استانا. 12 ماۋسىم. ۇلتتىق بىرىڭعاي تەستىلەۋ ەنگىزىلگەننەن بەرگى ايقىندالعان جاعىمدى جاڭالىقتاردىڭ ءبىرى قازاق جانە ورىس تىلىندەگى ءبىلىم ساپالارى تەڭەسىپ قالدى. سونداي-اق, اتالعان سىناق ناتيجەسى بويىنشا ەلىمىزدەگى ۇبت – نىڭ ورتاشا بالى 2,6 پايىزعا كوتەرىلگەن. بۇل تۋرالى «قازاقپارات» حابارلادى.
قازاقستان رەسپۋبليكاسىنىڭ پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا ءبىلىم جانە عىلىم مينيسترلىگىنىڭ ءبىلىم بەرۋ مەن عىلىم سالاسىن قاداعالاۋ كوميتەتىنىڭ توراعاسى سايات ءنۇسىپوۆ بيىلعى ۇبت-نىڭ قورتىندىسىن ءمالىم ەتتى.
كوميتەت توراعاسىنىڭ ايتۋىنشا, ۇلتتىق بىرىڭعاي تەستىلەۋ ارقىلى «التىن بەلگىگە» 4 مىڭ 397 ۇمىتكەردىڭ 52 پايىزى وزدەرىنىڭ دەڭگەيىن راستادى. بۇل كورسەتكىش بىلتىرعى جىلى 42,2 پايىز بولاتىن. 2 مىڭ 205 بالا «التىن بەلگىسىن» راستاعان.
«بيىل ۇبت بويىنشا ورتاشا بالل 2,6 پايىزعا كوتەرىلىپ, 79,5 بالدى قۇرادى, بۇل كورسەتكىش بىلتىر 76,9 پايىزدى قۇراعان بولاتىن. ۇلتتىق بىرىڭعاي تەستىلەۋ ەنگىزىلگەننەن بەرگى تاعى ءبىر جاعىمدى جاڭالىق قازاق جانە ورىس تىلىندەگى بىتىرۋشىلەردىڭ ءبىلىم ساپالارىنىڭ ايىرماشىلىعى جاقىنداي ءتۇستى. بۇل ءبىر عانا پايىزدى قۇرايدى جانە تەڭەستى دەۋگە دە بولادى. بىلتىرعى جىلى بۇل ايىرماشىلىقتىڭ اراسى جەتى پايىز ەدى, سوندىقتان دا قازاق تىلىندەگى مەكتەپ سانى عانا ەمەس, ساپاسى دا ارتىپ كەلە جاتىر. بۇل - ءبىز ءۇشىن اسا قۋانىشتى جاعداي», - دەدى سايات ءنۇسىپوۆ.
تالعات رايىمبەك.
دەرەك, سۋرەت. «قازاقپارات».