وليمپيا ويىندارىنا قاتىسىپ, ءتورت جىلدا ءبىر وتەتىن عالامدىق دودادا جەڭىس تۇعىرىنا كوتەرىلۋ – ءار سپورتشىنىڭ اسقاق ارمانى ءارى ومىرلىك ۇستانىمى. ەلىمىزدىڭ ساڭلاقتارىنا دا وسىنداي باق سان مارتە بۇيىردى. الايدا ارادا ءبىراز ۋاقىت وتكەننەن سوڭ رۇقسات ەتىلمەگەن ءدارى-دارمەكتى پايدالانعانى ءۇشىن جازالانىپ جاتقاندار دا بار. سول سەبەپتى وليمپيادا دا العان جۇلدەلەرگە كەيدە وزگەرىس ەنىپ جاتادى. بۇگىنگى ماقالامىزدا 1996-2021 جىلدار وتكەن جازعى وليمپيا ويىندارىندا العان جۇلدەلەرىمىزدى قايتا ساراپتاپ كورگەندى ءجون ساناپ وتىرمىز.
اتلانتا – 1996
تاۋەلسىز مەملەكەت رەتىندە قازاقستان العاش رەت 1996 جىلى اتلانتادا الاۋى تۇتانعان وليمپيا ويىندارىندا بوي كورسەتتى. الىستاعى امەريكادا 96 ورەنىمىز سپورتتىڭ 14 ءتۇرى بويىنشا باق سىنادى. اتالعان جارىستىڭ اشىلۋ راسىمىندە ەلىمىزدىڭ كوك بايراعىن 24 جاستاعى بوكسشى ەرماحان ىبىرايىموۆ ۇستاپ شىقتى. ناتيجەسىندە, 3 التىن, 4 كۇمىس جانە 4 قولا مەدالدى ولجالاعان وتانداستارىمىز جالپىەسەپتە 24-ورىندى يەلەندى.
ەلگە ورالعان سوڭ جەڭىس تۇعىرىنا كوتەرىلگەن دۇلدۇلدەردىڭ ارقايسىسىنا مول مولشەردە سىياقى تاعايىندالىپ, ولارعا جەكە پاتەر مەن سۋ جاڭا جەڭىل كولىك بەرىلدى. سول ءبىر تاماشا ءۇردىس كۇنى بۇگىنگە دەيىن جالعاسىپ كەلەدى. ءبىر قۋانتارلىعى, اقش-تا اتوي سالعان جەرلەستەرىمىزدىڭ بىردە-بىرەۋى ءتۇرلى كەلەڭسىز جاعدايلارعا بايلانىستى جازالانىپ نەمەسە ۇلكەن سپورتتان شەتتەتىلگەن جوق.
يۋري مەلنيچەنكو
گرەك-ريم كۇرەسى (57 كگ)
التىن
الەكساندر پارىگين
قازىرگى بەسسايىس
التىن
ۆاسيلي جيروۆ
بوكس (81 كگ)
التىن
بولات ءجۇمادىلوۆ
بوكس (51 كگ)
كۇمىس
سەرگەي بەلياەۆ
نىسانا كوزدەۋ (50 مەتر, مىلتىقپەن جاتىپ اتۋ)
كۇمىس
سەرگەي بەلياەۆ
نىسانا كوزدەۋ (50 مەتر, ءۇش قالىپتا مىلتىق اتۋ)
كۇمىس
اناتولي حراپاتىي
اۋىر اتلەتيكا (99 كگ)
كۇمىس
بولات نيازىمبەتوۆ
بوكس (63,5 كگ)
قولا
ەرماحان ىبىرايىموۆ
بوكس (71 كگ)
قولا
ۆلاديمير ۆوحميانين
نىسانا كوزدەۋ (50 مەتر, تاپانشا اتۋ)
قولا
ماۋلەن مامىروۆ
ەركىن كۇرەس (52 كگ)
قولا
سيدنەي – 2000
اتلانتامەن سالىستىرعاندا عاسىرلار توعىسىنداعى سيدنەي وليمپياداسىندا مەدالدار سانى از بولسا دا, ولاردىڭ ساپاسىنا كوڭىل تولدى. قورىتىندى ەسەپتە 3 التىن, 4 كۇمىسكە قول سوزعان وتاندىق ساڭلاقتار 22-ورىنعا تۇراقتادى. بۇل – ازىرگە قازاقستان سپورتى تاريحىنداعى ەڭ جوعارعى كورسەتكىش! جاسىل قۇرلىقتاعى جەرلەستەرىمىزدىڭ جارقىن جەڭىسى سپورتتىق شەجىرەدە التىن ارىپتەرمەن جازىلىپ قالعانى انىق. نەگىزى سول كەزدە دە «دوپينگ داۋى» ءورشىپ تۇرعان. بىراق ءبىزدىڭ سپورتشىلار سيدنەيدەن دە ەش داۋ-دامايسىز, ەلگە امان-ساۋ ورالدى.
