وليمپيادا ويىندارىنىڭ كۇمىس جۇلدەگەرى, بوكسشى نۇربەك ورالبايدى جامبىل وبلىسىنىڭ جۇرتى قۇرمەتپەن قارسى الىپ, سۋ جاڭا كولىك سىيلادى, دەپ حابارلايدى Egemen.kz.
سالتاناتتى ءىس-شارادا ءوڭىر باسشىسى ەربول قاراشوكەەۆ جەرلەستەرىنىڭ اتىنان بىلعارى قولعاپ شەبەرىن وليمپيادا ويىندارىنداعى كۇمىس جۇلدەسىمەن قۇتتىقتادى.
«نۇربەك ءتورت جىلدىڭ باستى دودالارىندا ابىرويمەن ونەر كورسەتىپ, حالىقتىڭ جوعارى سەنىمىن اقتادى. قاسيەتتى اۋليە-اتا – ەلىمىزدىڭ سپورتتىق الەۋەتىن ايعاقتايتىن ەرەكشە ءوڭىر. الەمدىك ارەنادا قازاقستان نامىسىن قورعاپ جۇرگەن سپورتشىلاردىڭ دەنى جامبىل وبلىسىنىڭ تۋمالارى. جامبىل – چەمپيونداردىڭ تۋعان جەرى, مىقتى باپكەرلەردىڭ ورداسى», دەپ اتاپ ءوتتى ءوڭىر باسشىسى سپورتشىنىڭ اتا-اناسى مەن باپكەرىنە ريزاشىلىعىن ءبىلدىرىپ. سونىمەن قاتار ەربول قاراشوكەەۆ وليمپيادا جۇلدەگەرىنە دەمەۋشىلەر ەسەبىنەن ساتىپ الىنعان Hyundai Sonata اۆتوكولىگىنىڭ كىلتىن تابىس ەتتى.«تۋعان جەرىمىز جامبىل وبلىسىنا كەلدىك. ىستىق ىقىلاسپەن كۇتىپ الىپ, قولداپ جاتقاندارىڭىزعا راحمەت. ۇلكەن بەلەستەر الدا, مۇنىمەن توقتامايمىز. كەلەسى وليمپيادا ويىندارىندا قازاق ەلىن قۋانتامىن دەپ ويلايمىن», دەدى نۇربەك ورالباي.
ايتا كەتەيىك, سالتاناتتى ءىس-شارادا وبلىستىق ءماسليحاتتىڭ توراعاسى ابدالى نۇراليەۆ, جامبىل وبلىسىنىڭ سپورت ارداگەرلەرى كەڭەسىنىڭ توراعاسى تاۋىربەك قاراۋىلتەگى, قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى دامير بۋدانبەكوۆ تە ءسوز سويلەدى.
ەسكە سالا كەتەيىك, وسىعان دەيىن استانا قالاسىنىڭ اكىمى جەڭىس قاسىمبەك نۇربەك ورالبايعا Land Rover Defender اۆتوكولىگىنىڭ كىلتىن, ال جاتتىقتىرۋشىسى اسقار ەركەباەۆقا 10 ملن تەڭگەنىڭ سەرتيفيكاتىن تابىستاعان ەدى.