باسەكەنىڭ قىزعان شاعى

وسى قوس كوماندا­نىڭ جولى ديۋسسەل­دورفتاعى «مەركۋر شپيل-ارەنادا» قيىستى. با­سەكە باستالعاننان اياعىنا دەيىن دامىلسىز شابۋىلمەن ءوتتى. بۇل جولى دا العاشقى گولدى يۆان شرانتس سوقتى. بەلگيالىقتارعا قارسى ويىندا ول نەبارى 7-مينۋتتا ەسەپ اشسا, بۇل جولى 17-مي­نۋتتا مەرگەندىك تانىتتى. بىراق ديۋسەلدورفتا سلوۆاك­تار جەڭىستى ۋىسىندا ۇستاپ قالا المادى. ەگەر وسى كەزدەسۋدە جەڭىلسە, جارىس كەستەسىندەگى جاعدايدى تۇزەتۋ وتە قيىن بولاتىنىن جاقسى تۇسىنگەن ۋكراينا فۋتبولشىلارى قارقىندارىن ەش باسەڭدەتپەدى. ناتيجەسىندە, 54-مينۋتتا ني­كولاي شاپارەنكو تارازى باسىن تەڭەستىرسە, 80-مينۋتتا رومان يارەمچۋك جەڭىس گولىن سوقتى. ەسەپ – 2:1.

«ەۋرو-2024» دوداسىنىڭ ال­عاشقى ويىندارىن ءساتسىز وتكىزگەن D توبىنداعى پولشا مەن اۋستريا بەرليندە باق سى­نادى. 9-مينۋتتا فيليپپ مۆەنەنىڭ اۋە­لەتە تەپكەن دوبىن قورعاۋشى گەرنوت تراۋنەر قاقپاعا ءدوپ ءتۇسىردى. ۇزىلىسكە دەيىن كشيشتوف پەنتەك ەسەپتى تەڭەستىردى. ودان كەيىن پولياكتاردىڭ وينىنىڭ ءمانىسى كەتتى. ال قارقىنىن كۇشەيتكەن اۋس­تريالىقتار تاعى ەكى رەت نىسانانى ءدال كوزدەپ, كوزدەگەن ماق­ساتتارىنا قول جەتكىزدى – 1:3. بۇل گولداردىڭ اۆتورلارى – كريس­توف باۋمگارتنەر (66-مينۋت) مەن ماركو ارناۋتوۆيچ (78-مينۋت, پەنالتيدەن).

لەيپتسيگتەگى «رەد بۋلل ارەنا­دا» وسى توپتاعى فاۆوريتتەر كۇش سىناستى. شىنى كەرەك, نيدەرلاند پەن فرانتسيا فۋتبولشىلارىنان ءبىز الدەقايدا قىزىقتى ءارى ساپالى ويىن كۇتتىك. ونىڭ ۇستىنە جەڭىسكە جەتكەن ۇجىم بىردەن پلەي-وففقا جولداما الاتىن ەدى. بىراق ول ءۇمىت اقتالمادى. جان­كۇيەرلەر جاي ءبىر ورتانقول كومان­دالار­دىڭ وينىن تاماشالاعانداي كۇي كەشتى. نيدەرلاندتىڭ جاس جارتىلاي قورعاۋ­شىسى حاۆي سيمونستىڭ 69-مينۋتتا سوققان جالعىز گولىنىڭ كۋاسى بولدىق. بىراق ونىڭ ءوزى دە وففسايدقا بايلانىستى سانالمادى. وسىلايشا, اتالعان جارىستا العاش رەت 0:0 ەسەبى تىركەلدى. «ەۋرو-2024» جارىسىن جالعاستىرا المايتىن ءبىرىنشى كوماندا بەلگىلى بولدى. ول – پولشا قۇراماسى. قاتارىنان ەكى كەزدەسۋدە جەڭىلىستىڭ كەرمەك ءدامىن تاتقان پولياكتار تىپتەن سوڭعى ويىندا جەڭىسكە جەتكەن جاعدايدا ءوز توبىندا ءۇشىنشى ورىنعا تابان تىرەي المايدى.

سەنبىدە F توبىنداعى ەكى ويىن ءوتتى. گامبۋرگتەگى «فولك­سپاركشتاديوندا» گرۋزيا مەن چەحيا شەبەرلىك بايقاستى. 46-مينۋتتا جورج ميكاۋتادزە پەنالتيدەن ەسەپ اشىپ, قۇراماسىن العا شىعارعان. مۇنداي تارتىسقا تالايدان بەرى ءتۇسىپ كەلە جاتقان چەح فۋتبولشىلارى كوپ ۇزاتپاي-اق تارازى باسىن تەڭەستىرىپ كەتتى. 59-مينۋت وربىگەن تۇستاعى ستاندارتتى شابۋىلدى گولعا ۇلاس­تىرىپ پاتريك شيك تارازى باسىن تەڭەستىرىپ كەتتى. قوس كوماندا وسى ناتيجەنى ولجا تۇتىپ تارقاستى.

دورتمۋندتاعى «ۆەستفا­لەنشتاديوندا» تۇركيا مەن پورتۋگاليا اراسىنداعى تارتىس 0:3 ەسەبىمەن اياقتالدى. 21-مينۋتتا بەرناردو سيل­ۆا ەسەپ اشقان. 28-مينۋتتا سامەت اقايدىن اۆتو­گول سوعىپ الدى. 56-مينۋتتا برۋنو فەر­ناندەس ءۇشىنشى گولدى توعىتتى.

ە توبىندا بەلگيا فۋتبولشىلارى رۋمىنيا قۇراماسىن ەركىن ەڭسەردى. 2-مينۋتتا يۋري تيلەمانس ەسەپ اشسا, 80-مينۋتتا كەۆين دە بريوينە ناتيجەنى ەسەلەپ, بەلگيا قۇراماسىنا ماڭىزدى ءۇش ۇپايدى الىپ بەردى.

ا توبىنداعى 3-تۋر ويىن­دارى دا تارتىسقا تولى ءوتتى. شۆەيتساريا قۇراماسى گەرمانيا قۇراماسىنىڭ ەسىن ەكەۋ, ءتۇسىن تورتەۋ ەتە جازدادى. ندوەنىڭ 28-مينۋتتا سوققان گو­لىنان كەيىنگى باسىمدىقتى شۆەيتساريا قۇراماسى 90 مينۋت بويى ۇستاپ تۇردى. ماتچتىڭ باس قازىسى يتا­ليالىق دانيەل ورساتو نەگىزگى ۋاقىتقا 2 مينۋت قوسىپ, فيۋللكرۋگ تارازى باسىن تەڭەستىرىپ كەتتى. وسى توپتاعى سوڭعى ويىندى وتكىزگەن شوت­لانديا – ماجارستان اراسىنداعى ماتچ 0:1 ەسەبىمەن ماجارلاردىڭ پايداسىنا شەشىلدى. ماتچتىڭ نەگىزگى ۋاقىتىندا گول سوعىلعان جوق. ەكى قۇراماعا دا جەڭىس اۋا­داي قاجەت ەدى. ارگەنتينالىق تورەشى فاكۋندو تەلو قوسىمشا 10 مينۋت ۇستەپ, سوڭعى سەكۋندتار سىرعىعاندا كەۆين چوبوت شابۋىلدى ورىستەتىپ, جەڭىس گولىن سوقتى. بۇل توپتان پلەي-وفف كەزەڭىنە گەرمانيا مەن شۆەيتساريا ەركىن وتسە, ماجار­ستان قۇ­راماسى دا ءالى ءۇمىت ساۋلە­سىن سوندىرگەن جوق.