرەك ەكەنىن ايتتى.
«حالىقارالىق سالالىق ستاندارتتار مەن سەرتيفيكاتتاۋدى بەلسەندى تۇردە ەنگىزۋ قاجەت. ول ءۇشىن وقۋ-اعارتۋ مينيسترلىگى جۇمىستىڭ ساپاسىنا تاۋەلسىز باعالاۋ جۇرگىزۋى كەرەك. سونداي-اق تەحنولوگيالىق كوشباسشىلاردى ايقىنداي وتىرىپ, كوللەدجدەردى كاسىبي بەيىمدەۋ مەن سارالاۋدى اياقتاۋى قاجەت», دەدى ولجاس بەكتەنوۆ.
سونىمەن قاتار سوڭعى جىلدارى كاسىپتىك تەحنيكالىق ءبىلىم بەرۋ جۇيەسىن دامىتۋدا بىرقاتار پروگرەسسيۆتى قادامدار جاسالعان, اتاپ ايتقاندا, كوللەدجدەر جۇمىسشى ماماندىقتارى بويىنشا تەگىن وقىتىپ, ستۋدەنتتەرىنىڭ ستيپەنديالارى 50%-عا وسكەن. سونداي-اق كادرلار دايارلاۋعا ارنالعان مەملەكەتتىك تاپسىرىس كولەمى ايتارلىقتاي ۇلعايدى. ماسەلەن, بۇعان دەيىن كوللەدجدەرگە بيۋدجەت ەسەبىنەن جىل سايىن 93 مىڭعا جۋىق ستۋدەنت قابىلدانىپ كەلسە, 2024 جىلى ولاردىڭ سانى 142,5 مىڭعا دەيىن جەتكەن.