قازاق بوكسىنا تۇبەگەيلى وزگەرىس قاجەت - باقىت سارسەكباەۆ

– باقىت ءابدىراحمان ۇلى, كەيىنگى كەزدەرى قازاق بوكسىن ءجيى سىناپ ءجۇرسىز. 2021 جىلى توكيو, 2024 جىلى پاريجدە وتكەن وليمپيا ويىن­دارىنداعى ناتي­جەمىزدىڭ تومەن بولاتىنىن الدىن-الا بولجاعان ەدىڭىز. سول سوزدەرىڭىز اقي­قاتقا اينالدى. وسىنىڭ بارلىعىن نەگە سۇيەنىپ ايتتىڭىز؟

– وسى ساپانىڭ كاسىبي مامانى جانە وتاندىق بوكسقا جۇرەگى اۋىرىپ, جانى اشيتىن ازامات رەتىندە بارلىق جاعدايدى سىرتتاي بايقاپ, باقىلاپ جۇرگەن جايى­م بار. ءار جارىستى ءجىتى قاداعالاي وتىرىپ, وزەكتى ماسەلەلەردى وي ەلەگىنەن وتكىزىپ, اقىل تارازىسىنا سالامىن. سودان ءتيىستى قورىتىندى شىعاردىم. ونىڭ ۇستىنە, سپورتتىڭ بۇل ءتۇرىنىڭ ىشكى «كۋحنياسىن» جاقسى بىلەمىن. كىمنىڭ جانىن سالىپ ەڭبەكتەنگەنى نەمەسە كىمنىڭ تەك قاراقان باسىنىڭ قامىن كۇيتتەپ جۇرگەنى ءمالىم. ۋاقىت وزعان سايىن قازاق بوكسىنىڭ قۇلدىراپ بارا جاتقانىن كورگەننەن سوڭ باق وكىلدەرى مەن الەۋمەتتىك جەلىلەر ارقىلى وي-پىكىرىمدى ءبىلدىردىم. ونى مەنىڭ جانايقايىم دەسە دە بولادى. وزدەرىڭىز بايقاعانداي, بۇل جەردە ەشبىر داقپىرت جوق, ايتقانىمنىڭ بارلىعى دا دالەلدەندى.

– وسىدان ءۇش جىل بۇرىن كۇنشىعىس ەلىندە قوس قولاعا عانا قولىمىز جەتتى, بيىل فرانتسيانىڭ باس شاھارىندا جالقى كۇمىستى قاناعات تۇتتىق. اري­نە, بۇل ناتيجەگە كوپشىلىكتىڭ كوڭىلى تول­ماعانى انىق. سوندا قازاق بوكسى­نىڭ قۇلدىراۋىنىڭ سەبەبى نەدە دەپ ويلايسىز؟

– فەدەراتسيا تاراپىنان دۇرىس جۇمىس جۇرگىزىلمەيدى. قالىپتاسقان جاقسى ءبىر جۇيە, ورتاق ماقسات جوق. ۇلتتىق قۇرا­مانىڭ باپكەرلەر قۇرامى ناشار. وبلىستىق ۇيىمدار قول قۋسىرىپ وتىر. ەشكىم ەشنارسەگە باس قاتىرعىسى كەلمەيدى. بۇل سالانىڭ بۇرىنعى باسشىلىعى تۇسىندا ءار ءوڭىردىڭ فەدەراتسياسى ءبىر-بىرىمەن جارىسا جۇمىس ىستەپ, ناتيجە شى­عارۋعا تالپىناتىن ەدى. ارقايسىنىڭ ءوز دەمەۋشىلەرى بولاتىن. جاتتىقتىرۋشىلار لايىقتى جالاقى الىپ, بوكسشىلاردى ىنتالاندىرۋ جاعى دا نازاردان تىس قالمايتىن. قازىرگى جاعداي مۇلدەم باسقا. كوپتەگەن وبلىستان تەگەۋرىندى بىلعارى قولعاپ شەبەرلەرى شىقپاي جاتىر. كەيبىر جەرلەردەگى جاعداي تىپتەن مۇشكىل. جەر­گىلىكتى فەدەراتسيالاردىڭ دا كوپ نارسەدەن كوڭىلدەرى قالعانعا ۇقسايدى. سەبەبى ۇلتتىق كوماندادا باسەكەلەستىك جوق. وز­دەرىڭىز بايقاساڭىزدار, بايراقتى باسە­كەلەرگە ۇنەمى بەلگىلى ءبىر سپورتشىلار عانا بارادى. سول ساناۋلى عانا بوكسشىنى ءار جارىسقا تىقپالاي بەرەمىز. ونىڭ قاجەتى بار ما, جوق پا, ونى ويلاپ جاتقان ەشكىم جوق. ال شىنايى باسەكەلەستىك بولماعان جاعدايدا كورسەتكىشتىڭ دە قۇلدىرايتىنى بەلگىلى. ەلىمىزدىڭ ءبىرىنشى ءنومىرلى بوكس­شىلارى ولاردىڭ وكشەلەپ كەلە جاتقان جۋان جۇدىرىقتى جىگىتتەردىڭ بارىن ءار كۇن سايىن سەزىنۋى كەرەك. سوندا ەشكىم بوساڭسىمايدى, بارلىعى دا ۇنەمى بابىندا جۇرەدى. وسى جاعدايدى فەدەراتسيا باسشىلىعى مەن باس باپكەر ءوز باقىلاۋلارىندا ۇستاپ, ۇنەمى قاداعالاپ وتىرۋعا ءتيىس. بىراق ۇلتتىق قۇرامانى جاتتىقتىرىپ جۇرگەن باپكەرلەر تاراپىنان ونداي ءىس-قيمىل بايقالمايدى.