اۋسترالياعا قازاقستاننان بارلىعى 130 ۇمىتكەر اتتاندى. ولار سپورتتىڭ 17 ءتۇرى بويىنشا شەبەرلىك بايقاستى. سول سپورتشىلار اراسىنان ەسىمدەرى تومەندە اتالعان ساڭلاقتار ەلىمىزدىڭ ءانۇرانىن شىرقاتىپ, تۋىن كوكتە جەلبىرەتتى.
ولگا شيشيگينا
جەڭىل اتلەتيكا (100 مەترگە كەدەرگىلەرمەن جۇگىرۋ)
التىن
بەكزات ساتتارحانوۆ
بوكس (57 كگ)
التىن
ەرماحان ىبىرايىموۆ
بوكس (71 كگ)
التىن
بولات ءجۇمادىلوۆ
بوكس (51 كگ)
كۇمىس
مۇحتارحان دىلدابەكوۆ
بوكس (+91 كگ)
كۇمىس
الەكساندر ۆينوكۋروۆ
ۆەلوسپورت (توپتىق سايىس)
كۇمىس
يسلام بايرامۋكوۆ
ەركىن كۇرەس (97 كگ)
كۇمىس
افينا – 2004
ەجەلگى ەللادا ەلىندە 119 وعلانىمىز سپورتتىڭ 17 تۇرىنەن سايىسقا ءتۇستى. بۇل وليمپيادا ءبىز ءۇشىن ءساتسىز باستالدى. جارىس جولىنا شىققان سپورتشىلار كۇمىس نەمەسە قولا مەدالمەن عانا شەكتەلدى. تەك سوڭعى كۇنى عانا التىننىڭ سىڭعىرىن ەستىدىك. ونىڭ يەگەرى – بوكسشى باقتيار ارتاەۆ. 69 كگ سالماق دارەجەسىندە جۇدىرىقتاسقان الاشتىڭ ماقتان تۇتار ازاماتى افينا رينگىندە بارلىق قارسىلاسىن سىپىرا ۇتتى. ناتيجەسىندە, ارتاەۆ باس جۇلدەمەن قوسا, وليمپيادانىڭ ەڭ ۇزدىك بىلعارى قولعاپ شەبەرىنە تيەسىلى ۆەل باركەر كۋبوگىن ولجالادى.
قورىتىندى ەسەپتە قازاقستان قۇراماسى 1 التىن, 4 كۇمىس جانە 3 قولا مەدالمەن 40-ورىندى قاناعات تۇتتى. گرەكيانىڭ استاناسىندا الاۋى تۇتانعان وليمپيا ويىندارىندا ەشبىر سپورتشىمىز دوپينگ داۋىنا ىلىككەن جوق.
باقتيار ارتاەۆ
بوكس (69 كگ)
التىن
گەننادي گولوۆكين
بوكس (75 كگ)
كۇمىس
سەرگەي فيليمونوۆ
اۋىر اتلەتيكا (77 كگ)
كۇمىس
گەورگي تسۋرتسۋميا
گرەك-ريم كۇرەسى (120 كگ)
كۇمىس
گەننادي لاليەۆ
ەركىن كۇرەس (74 كگ)
كۇمىس
دميتري كارپوۆ
جەڭىل اتلەتيكا (ونسايىس)
قولا
سەرىك ەلەۋوۆ
بوكس (60 كگ)
قولا
مكحيتار مانۋكيان
گرەك-ريم كۇرەسى (66 كگ)
قولا
بەيجىڭ – 2008
بارلىق پالە ءدال وسى 2008 جىلعى بەيجىڭ وليمپياداسىنان باستالدى. قىتايدا التىن تۇعىرعا كوتەرىلگەن اۋىر اتلەت يليا يلين ارادا بىرنەشە جىل وتكەن سوڭ جۇلدەسىنەن ايىرىلدى. وعان «دوپينگ قولداندى» دەگەن اۋىر ايىپ تاعىلدى. كۇمىسپەن كۇپتەلگەن تايمۇراز تيگيەۆ (ەركىن كۇرەس) پەن يرينا نەكراسوۆا (اۋىر اتلەتيكا) جانە ماريا گرابوۆەتسكايا (اۋىر اتلەتيكا) مەن اسەت مامبەتوۆ تە (گرەك-ريم كۇرەسى) ءدال سونداي جازاعا ۇشىرادى. كەيىننەن ولاردىڭ بىردە-بىرەۋىنىڭ جولدارى وڭعارىلمادى. ەسەسىنە زىلتەمىرشى اللا ۆاجەنينا كۇمىس مەدالىن التىنعا الماستىردى. سەبەبى بەيجىڭدە ونىڭ الدىن وراپ كەتكەن قىتايلىق تساو لەيدىڭ رۇقسات