بۇل تۋرالى قازاقستان بوكس فەدەراتسياسىنىڭ پرەزيدەنتى شاحمۇرات ءمۇتالىپ ايتتى, دەپ حابارلايدى Egemen.kz اتالعان فەدەراتسيانىڭ رەسمي پاراقشاسىنا سىلتەمە جاساپ.
شاحمۇرات ءمۇتالىپتىڭ ايتۋىنشا, 2024 جىلدىڭ العاشقى جارتى جىلدىعى قازاقستان بوكس فەدەراتسياسى ءۇشىن جەمىستى ءارى جەڭىستى كەزەڭ بولدى.
«وسى ارالىقتا ەلىمىزدە ازيا چەمپيوناتى جانە بىرنەشە حالىقارالىق تۋرنير ۇيىمداستىرىلدى, ەڭ باستىسى – پاريج وليمپياداسى جولدامالارى بويىنشا مەجە ورىندالدى. ەرلەر قۇراماسى بارلىق سالماق دارەجەلەرى بويىنشا ليتسەنزيا يەلەنسە, ايەلدەر كومانداسى بۇرىن-سوڭدى بولماعان ناتيجەنى تىركەپ, ءۇش سالماق بويىنشا جولدامالار جەڭىپ الدى», دەدى بوكس فەدەراتسياسىنىڭ باسشىسى.
سونداي-اق فەدەراتسيا باسشىسى ءار جەڭىستىڭ ارتىندا بىرلەسكەن توپتىڭ جۇيەلى جۇمىسى تۇرعانىن اتاپ ءوتتى.
«سپورتشىنىڭ تۇراقتىلىعىنا جانە ەڭبەكقورلىعىنا باپكەردىڭ بىلىكتىلىگى مەن سەنىمىن, مامانداردىڭ ۇزدىكسىز جاردەمىن قوسسا عانا ماقساتقا جەتۋگە بولادى. پاريج وليمپياداسى – بارلىعىمىز ءۇشىن بەلگىلى ءبىر كەزەڭگە قورىتىندى جاسايتىن اسا ماڭىزدى جارىس. بىلعارى قولعاپ شەبەرلەرى حالىقتى ءتۇرلى دارەجەدەگى جۇلدەلەرمەن قۋانتادى دەگەن سەنىمدەمىن. قازاقستان بوكسى جاساسىن!», دەدى شاحمۇرات ءمۇتالىپ.