– كۇنى كەشە عانا اياقتالعان پا­ريجدەگى ويىندارعا كەڭىرەك توق­تالساق. ءار بوكسشىعا جەكە-جەكە باعا بەرە كەتسەڭىز؟

– ەلىمىزدىڭ بوكسشىلارى تورتجىل­دىقتىڭ باستى دوداسىنا ەش دايارلىقسىز بارعانداي اسەر قالدىردى. جىگىتتەردىڭ فيزيكاسى ناشار, تەحنيكالارى ءالسىز. ءار بوكسشىنىڭ سويىپ تۇسىرەتىندەي وىنە ءتان  سويقان سوققىسى بولۋعا ءتيىس. مەن ونى باي­قامادىم. سوققىلار كومبيناتسياسىن مۇلدەم كورمەدىم. باسەكە بارىسىندا جەرلەستەرىمىز قولدارىن ءبىر-ەكى رەت سىلتەۋمەن عانا شەكتەلەدى. ودان ارىگە بارمايدى. قارىمتا شابۋىل دۇرىس ۇيىمداستىرىلمايدى. تۇتقيىلدان سوق­قى جاساۋ دەگەن مۇلدەم جوق. ءار ەپيزودتا قانداستارىمىزدىڭ قانداي ارەكەتكە باراتىنىن قارسىلاستارى الدىن-الا ءبىلىپ وتىرعانداي. جاقىن قاشىقتىقتا جۇمىس ىستەي المايدى. فۋنكتسيونالدىق دايىندىقتارى ناشار, كوبى ءبىرىنشى راۋندتان كەيىن-اق بولدىرىپ قالادى. الەكساندر حيجنياكقا قارسى كەزدەسۋدە نۇربەك ورال­باي سونداي قاتەلىككە ۇرىندى. شى­نى كەرەك, 80 كگ سالماقتىڭ فينالى وتە شيەلەنىستى وتەتىن شىعار دەپ ويلادىق. ول ءۇمىت اقتالمادى. مۇحامەدسابىر بازارباي ۇلىنىڭ جەڭىسكە دەگەن تالپىنىسى ۇنادى. بىراق ونىڭ دا مۇمكىندىگى شەكتەۋلى. ودان دا جاقسى ناتيجە كورسەتۋگە جاس جىگىتتىڭ شاما-شارقى جەتپەدى. باسقا  بوكسشىلار دا جىگەر كورسەتپەدى. سونىڭ بارلىعى دا وقۋ-جاتتىعۋ جيىندارىنىڭ دۇرىس وتكىزىلمەگەندىگىنىڭ سالدارى.

سۋرەتتى تۇسىرگەن – تۇرار قازانعاپوۆ

– ءسىزدىڭ ويىڭىزشا تورەشىلەر تاراپىنان بۇرا تارتۋ نەمەسە بۇرمالاۋ فاكتىلەرى بولدى ما؟

– جوق. پاريجدە ەشبىر بوكسشىعا كوپە-كورنەۋ قيانات جاسالعان جوق. تورەلىك ءادىل بولدى.

