استانا. 12 ماۋسىم. رەسەيدىڭ مەملەكەتتىك ارحيۆ ديرەكتورى سەرگەي ميرونەنكو 28 پانفيلوۆشىلار ەرلىگىن قيال دەپ اتادى. مۇنى ول ماسكەۋدەگى رەسەي ءباسپاسوزىنىڭ حالىقارالىق كونگرەسىندە ايتتى. بۇل تۋرالى «ازاتتىق» راديوسى حابارلادى.
«قيالعا سەنۋدى قويۋ كەرەك. دۋبوسەكوۆ تۇبىندە 50 نەمىس تانكىسىن توقتاتقان ەشقانداي 28 پانفيلوۆشىلار بولعان جوق. سونداي-اق ۆاسيلي كلوچكوۆتىڭ: «رەسەي - ۇلان-عايىر, بىراق شەگىنەرگە جەر جوق – ارتىمىزدا ماسكەۋ!» دەپ ايتتى دەگەنى دە جالعان. ونى «كراسنايا زۆەزدا» باسىلىمىنىڭ ادەبي حاتشىسى الەكساندر كريۆيتسكي ويدان قوسىپ جىبەرگەن. ەرلىك تاريحىن دا ويدان شىعارعان. مۇنى اسكەري پروكۋراتۋرا 1948 جىلدىڭ وزىندە انىقتاعان. الايدا, راسىمەن شەگىنەرگە جول بولماعاسىن, ماتەريالدى قۇپيا ەتىپ باسىپ تاستاعان. وسىلايشا اڭىز ەلدە ءوز تىرشىلىگىن باستاپ كەتتى», - دەدى ميرونەنكو.
ونىڭ مالىمدەمەسىن تىڭدارماندار ءارتۇرلى قابىلدادى. رەسەي مەمارحيۆى ديرەكتورىنىڭ كوزقاراسىن تاسس ديرەكتورىنىڭ ورىنباسارى ءارى ورىس ءباسپاسوزى حالىقارالىق كونگرەسىنىڭ باسشىسى الەكساندر كلەين قولدادى.
سول ارادا كونگرەسكە كەلگەن قازاقستاندىق بايانداماشى بۇل ەرلىكتىڭ كۋاگەرى بارىن العا تارتتى.
«مەن قازاقستاننان, استانادانمىن. بىزدە بۇل ەرلىكتىڭ كۋاگەرى, كەڭەس وداعىنىڭ باتىرى بار. «دۋبوسەكوۆ» ستەللاسى بار – ول الىنىپ تاستالا ما؟», - دەپ سۇرادى ول.
«شىندىقتى ايتۋ – مەنىڭ ادامگەرشىلىك جاۋاپكەرشىلىگىم. بۇل زەرتتەۋلەردى ايتقانىم ءۇشىن ماعان پاتريوت ەمەسسىڭ دەگەندەر دە بار. نە ىستەيىن! شىندىقتى ايتۋ قاشاندا اۋىر», - دەپ جاۋاپ قايتاردى وعان ميرونەنكو.
ءوز كەزەگىندە لاتۆيادان كەلگەن جۋرناليست بايانداماشى ميرونەنكودان ادامگەرشىلىك جاۋاپكەرشىلىگى تۋرالى سۇرادى.
«ءسىز دۋبوسەكوۆ تۋرالى شىندىقتى جاريا ەتىپ, وسى ەرلىكتى قۇرمەت تۇتاتىن قازاقستان مەن رەسەيدىڭ قارىم-قاتىناسىن سۇراققا قويۋىڭىزبەن ءوز ادامگەرشىلىك جاۋاپكەرشىلىگىڭىزدى سەزىنە الاسىز با؟! ءسىز ەكى ەل قارىم-قاتىناسىنا قانشالىقتى قاياۋ ءتۇسىرىپ تۇرعانىڭىزدى تۇسىنەسىز بە؟!», - دەپ سۇراققا الدى جۋرناليست.
ايتا كەتەرلىگى, ءىس-شاراعا بۇعان دەيىن الەۋمەتتىك جەلىدە قازاقستان جايلى ارانداتۋشىلىق اقپار تاراتقان «ەحو موسكۆى» راديوسىنىڭ باس ديرەكتورى الەكسەي ۆەنەديكتوۆ تا قاتىسقان.
«پانفيلوۆشىلاردىڭ جوق بولعانىن ەستىگەندە, مەن دە ەسەڭگىرەپ قالدىم. ءبىز مەكتەپتە 28 ەسىمدى جاتتاپ جۇرەتىنبىز. بىراق تۇسىنە ءبىلۋ كەرەك. ەگەر ولار بولماسا – شىنىمەن بولماعانى. شىندىق قاشاندا اشىلادى. ەگەر قۇجات بار بولسا ونى جاريا ەتۋ كەرەك», - دەپ دەدى ۆەنەديكتوۆ.
تالعات رايىمبەك.
دەرەك, سۋرەت: ازاتتىق.