ەتىلمەگەن ءدارى-دارمەكتى پايدالانعانى بەلگىلى بولدى. سول جارىستى قولا جۇلدەمەن قورىتىندىلاعان گرەك-ريم كۇرەسى شەبەرى نۇرباقىت تەڭىزباەۆقا ارادا سەگىز جىل وتكەن سوڭ كۇمىس مەدال تابىس ەتىلدى. جارتىلاي فينالدا قازاق بالۋانىن ۇتىپ, ەكىنشى ورىندى يەلەنگەن ازەربايجاندىق ۆۋگار راگيموۆتىڭ دا «تازا ەمەس» ەكەنى جالپاق جۇرتقا جاريا بولدى. قىتايدىڭ استاناسىندا جەڭىل اتلەتيكانىڭ ءۇش قارعىپ سەكىرۋ جاتتىعۋىندا ءتورتىنشى ساتىعا تۇراقتاعان ولگا رىپاكوۆانىڭ ەكى بىردەي قارسىلاسى – رەسەيلىك تاتيانا لەبەدەۆا مەن گرەكيالىق حريسوپي دەۆەتسيدىڭ قيتۇرقى ارەكەتتەرگە بارعانى بەلگىلى بولدى. ولگا كۇمىسپەن كۇپتەلدى. ناتيجەسىندە, 2 التىن, 3 كۇمىس جانە 4 قولانى ەنشىلەگەن قازاقستان قۇراماسى بەيجىڭ وليمپياداسىندا 29-ورىندى يەلەندى.
تاعى ءبىر ايتا كەتەرلىك جايت, وسى وليمپيا ويىندارىنان كەيىن ۇكىمەت تاراپىنان وتاندىق سپورتشىلارعا بەرىلەتىن سىياقى مولشەرى اجەپتاۋىر ارتتى. بۇعان دەيىن باس جۇلدە 100 مىڭ, كۇمىس مەدال 75 مىڭ جانە قولا مەدال 50 مىڭ اقش دوللارىنا باعالانسا, وسى جارىستا التىن تۇعىرعا كوتەرىلگەن ساڭلاققا 250 مىڭ جانە جۇلدەگەرلەرگە 150 مەن 75 مىڭ دوللاردان تابىس ەتىلدى.
باقىت سارسەكباەۆ
بوكس (69 كگ)
التىن
اللا ۆاجەنينا
اۋىر اتلەتيكا (75 كگ)
التىن
ولگا رىپاكوۆا
جەڭىل اتلەتيكا
ء(ۇش قارعىپ سەكىرۋ)
كۇمىس
اسحات جيتكەەۆ
دزيۋدو (100 كگ)
كۇمىس
نۇرباقىت تەڭىزباەۆ
گرەك-ريم كۇرەسى (60 كگ)
كۇمىس
ەلەنا شالىگينا
ايەلدەر كۇرەسى (63 كگ)
قولا
ماريد مۋتاليموۆ
ەركىن كۇرەس (120 كگ)
قولا
ەركەبۇلان شىناليەۆ
بوكس (81 كگ)
قولا
ارمان شىلمانوۆ
تاەكۆوندو (+80 كگ)
قولا
لوندون – 2012
تۇماندى البيون ەلىندە وراسان زور تابىسقا كەنەلگەن ەلىمىزدىڭ سپورتشىلارى بارشا جانكۇيەرگە قۋانىش پەن شاتتىق سىيلادى. ءدۇبىرلى دودادا 7 التىن, 1 كۇمىس, 5 قولا مەدالدى ولجالاپ, جالپىەسەپتە 12-ورىندى يەلەندىك. بۇل – بۇرىن-سوڭدى بولماعان كورسەتكىش ەدى! بىراق كوپ كەشىكپەي قۋانىشىمىز سۋ سەپكەندەي باسىلدى. ۇلىبريتانيانىڭ تورىندە قازاق ەلىنىڭ ءانۇرانىن شىرقاتقان ءتورت بىردەي اۋىر اتلەتىمىز – ءزۇلفيا چينشانلو, مايا مانەزا, سۆەتلانا پودوبەدوۆا جانە يليا يلينگە اۋىر ايىپ تاعىلدى. سەبەبى سول باياعى – دوپينگ! زىلتەمىرشىلەر چەمپيوندىق اتاقتارىنان ايىرىلىپ قانا قويماي, ءتۇرلى مەرزىمگە ۇلكەن سپورتتان شەتتەتىلدى. سونىڭ سالدارىنان جەرلەستەرمىز لوندونداعى جارىستىڭ جالپى ەسەبىندە بىردەن 13 ساتىعا تومەندەپ, 25-ورىندى قاناعات تۇتۋعا ءماجبۇر بولدى.
