استانادا ىشكى ىستەر ءمينيسترى, پوليتسيا گەنەرال-لەيتەنانتى ەرجان سادەنوۆتىڭ توراعالىعىمەن ءوزارا ءىس-قيمىل جاسايتىن ورگاندار باسشىلارى مەن اسكەرلەردىڭ كوماندالىق قۇرامىنىڭ قاتىسۋىمەن ۇلتتىق ۇلاننىڭ اسكەري كەڭەسى ءوتتى.
اسكەري كەڭەس وتىرىسىنىڭ كۇن تارتىبىندە ۇلتتىق ۇلاننىڭ 2024 جىلدىڭ ءبىرىنشى جارتىجىلدىعىنداعى قىزمەتتىك-جاۋىنگەرلىك قىزمەتىنىڭ جاي-كۇيى جانە جاڭادان قۇرىلعان بولىمشەلەردى جاساقتاۋ باعىتىنداعى جۇمىستىڭ ناتيجەلەرى قارالدى. وتىرىستى اشقان ە.سادەنوۆ ۇلتتىق ۇلان قوعامدىق قاۋىپسىزدىك پەن قۇقىقتىق ءتارتىپتى قامتاماسىز ەتۋدە شەشۋشى ءرول اتقاراتىنىن اتاپ ءوتتى. سونىمەن قاتار مينيستر قۇقىقتىق ءتارتىپ اسكەرلەرىنە قاتىستى وزەكتى ماسەلەلەردى, سونىڭ ىشىندە وفيتسەرلەر مەن سەرجانتتار قۇرامىن جاساقتاۋ ماسەلەسىنە توقتالدى.
– ءاربىر كوماندير بولىمشەلەردىڭ قىزمەتتىك-جاۋىنگەرلىك جۇمىسىن قامتاماسىز ەتۋ ءۇشىن بىلىكتى كادرلاردى ىرىكتەۋمەن اينالىسۋعا ءتيىس. باس شتابقا, اسكەري بولىمدەردىڭ كومانديرلەرى مەن ورىنباسارلارىنا بوس لاۋازىمداردى شۇعىل تۇردە جاساقتاۋدى تاپسىرامىن. جەكە قۇرام ءۇشىن بارلىق قاجەتتى جاعدايدى جاساۋ قاجەت. جەرگىلىكتى اتقارۋشى ورگاندارمەن, قورعانىس مينيسترلىگىنىڭ قورعانىس ىستەرى جونىندەگى دەپارتامەنتتەرىمەن جانە بولىمدەرىمەن بىرلەسىپ وسى باعىتتاعى جۇمىستى جانداندىرۋ قاجەت, – دەدى ءىىم باسشىسى.
ىشكى ىستەر ءمينيسترىنىڭ ورىنباسارى – ۇلتتىق ۇلاننىڭ باس قولباسشىسى, گەنەرال-لەيتەنانت ەركىن بوتاقانوۆ ءبىرىنشى جارتىجىلدىقتا ۇلتتىق ۇلانعا جۇكتەلگەن بارلىق مىندەت تولىق كولەمدە ورىندالعانىن اتاپ ءوتتى.
– قۇقىقتىق ءتارتىپ اسكەرلەرىنىڭ شتاتتارىنا اقتاۋ, اتىراۋ, قىزىلوردا, ورال, قوستاناي قالالارىندا جەدەل ماقساتتاعى بەس باتالون ەنگىزىلدى. مامىر ايىندا ەل پرەزيدەنتى – قارۋلى كۇشتەردىڭ جوعارعى باس قولباسشىسى قاسىم-جومارت توقاەۆتىڭ قاتىسۋىمەن اۆياتسيالىق بازا سالتاناتتى تۇردە اشىلدى. 3 مىڭنان استام اسكەري قىزمەتشى, 160-تان استام اۆتوكولىك جانە ارنايى تەحنيكا, سونداي-اق 7 اۆياتسيا كولىگى تابيعي سيپاتتاعى تج رەجىمى جاعدايىندا سۋ تاسقىنىن جويۋعا تارتىلدى. جەكە قۇرامنىڭ جالپى كۇشىمەن 4 مىڭنان استام ادام, 600 توننا جۇك جانە 130 توننا گۋمانيتارلىق كومەك تاسىمالداندى, 5 مىڭنان استام ازامات ەۆاكۋاتسيالاندى, – دەدى ول.