– اتالعان جارىستا بەس بىردەي باس جۇلدەنى ولجالاعان وزبەكستان قۇراماسى جارىس كەستەسىندە جەكە-دارا كوش باستادى. وسىدان سەگىز جىل بۇرىن ريو وليم­پياداسىندا دا ولار الدارىنا جان سال­­ماعان ەدى. ولار بۇل بيىككە قالاي جەت­تى دەپ ويلايسىز؟

– تولاعاي تابىس پەن مول ولجا ەش­كىمگە وڭايلىقپەن كەلمەيتىنى بارشاعا ءمالىم. وعان تەك اقىل, كۇش جانە ەڭبەكپەن قول جەت­كىزۋگە بولادى. بۇل بيىككە ولار وزدەرىنىڭ ەڭبەكقورلىعى مەن وجەتتىگى ارقاسىندا كوتەرىلدى. وزبەكستاندىق باپ­كەرلەردىڭ اۋىزبىرشىلىگى دە مىقتى. كورشى مەملەكەتتىڭ ماماندارى ورتاق ماقساتقا قول جەتكىزۋ ءۇشىن اركەز ءبىر-ءبىرىن قولداپ, قولپاشتاپ جۇرەدى. قازىر سونىڭ جەمىسىن كورىپ وتىر. ءسوز ورايى كەلگەندە, باسەكەگە قابىلەتتى جاقسى كوماندا جاساقتاپ, وزبەك بوكسىن وراسان زور بيىككە كوتەرگەن ۇلتتىق قۇرامانىڭ باس باپكەرى تولقىن قىلىشەۆتىڭ دە ەرەن ەڭبەگىن ەرەكشە اتاپ وتۋگە ءتيىسپىز.

– ءسىز كەزىندە وزبەكستان قۇراما كومانداسى ساپىندا ونەر كورسەتتىڭىز. ەكى ەل اراسىنداعى جاتتىعۋ ۇدەرىسىندە قانداي ايىر­ماشىلىق بار؟

– ايىرماشىلىق كوپ. ولار نەگىزىنەن بۇرىننان فيزيكالىق دايىندىققا كوپ كوڭىل بولەتىن. سونىڭ ارقاسىندا بوكسشىلار باسەكەنى باسىنان اياعىنا دەيىن ءبىر دەممەن وتكىزەدى. شارشاپ, شالدىعۋ دەگەندى بىلمەيدى. كەيىنگى كەزدەرى كورشىلەرىمىزدىڭ تەحنيكانى ارتتىرىپ, تاكتيكالىق شەبەرلىكتى شىڭداۋعا باسا نازار اۋدارىپ جۇرگەنى باي­قالادى. ءار قارسىلاسقا جەكە-جەكە دايىندالادى. ءۇزىلىس كەزىندە سەكۋندانتتار ءوز شاكىرتتەرىنە دۇرىس باعىت-باعدار بەرىپ, ۇنەمى جىگەرلەندىرىپ وتىرادى. وسى جاعى ماعان ۇنايدى. نەگىزى مەن وزبەكستاندا دۇنيەگە كەلىپ, ايگىلى شىرشىق بوكس مەكتەبىندە بۇل ونەردىڭ قىر-سىرىنا قانىقتىم. جەتى رەت وزبەكستاننىڭ چەمپيونى اتانىپ, ازيا چەمپيوناتىندا باس جۇلدەنى ولجالادىم. ازيا-افريكا ويىندارىندا توپ جاردىم. دەسەك تە ناعىز كاسىبي بوكس­شى رەتىندە ەلىمىزدە قالىپتاستىم دەۋ­گە تولىق نەگىز بار. اتاقتى الەكساندر اپاچينسكي مەن دامير بۋدانبەكوۆتەن كوپ نارسە ۇيرەندىم. 2008 جىلى بەيجىڭ وليمپياداسىندا اتوي سالعانىمدا قوس مايتالمان ماعان دۇرىس باعىت-باعدار بەرىپ, ءار جەكپە-جەكتە جەڭىسكە جەتۋىمە سۇبەلى ۇلەس قوستى. ول كەزدە قازاق بوكس مەكتەبىنىڭ داڭقى دۇركىرەپ تۇردى.

