قازاقستاننىڭ ءبىرىنشى راكەتكاسى ەلەنا رىباكينا دەنساۋلىعىنا بايلانىستى وليمپيادا ويىندارىنا قاتىسپايدى, دەپ حابارلايدى Egemen.kz تۋريزم جانە سپورت مينيسترلىگىنىڭ ءباسپاسوز قىزمەتىنە سىلتەمە جاساپ.
قازىر ەلەنا ءجىتى برونحيت اۋرۋىنا شالدىققان, دارىگەرلەر وعان كورتقا شىقپاق تۇگىلى ءتىپتى ۇشاقپەن جارىسقا ۇشىپ بارۋىنا دا قاتاڭ تىيىم سالعان.
- رىباكينا وليمپيادادا كەرەمەت ويىن كورسەتۋ ءۇشىن بارىن سالىپ دايىندالدى, الايدا سىرقاتىنا بايلانىستى بۇل مۇمكىن بولمادى. قازاقستان رەسپۋبليكاسى تۋريزم جانە سپورت مينيسترلىگى شىن جۇرەكتەن سپورتشىنىڭ تەزىرەك ساۋىعىپ كەتۋىن تىلەيدى جانە ونىڭ كۇشىنە سەنەمىز جانە جاتتىعۋلار مەن جارىستارعا قايتا ورالۋدى اسىعا كۇتەمىز, - دەلىنگەن حابارلامادا.
ەلەنا رىباكينا قازاقستاندىقتارعا پاريج وليمپياداسىنا قاتىسا المايتىنىن وكىنىشپەن حابارلادى.
«ۋيمبلدون تۋرنيرىنەن كەيىن ءجىتى برونحيتپەن اۋىردىم. جاتتىعۋعا ورالۋعا ارەكەتتەنسەم دە, مەنىڭ اعزام تولىقتاي قالپىنا كەلگەن جوق. دارىگەرلەر كورتقا شىعۋىما قاتاڭ تىيىم سالدى. پاريج وليمپياداسىندا ءبىزدىڭ قۇراما ءۇشىن ونەر كورسەتىپ, ەل ءۇمىتىن اقتاي المايتىنىم وتە وكىنىشتى. توكيودا مەدالعا قول سوزىم جەردە بولدىم. پاريجدە قازاقستان ءۇشىن التىن الۋعا مۇقيات دايىندالدىم. وكىنىشكە قاراي, اۋرۋ بۇل جوسپاردىڭ ورىندالۋىنا مۇمكىندىك بەرمەدى. بارلىق قازاقستاندىق سپورتشىلارعا پاريجدە ساتتىلىك پەن تابىس تىلەيمىن. مەن ءبىزدىڭ بارلىق اتلەتتەرىمىزگە جانكۇيەر بولامىن, ولاردىڭ وليمپيادادا ەل نامىسىن ابىرويمەن قورعايتىنىنا سەنەمىن. العا, قازاقستان!», دەدى ە.رىباكينا.