دارحان جازىقباي جەتىسۋ وبلىسىنىڭ تۇرعىندارىمەن كەزدەستى

وبلىس اكتيۆىمەن كەزدەسۋدە دارحان جازىقباي مەملەكەتتىك قىزمەتتى جاڭعىرتۋعا قاتىستى مەملەكەت باسشىسى العا قويعان مىندەتتەردى جۇزەگە اسىرۋ اياسىندا اتقارىلىپ جاتقان ءىس-شارالار جايىندا ايتتى. ولار مەملەكەتتىك اپپاراتتى بيۋروكراتيادان ارىلتۋدى, ونى ادامعا باعدارلانعان سەرۆيستىك سيپاتتا دامىتۋدى, مەملەكەتتىك قىزمەتكە كىرۋدى بارىنشا اشىق ەتۋدى, جاستاردىڭ جانە جەكە سەكتورداعى كاسىبي مامانداردىڭ مەملەكەتتىك قىزمەتكە كەلۋىن جەڭىلدەتۋدى قامتيدى.

اگەنتتىك توراعاسى وتاندىق مەملەكەتتىك قىزمەتتى دامىتۋدىڭ 2024-2029 جىلدارعا ارنالعان تۇجىرىمداماسى قابىلدانىپ, ونىڭ قولدانىستاعى جۇيەنى زامان تالاپتارىنا ساي جەتىلدىرۋگە باعىتتالعانىن ايتتى. ول سالاداعى جاڭاشىلدىقتار پرەزيدەنت اتاپ كورسەتكەن «ادام مەملەكەت ءۇشىن ەمەس, مەملەكەت ادام ءۇشىن» دەگەن ىرگەلى قاعيدانى نەگىزگە الا وتىرىپ جۇزەگە اسىرىلىپ جاتقانىن اتاپ ءوتتى.

«بارشاعا تەڭ مۇمكىندىكتەر تۋدىراتىن ادىلدىك ءپرينتسيپىن نەگىزگە الۋ جانە ادال, اشىقبولۋ مەملەكەتتىك قىزمەتشىلەر ءۇشىن باستى ۇستانىمعا اينالۋ قاجەت. مەملەكەت باسشىسىنىڭ قازاقستان حالقىنا جولداۋىنداعى«كەز كەلگەن ءىستىڭ باستى ولشەمى تيىمدىلىك بولۋعا ءتيىس. ياعني, ءاربىر شەشىم, ءاربىر جوبا ەڭ الدىمەن ەلگە پايدالى بولۋى قاجەت» دەگەن ءسوزىن مەملەكەتتىك قىزمەتشىلەر ءوز قىزمەتىندە نەگىزگى باعدارعا الۋى ءتيىس», دەدى مقىا توراعاسى.

ساپار اياسىندا دارحان جازىقباي وبلىس بويىنشا بيىل وڭىرلىك كادر رەزەرۆىنە ىرىكتەلگەن جاستارمەن ارنايى كەزدەستى. ول رەزەرۆكە ىرىكتەۋ ءاربىر وڭىردە تىڭ وزگەرىستەردى ىسكە اسىرۋعا قابىلەتتى جاس باسقارۋشىلاردىڭ پۋلىن قالىپتاستىرۋعا باعىتتالعانىن جانە ولارعا ۇلكەن جاۋاپكەرشىلىك جۇكتەيتىنىن ايتىپ, الدا اتقارار جۇمىستارىنا ساتتىلىك تىلەدى.

سونداي-اق دارحان جازىقباي قاراتال جانە كەربۇلاق اۋداندارىنىڭ حالىققا قىزمەت كورسەتۋ ورتالىقتارىندا بولىپ, مەملەكەتتىككورسەتىلەتىن قىزمەتتەردىڭ ساپاسىمەن تانىستى. ايتا كەتۋ كەرەك, جەتىسۋ وبلىسىندا اعىمداعى جىلدىڭ 1 جارتىجىلدىعىندا 2,5 ملن. استام مەملەكەتتىك قىزمەت كورسەتىلىپ, ونىڭ 98,4%-ى ەلەكتروندىق نىساندا ۇسىنىلعان. 2023 جىلى مەملەكەتتىك قىزمەت كورسەتۋ ساپاسىنىڭ قوعامدىق مونيتورينگىنىڭ ناتيجەلەرى بويىنشا جەتىسۋ وبلىسى رەسپۋبليكا بويىنشا 9-ورىندى يەلەنگەن.

جۇمىس ساپارى بارىسىندا دارحان جازىقباي وبلىستىق «Jetisu» تەلەارناسىنا مەملەكەتتىك قىزمەتتى دامىتۋدىڭ جاڭا تۇجىرىمداماسىنىڭ نەگىزگى باعىتتارى مەنولاردى جۇزەگە اسىرۋ شارالارى تۋرالى سۇحبات بەردى.