– وزبەكستان بوكسىن جاڭا بەلەسكە كوتەرگەن تولقىن قىلىشەۆپەن بىرگە وقىعان ەكەنسىز. ول ازامات تۋرالى نە ايتاسىز؟

– ءيا, تولقىن ەكەۋمىز ءجاسوسپىرىم كەزدەن تانىسپىز. ول – بىلىكتى مامان, مىقتى ستراتەگ. كەزىندە قىلىشەۆ شىرشىق بوكس مەكتەبىن ۇلتتىق دەڭگەيگە كوتەرسە, قازىر ول الەمدىك ارەنادا وزبەك بوكسىنىڭ ابىرويى­ن اسقاقتاتىپ ءجۇر.

– قازاق بوكسىن تىعىرىقتان قالاي شىعارۋعا بولادى؟ ول ءۇشىن نە ىستەۋ كەرەك؟

– قازاق بوكسىنا تۇبەگەيلى رەفورما قاجەت. بۇعان دەيىنگى باپكەرلەر تاراپىنان ورىن العان ولقىلىقتىڭ ورنىن تولتىرىپ, قايتا قالپىنا كەلتىرۋ ءۇشىن كەمىندە ەكى وليمپيادالىق تسيكل كەرەك-اۋ. ءبىرىنشى كەزەكتە بىزگە قاراقان با­سىنىڭ عانا قامىن ويلايتىندار ەمەس, وسى ونەرگە شىن جانى اشيتىن پاتريوتتار, ءوز ءىسىنىڭ ناعىز بىلگىرلەرى مەن كاسىبي ماماندار قاجەت. سوندا عانا قازاق بوكسىنىڭ ەكىنشى تىنىسى اشىلىپ, ول الەمدەگى ۇزدىك كوماندالاردىڭ قاتارىنا قايتا قوسىلادى. بۇل ماقساتقا قول جەتكىزۋ ءۇشىن ءبىراز ۋاقىت كەرەك.

– كەيىنگى كەزدەرى كوپشىلىك نازارىنان تىس قالدىڭىز. كوپ جارىستا ءسىزدى جولىقتىرا بەرمەيمىز. سوعان قاراعاندا شەتەلدە جۇرگەن سەكىلدىسىز...

– ءيا, ءدال سولاي. ءبىراز ۋاقىتتان بەرى ۆەتنامدا ەڭبەك ەتىپ جۇرگەن جايىم بار. ناقتىلاپ ايتسام, بوكستان حانوي قالاسى قۇراما كومانداسىنىڭ كەڭەسشى-باپكەرىمىن. بۇل جاقتا دا جامان جۇمىس ىستەپ جاتقان جوقپىن. مەنىڭ شاكىرتتەرىم بيىلعى ۆەتنام چەمپيوناتىندا 2 التىن, 3 كۇمىس جانە 3 قولا مەدالدى يەلەنىپ, جالپى كوماندالىق ەسەپتە ەكىنشى ورىندى ولجالادى. 8,5 ميلليون تۇرعىنى بار استانالىق بوكسشىلار اتالعان جارىس­تا بۇرىن-سوڭدى بىردە-ءبىر رەت وسىنداي بيىككە كوتەرىلگەن ەمەس. وسىلاي قازىرگى كەزدە ءۇندى-قىتاي تۇبەگىندە ەڭبەك ەتىپ ءجۇرمىن.

– جۋىردا وتاندىق ءبىر سايت «بوكستان قازاقستان ۇلتتىق قۇراماسىنىڭ باس باپ­كەرى بولۋعا كىم لايىق؟» دەگەن تاقىرىپتا ساۋالداما جۇرگىزدى. سوندا كوپ­شىلىك رەسپۋبليكامىزدىڭ باس كومانداسىنىڭ تىز­گىنىن باقىت سار­سەك­باەۆ­تىڭ ۇستاعانىن قا­لايتىندارىن ايتتى. باس­شىلىق تاراپىنان قانداي دا ءبىر ۇسىنىس ءتۇسىپ جاتسا, ءسىز كەلىسەسىز بە؟

– وعان قارسى ەمەسپىن. بىراق كوماندانى «ەتى سەنىكى, سۇيەگى بىزدىكى» دەگەن ۇستانىممەن بەرسە عانا قابىلدايمىن. اركىم جۇمىسىما ارالاسىپ, ء«ۇيت, ءبۇيت» دەگەنىن قالامايمىن. تالابىم سول. قازىر ءوزىم دە جۇمىسسىز ەمەسپىن. شەتەلدە جەمىستى ەڭبەك ەتىپ جاتقانىمدى جوعارىدا ايتتىم. ۆەتنامنىڭ سپورت باسشىلارى اتقارعان شارۋالارىما ءدان ريزا. ەڭ باس­تىسى, بۇل جاقتا سىيلىمىن. الايدا قازاق بوكسىنىڭ بولاشاعىنا الاڭدايمىن. سول كەزدە ءبارىن تاستاپ, ەلگە قايتقىم كەلەدى. قازاق بوكسىن جاڭا دەڭگەيگە كوتەرسەم دەپ ارماندايمىن.

