كاسىپورىن ىشكى سۇرانىستى تولىق وتەيدى

سۇرانىس باعىتى سۇرىپتاۋدان اڭعارىلادى

فابريكا تاياۋدا 135 مىڭ تاۋىعىن ەتكە جىبەرىپ, ءبىر تاۋلىك ىشىندەگى ءونىم كولەمىن 500 مىڭعا دەيىن ازايتتى. مۇنىڭ ءوز قايتارىمى بار, وندىرىستە مەكيەندەردى وسىلاي جاڭارتىپ, اۋىستىرىپ وتىرامىز دەيدى كاسىپورىن مامان­دارى. قۇس فابريكاسى شىعارىپ جات­قان ءونىمنىڭ شامامەن 60 پايىزى – ءبىرىنشى ساناتقا جاتادى. س2 سۇرىپ­تى جانە ىرىكتەلگەن جۇمىرتقالار بىر­دەن ساۋداعا شىعارىلادى. كاسىپورىن بۇل سا­ناتتاعى ءونىمىنىڭ ءبىراز بولىگىن رەسەي, قىر­عىزستان, اۋعانستان ەلدەرىنە جونەلتەدى.

«جاس قانات» تاۋلىگىنە ىشىندە بىر­نەشە سارىۋىزى بار 5 مىڭداي جوعارى سۇرىپتى جۇمىرتقا شىعارادى. ءۇشىن­شى سۇرىپقا جاتاتىن ەڭ ۇساق جۇمىرت­قالاردى كونديتەرلىك تسەحتار ساتىپ الىپ, قامىر يلەۋگە پايدالانادى نەمەسە ۇنتاق جاساۋعا جاراتادى.

وندىرىستىك تسەحتان شىققان جۇمىرت­قا ەڭ الدىمەن اناكوندانىڭ (كونۆە­يەر) بويىمەن جىلجىپ وتىرىپ, سۇرىپ­تاۋ تسەحىنا كەلىپ تۇسەدى. جۇمىرتقا وسى جەردە سۇرىپتالىپ, تازارتىلادى, سون­داي-اق ءسال جارىلعان ءونىم دە جەكە ءبولىنىپ الىنادى.

ودان ءارى كوزگە كورىنبەيتىن سىزاتى بار-جوعىن تەكسەرۋ ءۇشىن وۆوسكوپقا كەلىپ تۇسەدى. سودان كەيىن مەمستاندارتقا سايكەس جوعارعى, ىرىكتەلگەن, ءبىرىنشى, ەكىنشى, ءۇشىنشى سۇرىپقا بولىنەدى.

ءبىر اۋىسىمدا جەلىنىڭ بويىندا 13-15 ادام تۇرادى. جۇمىسشىلار جۇ­مىرت­قانى الدىمەن قولمەن سۇ­رىپ­تاپ الادى. ودان كەيىنگى شارۋانى اۆتومات تىندىرادى.

«قاي جۇمىرتقانىڭ قانداي سا­ناتقا جاتاتىنىن كوزبەن-اق انىق­تاي الامىن. ءبىزدىڭ تۇتىنۋشىلار كوبىنە ءىرى ءارى ىشىندە بىرنەشە سارىۋىزى بار جۇمىرتقالاردى تاڭدايدى. ال اۋعانستاندىق تۇتىنۋشىلار ارا­سىن­دا كەرىسىنشە, مايدا جۇمىرت­قالار جوعارى سۇرانىسقا يە. مايدا جۇ­مىرت­قادا اعزاعا پايداسى مول زاتتار كوبىرەك بولادى», دەيدى سۇرىپ­تاۋشى اناستاسيا رۋزاۆينا.

وندىرىستىك تسيكلدىڭ وزىندىك ەرەكشەلىگى بار

تولىق اۆتوماتتاندىرىلعان جەلى­دەگى جاپون قۇرىلعىسى جۇمىرت­قانىڭ سالماعىن انىقتاپ, سوعان وراي ساناتىن اجىراتىپ, ءۇش-ءتورت تارامعا ءبولىنىپ كەتەتىن تاسپا جول­دارعا سۇرىپتاپ سالىپ وتىرادى. سىرتتاي قاراعان ادامعا ءار جۇمىرت­قا ءوز تەڭىن ءوزى ىزدەپ تاۋىپ, باسقا­لار­دان ءبولىنىپ, ءوز جوندەرىمەن كەتىپ جاتقان سياقتى بولىپ كورىنەدى. سۇ­رىپ­تاۋ قۇرىلعىسىنىڭ وپەراتورى ۆيتالي مىتكين تەك وسى ءبىر قىزىق كورىنىستى سىرتتاي تاماشالاپ, تەحنيكانىڭ جۇمىسىن باقىلايدى. كەيدە الدەنەلەردى شۇقىلاپ, رەتكە كەلتىرىپ قويادى.

سۇرىپتاۋدان وتكەن جۇمىرتقا 10-30 ورىندىق ۇياشىقتارىنا قونىپ, قويماعا اتتانادى. قويماداعى اۋا تەم­پەراتۋراسى 16-18 گرادۋستان اسپايدى. ءونىم وسى جەردەن جۇك كولىك­تە­رىنە تيەلىپ, ساتىلىمعا جىبە­رىلەدى.

