پرەمەر-مينيستر ولجاس بەكتەنوۆ سۋ تاسقىنىنان كەيىن تۇرعىن ۇيلەر مەن ينفراقۇرىلىمدى قالپىنا كەلتىرۋ ماسەلەلەرى بويىنشا كەڭەس وتكىزدى, دەپ جازادى Egemen.kz.
كەڭەستە ونەركاسىپ جانە قۇرىلىس ءمينيسترى قانات شارلاپاەۆ, ەنەرگەتيكا ءمينيسترى الماسادام ساتقاليەۆ, كولىك ۆيتسە-ءمينيسترى ساتجان ابلاليەۆ قازىرگى جاعداي مەن اتقارىلىپ جاتقان جۇمىستار تۋرالى باياندادى. سونداي-اق باتىس قازاقستان, اقتوبە, اتىراۋ, اقمولا, سولتۇستىك قازاقستان جانە قوستاناي وبلىستارى اكىمدەرىنىڭ مالىمەتى تىڭدالدى.
سۋ تاسقىنى سالدارىنان بارلىعى 19 342 جىلجىمايتىن م ۇلىك (جالعىز باسپانا بولىپ سانالاتىن ۇيلەر مەن ساياجايلار) زاقىمداندى, ونىڭ 8 578-ءى قالپىنا كەلتىرۋگە جارامسىز دەپ تانىلدى. بۇگىنگى تاڭدا 2 578 ءۇي قۇرىلىسى مەن 6 مىڭ جىلجىمايتىن م ۇلىك ساتىپ الۋ جۇمىستارى جۇرگىزىلىپ جاتىر.
پرەمەر-مينيستر سقو-دا 200, پاۆلودار وبلىسىندا 5 جاڭا ءۇي قۇرىلىسىنىڭ جەدەل جۇرگىزىلگەنىن اتاپ ءوتتى. سونداي-اق جۋىردا قوستاناي وبلىسىندا 22 ءۇي تاپسىرىلادى.
ۇكىمەت دەرەگىنشە, اكىمدىكتەر قاجەتتى قارجىمەن تولىق قامتاماسىز ەتىلىپ, بارلىق كەمشىلىك جويىلعان جانە سالىنىپ جاتقان ۇيلەردىڭ ۇلگىلىك جوبالارى بەكىتىلگەن. دەسە دە 4 وڭىردە قۇرىلىس جۇمىس كەستەسىنەن 15-25 كۇنگە ارتتا قالىپ كەلەدى. اتاپ ايتقاندا, باتىس قازاقستان, اقتوبە, اقمولا جانە اتىراۋ وبلىستارىندا قۇرىلىس قارقىنى تومەن ەكەنى بەلگىلى بولدى.
ولجاس بەكتەنوۆ زارداپ شەككەندەرگە بەرىلەتىن ءۇي ساپاسىن نازارعا الۋدى, كەدەرگىنى دەر كەزىندە ورتالىققا حابارلاۋدى تاپسىردى.
«قاجەت بولسا, ءبىز رەسۋرستاردى قايتا ءبولىپ, تەحنيكا مەن ادامداردى كوبەيتەمىز. بارلىق قۇرىلىس نورمالارى مەن قاۋىپسىزدىك تالاپتارىنىڭ ساقتالۋىن قامتاماسىز ەتۋ ماڭىزدى. بۇل ماسەلەلەر ازاماتتاردى الاڭداتپاۋى كەرەك. وڭىرلەردىڭ اكىمدەرى ۇيلەردىڭ ساپاسىنا جەكە جاۋاپ بەرەدى. پرەزيدەنت جۇكتەگەن مىندەتتەردى ورىنداۋ ءۇشىن شامامەن 2,5 اي قالدى», دەدى ولجاس بەكتەنوۆ.
سونداي-اق جەرگىلىكتى جولداردى جوندەۋگە جانە رەكونسترۋكتسيالاۋعا ۇكىمەت رەزەرۆىنەن 22,7 ملرد تەڭگە ءبولىنىپ, زارداپ شەككەن وڭىرلەردەگى مەكتەپتەردى قالپىنا كەلتىرۋگە 7,5 ملرد تەڭگە باعىتتالدى. بارلىق مەكتەپ وقۋ جىلى باستالعانعا دەيىن قالپىنا كەلتىرىلۋ كەرەك.