– وتكەن اپتادا تۇرسىنعالي ەدىلوۆ قازاقستان بوكس فەدەراتسيا­سى پرە­­زيدەنتىنىڭ كە­ڭەسشىسى بولىپ تا­عايىن­دالدى. عاسىرلار تو­عى­سىن­دا سيدنەيدە الاۋى تۇتانعان وليم­پيا ويىندارىندا 2 التىن مەن 2 كۇ­مىس مەدالدى ولجالاپ, كە­رەمەت كورسەتكىشكە قول جەتكىزگەن مايتالماننىڭ وسى قىزمەتكە كەلگەنىن قالاي قابىلدادىڭىز؟

– بۇل – وتە دۇرىس شەشىم. تۇرسىنعالي اعامىزدىڭ بۇل قىزمەتكە كەلگەنى جاقسى بولدى. ول كىسىنىڭ كورگەنى مەن بىلگەنى كوپ. ءالى دە ەدىلوۆتىڭ ەل سپورتىنا بەرەرى بار. سونىمەن قاتار فەدەراتسيانىڭ قۇرىلىمىندا اقساقالدار كەڭەسى بولعا­نىن قالار ەدىم. بىزدە زەينەت جاسىنداعى مايتالمان ماماندار, بىلىكتى باپكەرلەر, اتاقتى بوكسشىلار كوپ. بارلىق اقساقالدىڭ باسىن قوسىپ, ءبىر ۇيىم قۇ­رىلسا, كەرەمەت بولار ەدى. ولار تا­جىري­بەلەرىمەن ءبولىسىپ, سەمينار مەن اشىق جاتتىعۋلار وتكىزىپ, ءدارىس وقىپ, جاستارعا كورگەن-بىلگەندەرىن ايتسا, ودان ەش ۇتىلمايمىز. شىنى كەرەك, سول ارداگەرلەردى باعالاماي ءجۇرمىز. ماسەلەن, الماتىدا حاميت باراەۆ دەگەن پروفەسسور بار. ءوزى دە كەزىندە بوكسشى بولعان. حاميت اۋباكىر ۇلىنىڭ مۇراعاتىندا قۇندى دۇنيەلەر كوپ. ۇزاق جىل بويى الەمدىك جانە قازاقستاننىڭ بوكس تاريحىنان باس­تاپ, كوپتەگەن كىتاپتار مەن ءار جىلدارى ءباسپاسوز بەتتەرىندە جارىق كورگەن ماقالالاردى تىرنەكتەپ جيعان. ءوزى دە بىرقاتار عىلىمي ەڭبەك جازدى. ەدۋارد عابدولوۆ, جاندوس كوكىموۆ, يۋري تسحاي, دامير بۋدانبەكوۆ, سۇلتان كاستوەۆ, ۆيكتور دەميانەنكو, سەرىك قوناقباەۆ, اسىلبەك قيلىموۆ, ميحايل يۋرچەنكو, الىمبەك بالماگانبەتوۆ, تاعى باسقا ساڭلاقتار ارامىزدا ءجۇر. ولاردىڭ كەۋدەلەرى تولعان قازىنا. بىراق سول اقيىق اقساقالداردىڭ اقىلىن ەستيتىن قۇلاق بولماي تۇر.

– تاعى ايتارىڭىز بار ما؟ وسىنداي مۇمكىندىك بولىپ تۇرعان كەزدە «Egemen Qazaqstan» گازەتى ارقىلى كوپشىلىككە ءوز ءۇنىڭىزدى جەتكىزسەڭىز...