«قۇس ابدەن بابىنا كەلگەندە كۇنىنە 700 مىڭعا دەيىن, ال جاي كەزدەرى 450-500-گە دەيىن ءونىم وندىرىلەدى. قازىر توعىزىنشى تسەحتى سويۋعا جىبەرەمىز. سايكەسىنشە, ءونىم كولەمى دە 10 مىڭعا كەميدى. بۇلاردىڭ ورنىن باساتىن بالاپانداردى تەحنولوگيالىق كەستەگە سايكەس قىركۇيەكتە وتىرعىزامىز دا, جەلتوقسانعا قاراي تاۋلىگىنە 700 مىڭ جۇمىرتقا وندىرۋگە قايتا كوشەمىز. ادەتتە, ءبىر مەكيەن 60 كۇن جۇمىرتقالايدى. ودان كەيىن جۇمىرتقاسى ازايا باستاعاندا سويۋعا جىبەرەمىز. ءبىر تاۋلىك بولعان بالاپاندى الدىمەن قۇس ءوسىرۋ الاڭىندا باعىپ, 99 كۇننەن كەيىن كۇركەگە وتىرعىزامىز. ول بالاپان 130 كۇن وتكەن سوڭ جۇمىرتقا بەرە باستايدى. بىزدە كۇندەلىكتى بالاپاندار جاس ءوسۋ ايماعىندا وتىرعىزىلادى, 99 كۇندە ۇيگە قونىس اۋدارىلادى. 130 كۇننەن باستاپ قۇس جۇمىرتقا بەرە باستايدى. الدىمەن بۇل C1, C2, C3 ساناتىنداعى جۇمىرتقالاردى بەرەدى. قۇس وسكەن سايىن, جۇمىرتقا كولەمى دە ۇلعايا بەرەدى. قۇس نە­عۇرلىم جاس بولسا, اتالىق بەز سوعۇر­لىم از بولادى», دەيدى كاسىپورىن­نىڭ وندىرىستىك ديرەكتورى دانيار العوجين.

ءونىمنىڭ 10 پايىزى شەتەلگە ساتىلادى

فابريكادا 9 وندىرىستىك تسەح, 5 قۇس ءوسىرۋ الاڭى جۇمىس ىستەپ تۇر. مۇنداعى 1 قۇس ءوسىرۋ الاڭىنا 135 مىڭ بالاپان جىبەرىلەدى. بالاپاندار مەن جۇمىرتقالايتىن مەكيەندەر «تەحنو» فيرماسىنىڭ تورلى باتارەيالارىنا قوناقتايدى. قۇستاردىڭ جەيتىن جەمى, ىشەتىن سۋى, كۇركەنىڭ اۋاسى تۇگەلدەي ونلاين رەجىمدە باقىلانادى. قۇس ىشەتىن سۋ ارنايى تۇتىكشە ارقىلى كەلىپ تۇرادى. كاسىپ­ورىن اۋماعىندا ەكى شىڭىراۋ قۇدىق بار. قۇدىقتاعى سۋ الدىمەن سۇزگىلەۋ جۇيەسىنە وتكىزىلىپ, سودان سوڭ قۇستارعا جىبەرىلەدى.

كاسىپورىن رەسەيدىڭ سۆەردلوۆ اسىل تۇقىمدى قۇس زاۋىتىنان جىلىنا 700 مىڭ بالاپان اكەلىپ, مەكيەندەرىن جاڭارتىپ وتىرادى. سويىلعان قۇستىڭ ەتى ساتىلىپ كەتەدى. الاي­دا ونى جەرگىلىكتى دۇكەندەر ەمەس, الىس-جاقىن ەلدەردەگى قۇس ەتىن وڭدەيتىن كاسىپورىندار ساتىپ الادى. دانيار العوجيننىڭ ايتۋىن­شا, فابريكادا وسەتىن قۇستار اسا ءىرى ەمەس, ءتىرى سالماعى 1 700 گر بولادى. سويىلعان سوڭ ولاردىڭ دەنى ەكسپورتقا جونەلتىلەدى. قۇس ەتىن وڭدەۋشىلەر ودان كوبىنە تارتىلعان ەت, شۇجىق جاساپ شىعارادى.

كاسىپورىن باسشىلارىنىڭ سوزىن­­­شە, بۇگىندە وڭىردە جۇمىرتقا ءونى­­مىنىڭ كولەمى حالىق سۇرانىسىن تولىقتاي قامتىپ وتىر.

«ەلىمىزدە جۇمىرتقا باعىتىن­داعى 34 قۇس فابريكاسى بار. بۇل كاسىپ­ورىن­دار بىلتىر 3,6 ملرد جۇمىرتقا شىعاردى. ءبىز ەل تۇرعىندارىنىڭ سۇ­رانىسىن 100 پايىزعا ءوندىرىپ وتىرمىز. مۇنىڭ سىرتىندا, ءونىم ەكسپورتتاپ جاتىرمىز. ماسەلەن, قازىر ءبىزدىڭ ءونىمنىڭ 10 پايىزى شەتەلگە ساتىلادى. ارينە, شەشىلمەي جاتقان ماسەلەلەر دە جوق ەمەس, بىراق ءبىز ولاردى بىرتە-بىرتە ەڭسەرۋگە, تىعىرىقتان شىعاراتىن جول ىزدەپ تابۋعا توسەلىپ الدىق», دەيدى «جاس قانات-2006» كومپانياسىنىڭ باس ديرەكتورى قايرات مايىشەۆ.

قوستاناي وبلىسى