ءماجىلىس دەپۋتاتى, جالپىۇلتتىق سوتسيال-دەموكراتيالىق پارتياسى فراكتسياسىنىڭ جەتەكشىسى اسحات راحىمجانوۆ پاۆلودار وبلىسىنا جۇمىس ساپارى بارىسىندا وبلىستىڭ ءورت ءسوندىرۋ بولىمشەلەرى مەن جەدەل-قۇتقارۋ جاساعىنا باردى, دەپ جازادى Egemen.kz.
پاۆلودار وبلىسى توتەنشە جاعدايلار دەپارتامەنتى باستىعىنىڭ مىندەتىن اتقارۋشى ازاماتتىق قورعاۋ پولكوۆنيگى قايرات شايماردەنوۆ جىل باسىنان بەرى دەپارتامەنت بولىمشەلەرى اۆاريالىق-قۇتقارۋ جانە شۇعىل جۇمىستار بويىنشا 1,6 مىڭنان استام شاقىرتۋعا بارعانىن باياندادى. ناتيجەسىندە 101 ادام قۇتقارىلىپ, 173 ادام ەۆاكۋاتسيالانعان. ءتورت زارداپ شەككەن ازاماتقا دارىگەرگە دەيىنگى مەديتسينالىق كومەك كورسەتىلگەن.
«بيىل «ەرتىس ورمانى» مەملەكەتتىك تابيعي ورمان رەزەرۆاتى ورماندارداعى ورتتەردى ەرتە انىقتاۋ جانە الدىن الۋ ءۇشىن تسيفرلىق جۇيەنى ورناتتى. ورمان ورتتەرىن ەرتە انىقتاۋ جۇيەسىنە ارنالعان 23 مۇنارا قوندىرىلدى بىراق بۇل قۇتقارۋ قىزمەتىن كۇشەيتۋگە جەتكىلىكسىز», دەدى قايرات شايماردەنوۆ.
دەپۋتاتپەن كەزدەسۋدە ءورت سوندىرۋشىلەر مەن قۇتقارۋشىلار شەشىمىن تالاپ ەتەتىن بىرقاتار تۇيتكىلدى ماسەلەنى ايتتى. ونىڭ ىشىندە بارلىق بولىمشەدە كۇردەلى جوندەۋ جۇمىستارىن جۇرگىزۋ, وبلىستىق باسقارماعا قاجەتتى قوسىمشا قوندىرعىلاردى سالۋعا قاراجاتتىڭ جوقتىعى سىندى ماسەلەلەر كوتەرىلدى. قوسىمشا تەحنيكالىق قۇرال-جابدىقتار دا قاجەت ەكەنى ايتىلدى.
ءورت سوندىرۋشىلەردىڭ الەۋمەتتىك قاۋىپسىزدىگى دە نازارعا الىندى. ىشكى ىستەر مينيسترلىگى, قورعانىس مينيسترلىگى جانە باسقا قۇرىلىمداردىڭ اسكەري قىزمەتشىلەرىنە قاراعاندا ءورت سوندىرۋشىلەرگە تۇرعىن ءۇي تولەمدەرى, شيپاجايلىق-كۋرورتتىق ەمدەلۋ, بالاباقشالار مەن مەكتەپتەردە جەڭىلدىكتەر قاراستىرىلماعان. سونىمەن قاتار توتەنشە جاعدايلار مينيسترلىگىنە ءورت ءسوندىرۋ كولىگى جۇرگىزۋشىلەرىن قابىلداۋ ءتارتىبى كۇردەلەنگەن. ويتكەنى ولار ىشكى ىستەر مينيسترلىگىنىڭ ستاندارتتارى بويىنشا پوليتسيا دەپارتامەنتىنىڭ ەمحاناسىندا اسكەري-دارىگەرلىك كوميسسيالاردان وتەدى.
وقيعا ورنىنا جەدەل جەتۋگە كەدەرگى كەلتىرەتىن جول جابىنىنىڭ ساپاسىزدىعى, دالالىق ايماقتا بايلانىستىڭ جوقتىعى دا جۇمىستى جەدەل ىستەۋگە كەدەرگى كەلتىرەدى. قۇتقارۋشىلاردىڭ ايتۋىنشا, ولار تاجىريبەدەن وتكەن سپۋتنيكتىك بايلانىستى پايدالانۋ ارقاشان جەڭىل ءارى ىڭعايلى بولا بەرمەيدى.
اسحات راحىمجانوۆ قۇتقارۋشىلاردىڭ ءتيىمدى جۇمىسىنىڭ ماڭىزدىلىعىنا توقتالىپ, قاۋىپ-قاتەرگە تاپ بولعان ەل ازاماتتارىنىڭ ءومىرى ولاردىڭ قىزمەتىنە تىكەلەي بايلانىستى ەكەنىن اتاپ ءوتتى. سونداي-اق كوتەرىلگەن ماسەلەلەردى ءوز باقىلاۋىنا الاتىنىن دا تىلگە تيەك ەتتى.