– ايتا بەرسەك, اڭگىمە كوپ. مەنى ءبىر قىنجىلتاتىنى, وليمپيادا چەمپيوندارىن جاتتىقتىرۋشىلىق جۇمىسقا جولاتپايتىنى. بۇرىننان كەلە جاتقان باپكەرلەر «ورنىمىزدى الىپ قويادى» دەپ قورقا ما, ايتەۋىر بىزدەن الشاق جۇرۋگە تىرىسادى. وزدەرى ويلاپ تاپقان «جاقسى بوكسشىدان جاقسى باپكەر شىقپايدى» دەگەن جاتتاندى تۇجىرىمى بار. سونى قايتالاۋدان جالىقپايدى. بۇل – بوس اڭگىمە. ەرماحان ىبىرايىموۆ باس باپكەر بولعان تۇستا ەلىمىزدىڭ بىلعارى قولعاپ شەبەرلەرى 2002 جىلى پۋسانداعى ازيا ويىندارىنان 2 التىن, 3 كۇمىس جانە 2 قولانى يەلەنىپ, 2004 جىلى افينا وليمپياداسىنان 1 التىن, 1 كۇمىس جانە 1 قولا مەدالدى ولجالاعانىن قا­لاي ۇمىتامىز. وعان قوسا ۆەل باركەر كۋ­بوگىن دا الدىق. مەن ەلىمىزدىڭ ەكسپەريمەنتالدى قۇرامانىڭ باس باپكەرى بولعانىمدا جاستار اراسىنداعى الەم بىرىنشىلىگىنەن قوس التىنمەن ورالدىق. ول دا ۇمىتىلدى. تىپتەن, باپكەرلىك قىزمەتتى بەر­مەگەن كۇندە جىلدار بويى جيعان مول تاجىريبەمىزدى ءتيىمدى پايدالانۋعا بولادى عوي.

قازىرگى كەزدە ەلىمىزدە جەتى وليمپيادا چەمپيونى جانە سول ويىنداردىڭ ونداعان جۇلدەگەرى بار. سولاردىڭ دەنى ەلدە ءجۇر. ۆاسيلي جيروۆتان باسقالارىمىز وسىندامىز. ارقايسىمىزدىڭ ءوز ءستيلىمىز, تەحنيكامىز بەن تاكتيكامىز, وڭتايلى سوققىلارىمىز بەن قۇپيا «قارۋىمىز» بار. «سونىڭ قالاي جاسالاتىنىن, ونى قاي كەزدە پايدالانعان ءجون, كەيبىر قيىن جاعدايدان قالاي شىعۋعا بولادى؟» دەگەن سانسىز ساۋالدارعا جاۋاپ بەرەر ەدىك. ەگەر شاقىرىپ جاتسا, باسقا دا اسەرلى ءارى پايدالى اڭگىمەلەردىڭ تيەگىن اعى­تامىز. سپورتتاعى تاجىريبەمىزبەن ءبولىسىپ, جاستارعا دۇرىس باعىت-باعدار بەرەر ەدىك. اعاسىنىڭ اقىلىن تىڭداعان ادام ەشۋاقىتتا جامان بولمايدى. سونى قاپەردەن شىعارىپ الدىق. بىراق قازىرگى ۇلتتىق قۇراما ساپىندا جۇرگەن باپكەرلەر ءبىزدى كورسە, «ات توندارىن الا قاشادى». بىرەر جىل بۇرىن مينيسترلىككە ارنايى بارىپ, وسى ويىمدى اشىق ايتقانمىن. ناقتى دالەلدەر مەن دايەكتەر كەلتىردىم. «ەلىمىزدە كوزى ءتىرى 15 وليمپيادا چەمپيو­نى بار. ءبىز كوستيۋم-شالبار كيىپ الىپ, جايلى كرەسلودا جايعاسىپ وتىرعىمىز كەلمەيدى. ءبىزدى سپورت «مايدانىنىڭ» العى شەبىنە جىبەرىڭىز. سول جەردە جۇرەيىك. نەمەسە ىرىكتەۋ جۇمىسىنا جەگىڭىزدەر. اۋىلدى جەرلەردەن تالاي الىمدى, دا­رىن­دى, قارىمدى بالالاردى تاۋىپ اكەلەر ەدىك» دەدىم. باسشىلار باس يزە­گەنىمەن, ايتىلعان اڭگىمە ايتىلعان كۇيى سول جەردە قالدى.

– اسەرلى اڭگىمە بولدى دەپ ويلايمىن. سىزگە كوپ راقمەت!

– ويىمدى اشىق ايتۋعا مۇمكىندىك بەرگەن ەل گازەتىنە دە شەكسىز العىسىمدى بىلدىرەمىن. قازاق بوكسىنىڭ كوكسەگەسى قايتا كوگەرگەنىن كورۋگە جازسىن!

اڭگىمەلەسكەن –

عالىم سۇلەيمەن,

«Egemen Qazaqstan»