قوناەۆ قالاسى جاڭا وقۋ جىلىنا دايىن با

جالپى بالا سانى – 12 029. جوعارى سىنىپتارداعى 44 وقۋشى «التىن بەلگىگە» ۇمىتكەر بولىپ وتىر. سونداي-اق قازىر موديفيكاتسيالانعان كابينەتتەردىڭ سانى 32 بولسا, جاڭا وقۋ جىلىندا قوسىمشا 8 كابينەتتى اشۋ كوزدەلۋدە. بۇعان دەيىن ءبىلىم وشاقتارىندا 2 STEM كابينەتتەرى بولعان, بيىل ونىڭ سانى 4-كە جەتەدى.

قالا اۋماعىنداعى وقۋ وردالارىنا 21 جاس مامان جۇمىسقا قابىلداندى. جالپى ۇستازدار سانى – 1417. بۇدان بولەك, ءبىلىم ءبولىمىنىڭ باسشىسى «مەكتەپكە جول» رەسپۋبليكالىق قايىرىمدىلىق اكتسياسى قالاي وتكەنى تۋرالى ايتىپ بەردى. سوزىنشە, 1002 بالانىڭ اتا-اناسىنىڭ شوتىنا 43 493 تەڭگەدەن اۋدارىلعان.

«جەرگىلىكتى دەمەۋشىلەر تاراپىنان 142 وقۋشى مەكتەپ فورماسىمەن, قاجەتتى قۇرال-جابدىقتارمەن قامتىلدى. جالپى سوماسى – 3 915 000 تەڭگە», دەگەن ءبولىم باسشىسى جاڭا وقۋ جىلىندا ىستىق تاماقپەن 6151 بالا قامتىلاتىنىن دا اتاپ ءوتتى. ونىڭ ىشىندە 5636-سى باستاۋىش سىنىپتا وقيتىندار.

«وقۋ جىلىندا بالالاردىڭ قاۋىپسىزدىگى دە ماڭىزدى ماسەلە. قالاداعى وقۋ وردالارىنىڭ بارلىعىندا بەينەباقىلاۋ كامەرالارى, پروكۋراتۋرانىڭ QR-كودى, تۋرنيكەتتەر قويىلعان», دەدى ول.

ءبولىم باسشىسى جۇرت كوكەيىندە جۇرگەن قالاداعى قاسىم قايسەنوۆ اتىنداعى №4 ورتا مەكتەپتىڭ كۇردەلى جوندەۋى تۋرالى ساۋالىنا دا جاۋاپ بەردى.

«مەكتەپ 30 تامىزدا قولدانىسقا بەرىلۋى ءتيىس بولعان. الايدا جۇمىس ۋاقتىلى جۇرگىزىلمەي, كۇردەلى جوندەۋ اياقتالمادى. بيىل بۇل مەكتەپتىڭ وقۋشىلارى ءۇشىن 10-ىقشام اۋداندا ورنالاسقان مەكتەپ-ليتسەيگە تاسىمال ۇيىمداستىرىلىپ, باستاۋىش, 5 جانە «جاس پوليتسەي» سىنىپ وقۋشىلارى ەكى اۋىسىمدا وقىتىلادى. قالعان 6-11 سىنىپ وقۋشىلارى ورتا مەكتەپ-گيمنازيادا ەكى اۋىسىممەن ءبىلىم الادى», دەدى قالامقاس سارسەنباەۆا.

2023-2024 وقۋ جىلىندا ءبىلىم ساپاسىنىڭ دەڭگەيى 64,1 پايىز بولدى. بيىل كورسەتكىشتى ارتتىرۋ جوسپارلانىپ وتىر. قۋانتارلىق تاعى ءبىر دەرەك – 2024 جىلى 443 تۇلەك مەكتەپ ءبىتىرىپ, ونىڭ 223-ءى جوو-نىڭ گرانتىن ۇتىپ الدى. سونىمەن قوسا رەسەي ۋنيۆەرسيتەتتەرىنىڭ گرانتىن 25 تۇلەك, الىس-جاقىن شەتەلدەگى ءبىلىم وردالارىنىڭ گرانتىن 20 تۇلەك يەلەندى.