وسكەمەندەگى سپورت سارايىندا مەرەكەلىك ءىس-شارا ءوتتى. «قازتسينك» كومپانياسى مەتاللۋرگتەرگە عانا قۇرمەت كورسەتىپ قويماي, بۇگىنگىنىڭ باتىرلارىنا دا «ىزگى جۇرەك» سىيلىعىن تابىس ەتتى.
سپورت سارايىنىڭ كىرەبەرىسىندە ءىس-شارا قوناقتارىنا, قالا تۇرعىندارىنا ارنالعان مەرەكەلىك ويىن-ساۋىق, ساۋدا-ساتتىق, فوتوزونالار ۇيىمداستىرىلدى. كەلۋشىلەرگە بالمۇزداقتار تاراتىلدى.
رەسمي ءبولىمى باستالا سالا «قازتسينك» كومپانياسىنىڭ باس ديرەكتورى جانات جانبوتين بەينەقۇتتىقتاۋ جولدادى.
– وسى مەرەكە كۇنى مەن بارشا ەڭبەككەرلەرىمىزدى كاسىبي جەتىستىكتەرى مەن ەلىمىزدىڭ ونەركاسىبىن دامىتۋعا قوسىپ جۇرگەن ەلەۋلى ۇلەستەرى ءۇشىن شىن جۇرەكتەن قۇتتىقتايمىن. بارشاڭىزعا مىقتى دەنساۋلىق, وتباسىلارىڭىزعا اماندىق, باق-بەرەكە تىلەيمىن. ءار كۇندەرىڭىز تەك قۋانىش پەن ساتتىلىك اكەلسىن! – دەدى جانات دۇيسەن ۇلى.
جيىندا وتاندىق مەتاللۋرگيانىڭ باستاۋىندا تۇرعان ەڭبەك اۋلەتتەرىنە دە قۇرمەت كورسەتىلدى. ولار تۋرالى بەينەروليكتەر كوپشىلىك نازارىنا ۇسىنىلدى.
سالتاناتتى كەشتە ءداستۇر بويىنشا «ىزگى جۇرەك» ماراپاتى تابىستالدى. «قازتسينك» كاسىپورنى تاعايىنداعان اتالعان سىيلىق ءوز ءومىرى مەن دەنساۋلىعىن قاتەرگە تىگە وتىرىپ, ادامداردى قۇتقارىپ قالعان ەرجۇرەك ازاماتتار قاشاندا قۇرمەتكە لايىق. ءبىر اي بويى izgi-jurek.kz سايتىندا ۇمىتكەرلەرگە داۋىس بەرۋ جۇرگىزىلدى. ءۇش جەڭىمپازدىڭ ارقايسىسى وسى كەشتە ارنايى شاعىن مۇسىندەر مەن 1 ملن تەڭگە مولشەرىندەگى اقشالاي سىيلىققا يە بولدى.
سىيلىق يەگەرى اندرەي سمولنيكوۆ ورتەنىپ جاتقان ۇيدەن ەكى بالا مەن ولاردىڭ انالارىن الىپ شىقسا, دەنيس شەمەت وقۋ-جاتتىعۋ كەزىندە كەنەتتەن جارىلعان جاۋىنگەرلىك گراناتادان جاس ساربازدى ءوز دەنەسىمەن جاۋىپ قالعان. وفيتسەر ءوزى جاراقاتتانعانىمەن, سارباز ءدىن-امان.
– وقۋ-جاتتىعۋدا وقىس وقيعا بولدى. جاۋىنگەرلىك گرانات ساربازدىڭ قاسىنا قۇلادى. جارىلاتىنىن ءبىلدىم. ويلانىپ تۇراتىن ەمەس, بىردەن الگى سولداتتى ءوز دەنەممەن قالقالاپ قالۋعا تىرىستىم. گراناتانىڭ ءۇش جارىقشاعى ماعان تيگەن ەكەن, ەكەۋى ءالى دە مەنىڭ دەنەمدە ءجۇر, – دەيدى دەنيس شەمەت.
ءۇشىنشى سىيلىق بۇقتىرما سۋ قويماسىندا سۋعا باتىپ بارا جاتقان 13 جاسار جەتكىنشەكتى قۇتقارعان تجد قىزمەتكەرى ەلامان نۇقىشەۆكە بەرىلدى. باتىل جىگىتتەرگە سىيلىقتاردى وليمپيادا چەمپيونى, اتاقتى جەڭىل اتلەت ولگا رىپاكوۆا تابىس ەتتى.
قۇرمەت كورسەتىلىپ, العىس ايتىلعان سوڭ «قازتسينك داۋىسى» شىعارماشىلىق بايقاۋىنىڭ فيناليستەرى ساحناعا شىعىپ, ءوز ونەرىن كورسەتتى. ولاردىڭ ءبارى دە – وسى كومپانيانىڭ قاراپايىم قىزمەتكەرلەرى. دەسە دە, ونەردەن قۇر الاقان ەمەس ەكەنىن دالەلدەدى. سالتاناتتى كەش سوڭىندا بەلگىلى انشىلەر كارينا ابدۋللينا مەن سادراددين ونەر كورسەتىپ, جاستارعا قۋانىش سىيلادى.