الماتىدا 2030 جىلعا دەيىن تاعى 20 جاڭا كىتاپحانا اشىلادى. بۇل رەتتە كىتاپحانا تاپشىلىعى بايقالاتىن قالانىڭ شالعاي اۋداندارىنا ايرىقشا ءمان بەرىلەدى. سونىمەن قاتار ساياباقتاردا, سكۆەرلەر مەن ساۋدا ورتالىقتارىندا كىتاپحانا پاۆيلوندارى مەن اپپاراتتارى پايدا بولادى, دەپ حابارلايدى Egemen.kz الماتى قالاسى اكىمدىگىنىڭ ءباسپاسوز قىزمەتىنە سىلتەمە جاساپ.
بۇگىندە الماتىدا قالا اكىمدىگىنە قاراستى 28 كىتاپحانا بار. ونىڭ ۇشەۋى تاۋلىك بويى جۇمىس ىستەيدى. وقىرماندار ءۇشىن بارلىق كىتاپحانالاردا قولايلى جاعداي جاسالعان اتاپ ايتقاندا, كىتاپ قورى ۇنەمى جاڭارتىلىپ وتىرادى, تەگىن wi-fi جۇمىس ىستەيدى, كومپيۋتەرلەر ورناتىلعان, جاڭا جۇمىس ۇستەلدەرى, ديۆاندار مەن پۋفيكتەر سىندى جيھازبەن قامتىلعان.
سونىمەن قاتار بىرنەشە كىتاپحانادا كورۋ قابىلەتى ناشار نەمەسە زاعيپ وقىرماندارعا ارنالعان برايل پەرنەتاقتالارى دا ورناتىلعان. برايل جۇيەسىنىڭ قوزعالمالى نۇكتەلەرى ارقىلى زاعيپ وقىرمان كىتاپ ءماتىنىن ساۋساقپەن سەزىپ وقي الادى. ول ءۇشىن كەز كەلگەن كىتاپتاعى ءماتىندى ارنايى قۇرىلعى ارقىلى سكانەرلەپ, كومپيۋتەر ەكرانىنا ۇلكەيتىپ شىعارادى. سونداي-اق ءماتىندى قۇلاققاپپەن اۋديو رەتىندە تىڭداۋعا دا بولادى.
ء«بىز قالامىزداعى زاعيپتار قوعامىمەن, سونداي-اق ءتۇرلى ينكليۋزيۆتى ۇيىمدارمەن تىعىز ىنتىماقتاستىق ورناتىپ جاتىرمىز. سونىمەن قاتار, بالالاردىڭ كىتاپ وقۋعا دەگەن ىنتاسىن ارتتىرۋ بويىنشا جۇمىستاردى بەلسەندى جۇرگىزىپ كەلەمىز. ول ءۇشىن تەگىن ءتىل ۇيىرمەلەرىن, گەيميفيكاتسيا ەلەمەنتتەرى بار ءتۇرلى ءىس-شارالار ۇيىمداستىرامىز, ءتىپتى جۇلدىزدار مەن جازۋشىلاردى شاقىرىپ, ادەبي كەشتەر وتكىزەمىز. بىزدە بارلىعى 140 تەگىن ۇيىرمە بار. جالپى, قالالىق كىتاپحانالاردىڭ 95%-ى جاڭعىرتۋدان ءوتتى. ءبىزدىڭ ءاربىر كىتاپحانامىز بالالار مەن ەرەسەكتەر ءۇشىن جان-جاقتى دامۋ ورتالىعىنا اينالعان. وسىنىڭ ارقاسىندا قالالىق كىتاپحانالارعا وقىرماندار جىل سايىن كەم دەگەندە 3 ميلليون رەت كەلىپ-كەتەدى», دەپ اتاپ ءوتتى الماتى قالاسىنىڭ ورتالىقتاندىرىلعان كىتاپحانا جۇيەسىنىڭ ديرەكتورى مەيرام بەكتەمباەۆ.
ايتا كەتەرلىگى, قالانىڭ ورتالىقتاندىرىلعان كىتاپحانا جۇيەسىنىڭ كىتاپ قورى 1 300 000 دانادان اسادى, ونىڭ 18%-ى تولىعىمەن تسيفرلاندىرىلعان. سونىمەن قاتار كىتاپتار كاتالوگى وكج سايتىندا ورنالاستىرىلعان جانە بارلىعىنا قولجەتىمدى. سونداي-اق قازىرگى ۋاقىتتا مۇمكىندىگى شەكتەۋلى ازاماتتار ءۇشىن ۇيگە كىتاپ جەتكىزۋ قىزمەتى تەستىلەۋدەن وتكىزىلىپ جاتقاندىعى بەلگىلى بولدى.
سونىمەن قاتار الماتى كىتاپحاناشىلارى بيىل شۆەيتساريا, گەرمانيا, جاپونيا, وڭتۇستىك كورەيا جانە گرۋزيانىڭ جەتەكشى كىتاپحانالارىندا بىلىكتىلىگىن ارتتىرىپ, وقۋدان وتكەن.
«قالا باسشىسى مەن مادەنيەت باسقارماسى ءبىزدىڭ سالامىزدى دامىتۋعا قاتىستى ماسەلەلەرگە ايتارلىقتاي كوڭىل بولەدى. اسىرەسە – قىزمەتكەرلەردىڭ بىلىكتىلىگىن ارتتىرۋ, جۇمىسقا قولايلى جاعداي جاساۋعا ەرەكشە ءمان بەرىپ كەلەدى. ءبىز العاش رەت الەمنىڭ جەتەكشى ءبىلىم بەرۋ ورتالىقتارى مەن كىتاپحانالارىندا وقۋعا مۇمكىندىك الدىق. مەن ءوزىم وڭتۇستىك كورەيادا تاعىلىمدامادان ءوتتىم. ءبىز ستارفيلد, نامسان سياقتى ايگىلى كىتاپحانالارعا, سونداي-اق ۋنيۆەرسيتەتتەر مەن بالالار كىتاپحانالارىنا باردىق. وقۋ اياقتالعان سوڭ, ءبىز ارىپتەستەرىمىزبەن العان بارلىق ءبىلىمىمىزدى ءوزارا سارالاپ, اسەرلەرىمىز تۋرالى ايتتىق. شەتەلدە العان ءبىلىمىمىز بەن جاڭا يدەيالارىمىزدى اكىمدىك قالالىق كىتاپحانالارعا ەنگىزە باستادى. بۇل راسىندا كەرەمەت ناتيجە», دەدى نادەجدا تەن.
بۇگىندە قالالىق كىتاپحانالاردا اۆتوماتتاندىرىلعان اقپاراتتىق-كىتاپحانالىق جۇيە ىسكە قوسىلعان. بۇل جۇيەنى ەنگىزۋ ارقىلى بىرقاتار جاڭا مۇمكىندىكتەر پايدا بولعان. ماسەلەن, ەلەكتروندىق وقىرمان بيلەتىن شىعارىپ بەرۋ, وقىرمانداردىڭ سۇرانىستارىن وڭدەۋ, قاجەتتى ادەبيەتتەردى ىرىكتەۋ, تاپسىرىس بەرۋ جانە رەزەرۆتەۋ, كىتاپتاردى اۆتوماتتاندىرىلعان رەجيمدە بەرۋ جانە قايتارۋ, كىتاپحانالىق-اقپاراتتىق تەحنولوگيالاردى كەشەندى اۆتوماتتاندىرۋ.