قازاق سپورت جانە تۋريزم اكادەمياسى پاريج وليمپياداسىنىڭ كۇمىس جانە قولا جۇلدەگەرلەرىنە تەگىن گرانت بەردى, دەپ حابارلايدى Egemen.kz.
ايتا كەتەرلىگى, پاريج وليمپياداسىندا ەل قورجىنىنا تۇسكەن جەتى مەدالدىڭ بەسەۋىن اكادەميا تۇلەكتەرى يەلەنگەن. وسىعان بايلانىستى وقۋ ورنى وليمپيادا جۇلدەگەرلەرىن 1-كۋرس ستۋدەنتتەرىمەن كەزدەسۋگە شاقىرعان.
بۇل ءبىلىم ورداسى ءۇشىن ۇلكەن مارتەبە ءارى ماقتانىش. سوندىقتان دەمەۋ جادىراەۆ, ناريمان قۇربانوۆ, عۇسمان قىرعىزباەۆ, نازىم قىزايباي, يسلام ساتباەۆ سىندى سپورتشىلاردىڭ ەسىمدەرى ەندى ءبىلىم ورداسىنىڭ وليمپيادا جۇلدەگەرلەرى ستەند تاقتاسىنا التىن ارىپپەن جازىلادى. ەل ماقتانىشىنا اينالعان سپورتشىلارىمىز وقۋعا ەندى قابىلدانعان 1-كۋرس ستۋدەنتتەرى مەن وزگە دە ءىزباسارلارىنا اقىل-كەڭەستەرىن ايتىپ, ۇلكەن موتيۆاتسيا بەردى, - دەپ جازدى اكادەميا ءوز پاراقشاسىندا.
ال قازاق سپورت جانە تۋريزم اكادەمياسىنىڭ پرەزيدەنتى قايرات زاكيريانوۆ پاريج وليمپياداسىنىڭ جۇلدەگەرلەرى دەمەۋ جادىراەۆقا دوكتورانتۋرادا, ناريمان قۇربانوۆ پەن عۇسمان قىرعىزباەۆقا ماگيستراتۋرادا تەگىن ءبىلىم الۋعا مۇمكىندىك بەرەتىن اكادەميا گرانتىن تابىستاعان.
پراكتيكا جۇزىندە بىلگەن-تۇيگەنىمىزدى ەندى تەوريامەن ۇشتاستىرۋعا, عىلىمي تۇرعىدا ىزدەنۋگە مۇمكىندىك بەرگەن, ءوزىم وقىعان اكادەميا باسشىلىعىنا ريزاشىلىعىمىزدى بىلدىرەمىز. ال ارتىمىزدان ەرىگەن جاس ورەندەرگە ساتتىلىك تىلەيمىز. العا قويعان ماقساتتارىڭا جەتۋدەن ەشقاشان شارشاماڭدار, - دەدى وليمپيادانىڭ كۇمىس جۇلدەگەرى دەمەۋ جادىراەۆ.
ەستەرىڭىزگە سالا كەتەيىك, جازعى پاريج وليمپياداسىندا گرەك-ريم كۇرەسىنەن دەمەۋ جادىراەۆ «كۇمىس», سپورتتىق گيمناستيكادان ناريمان قۇربانوۆ «كۇمىس», ال عۇسمان قىرعىزباەۆ دزيۋدودان «قولا» مەدال جەڭىپ الدى.