وتىرىس بارىسىندا قۇقىقتىق ءتارتىپ اسكەرلەرىنىڭ قىزمەتتىك-جاۋىنگەرلىك جۇمىسىنىڭ ناتيجەسى تۋرالى ۇلتتىق ۇلان باس قولباسشىسىنىڭ ءبىرىنشى ورىنباسارى – باس شتاب باستىعى, گەنەرال-مايور قايرات اقتانوۆ بايانداما جاسادى. اسكەريلەر 80-نەن استام بىرلەسكەن وقۋ-جاتتىعۋعا, ونىڭ ىشىندە ۆەدومستۆوارالىق توپتار قۇرامىنداعى داعدارىستىق جاعدايلارعا دەن قويۋ جونىندەگى كەشەندى وقۋ-جاتتىعۋلارعا قاتىسقانى اتاپ ءوتىلدى.
قۇقىقتىق ءتارتىپ اسكەرلەرىنىڭ بولىمشەلەرى ءوزارا ءىس-قيمىل جاسايتىن ورگاندارمەن بىرلەسىپ جىل باسىندا قوعامدىق ءتارتىپتى كۇشەيتۋگە, تابيعي سيپاتتاعى توتەنشە جاعدايلاردىڭ سالدارىن جويۋعا قاتىستى. شانحاي ىنتىماقتاستىق ۇيىمىنىڭ حالىقارالىق ءسامميتىن وتكىزۋ كەزىندە ۇلتتىق ۇلاننىڭ جەكە قۇرامى ىشكى ىستەر ورگاندارىنىڭ قىزمەتكەرلەرىمەن بىرلەسىپ قالا كوشەلەرىندە تاۋلىك بويى كەزەكشىلىك اتقاردى.
وتىرىستا وڭىرلىك قولباسشىلىقتار قولباسشىلارىنىڭ «باعىنىستى اسكەري بولىمدەر مەن بولىمشەلەردەگى قىزمەتتىك-جاۋىنگەرلىك قىزمەتتى ۇيىمداستىرۋ جونىندەگى ىستەردىڭ جاعدايى تۋرالى» تاقىرىبىنداعى ەسەپتەرى, سونداي-اق ۇلتتىق ۇلان باس قولباسشىسىنىڭ ورىنباسارى, گەنەرال-مايور قايرات ۇمبەتوۆتىڭ ء«بىرىنشى جارتىجىلدىقتاعى اسكەري ءتارتىپتىڭ, زاڭدىلىق پەن قۇقىقتىق ءتارتىپتىڭ جاي-كۇيى تۋرالى» تاقىرىبىنداعى بايانداماسى تىڭدالدى. بۇدان بولەك, كادرلار جانە اسكەري ءبىلىم باسقارماسىنىڭ باستىعى, گەنەرال-مايور نۇربول مىرتاەۆ «جاڭادان ەنگىزىلگەن بولىمشەلەردى جيناقتاۋعا قاتىستى جۇمىس ناتيجەلەرى تۋرالى» بايانداما جاسادى.
ايتا كەتەيىك, اسكەري كەڭەس وتىرىسىن قورىتىندىلاي كەلە ىشكى ىستەر ءمينيسترى اسكەردىڭ جاۋىنگەرلىك دايىندىعى مەن جاۋىنگەرلىك قابىلەتىنە ەرەكشە نازار اۋداردى.
– اسكەرلەردى دايارلاۋ – جەكە قۇرام اراسىنداعى اسكەري تارتىپكە نەگىزدەلگەن جاۋىنگەرلىك ازىرلىكتىڭ نەگىزى. سوندىقتان بولىمشە كومانديرىنەن باستاپ اسكەر قولباسشىسىنا دەيىن بارلىعى اسكەري قىزمەتشىلەردى تاربيەلەۋمەن, مورالدىق-پسيحولوگيالىق جاي-كۇيىمەن اينالىسىپ, اسكەري قىزمەتتىڭ تارتىمدىلىعى مەن بەدەلىن ارتتىرۋعا ءتيىس, – دەپ تۇيىندەدى ەرجان سادەنوۆ.