كەلىپ تۇسكەن ءوتىنىش نەگىزىندە ماڭعىستاۋ وبلىسىنىڭ جەر رەسۋرستارىن باسقارۋ دەپارتامەنتى جاۋاپكەرشىلىگى شەكتەۋلى سەرىكتەستىككە قاتىستى جوسپاردان تىس تەكسەرۋ جۇرگىزدى, دەپ حابارلايدى Egemen.kz.
تەكسەرىس ناتيجەسىندە مۇناي تەرمينالىنىڭ قۇرىلىسىن سالۋ جانە ورنالاستىرۋ ءۇشىن ارنالعان جالپى اۋدانى 50,0 گەكتار جەر ۋچاسكەسى ۇزاق ۋاقىت بويى نىسانالى ماقساتى بويىنشا پايدالانىلماي كەلگەنى انىقتالعان.
كاداسترلىق باعالاۋ قۇنى 445,0 ملن تەڭگەنى قۇرايتىن جەر ۋچاسكەسى كاسپي تەڭىزىنىڭ جاعالاۋىنداعى قاراقيا اۋدانىندا ورنالاسقان.
جەر ۋچاسكەسىنىڭ مەنشىك يەسىنە جەر زاڭناماسىنىڭ تالاپتارىن بۇزۋشىلىقتاردى جويۋ تۋرالى نۇسقاما بەرىلگەن. جىل اياقتالعاننان كەيىن نۇسقاما تالاپتارىن ورىنداماعانى ءۇشىن سەرىكتەستىككە 345,0 مىڭ تەڭگە كولەمىندە ايىپپۇل تۇرىندەگى اكىمشىلىك شارا قولدانىلعان.
سونىمەن قاتار دەپارتامەنتتىڭ جەر ۋچاسكەسىن مەملەكەت مەنشىگىنە ماجبۇرلەپ الۋ تۋرالى تالاپ-ارىزى سوتپەن قاناعاتتاندىرىلىپ, سوت شەشىمى زاڭدى كۇشىنە ەندى.