لوندون وليمپياداسىندا 69 كگ سالماق دارەجەسىندە ونەر كورسەتكەن اۋىر اتلەت اننا نۇرمۇحامبەتوۆا ۇزدىك بەستىكتى تۇيىندەگەن ەدى. الايدا ارادا ءبىراز ۋاقىت وتكەن سوڭ بەلارۋستىڭ قوس سپورتشىسى – اتالعان جارىستىڭ قولا جۇلدەگەرى مارينا شكەرمانكوۆا مەن ءتورتىنشى ساتىعا جايعاسقان دينا سازانوۆەتستىڭ دوپينگ قولدانعانى انىقتالدى. سونىڭ ارقاسىندا نۇرمۇحامبەتوۆا ءۇشىنشى ورىنعا كوتەرىلدى. كوپ ۇزاماي كۇمىس مەدالدى يەلەنگەن رۋمىنيالىق روكسانا كوكوشتىڭ دا قانىنان رۇقسات ەتىلمەگەن ءدارى-دارمەكتىڭ نىشانى تابىلدى. وسىلايشا, لوندون وليمپياداسىنىڭ كۇمىس جۇلدەسى ءبىزدىڭ قىزعا بۇيىردى. ونى تاياۋدا عانا پەرۋدە وتكەن جاسوسپىرىمدەر اراسىنداعى الەم بىرىنشىلىگى بارىسىندا حالىقارالىق وليمپيادا كوميتەتىنىڭ (حوك) قۇرمەتتى مۇشەسى يۆان ديبوس انناعا سالتاناتتى تۇردە تابىس ەتتى. ءسويتىپ, ارادا 12 جىل وتكەننەن سوڭ جۇلدە ءوز يەسىن تاپتى. زىلتەمىرشى قىزدىڭ وسى تابىسىنىڭ ارقاسىندا قازاقستان قۇراماسى جالپىەسەپتە ءسال بولسا دا جوعارىلاپ, 23-ورىنعا كوتەرىلدى.
الەكساندر ۆينوكۋروۆ
ۆەلوسپورت (توپتىق سايىس)
التىن
ولگا رىپاكوۆا
جەڭىل اتلەتيكا
ء(ۇش قارعىپ سەكىرۋ)
التىن
سەرىك ساپيەۆ
بوكس (69 كگ)
التىن
ادىلبەك نيازىمبەتوۆ
بوكس (81 كگ)
كۇمىس
اننا نۇرمۇحامبەتوۆا
اۋىر اتلەتيكا (69 كگ)
كۇمىس
دانيال گادجيەۆ
گرەك-ريم كۇرەسى (84 كگ)
قولا
مارينا ۆولنوۆا
بوكس (75 كگ)
قولا
گيۋزەل مانيۋروۆا
ايەلدەر كۇرەسى (72 كگ)
قولا
يۆان دىچكو
بوكس (+91 كگ)
قولا
اقجۇرەك تاڭاتاروۆ
ەركىن كۇرەس (66 كگ)
قولا
ريو-دە-جانەيرو – 2018
وڭتۇستىك امەريكا قۇرلىعىنداعى دودادا 104 وتانداسىمىز سپورتتىڭ 17 ءتۇرى بويىنشا باق سىنادى. ناتيجەسىندە, 17 جۇلدەگە يەلىك ەتتىك. ونىڭ 2-ەۋى التىن, 5-ەۋى كۇمىس جانە 10-ى قولا. جالپى ەسەپتەگى ورنىمىز – 30. ارينە, وسىنداي بايراقتى باسەكەدە 17 جۇلدە الۋ از ولجا ەمەس. بۇرىن-سوڭدى ءدال وسىلاي قانجىعامىز مايلانعان جوق ەدى. دەسەك تە التىننىڭ ازدىعى كوماندالىق سايىستا جوعارىلاي الماۋىمىزعا كەدەرگى كەلتىردى. نەگىزى ءبىز ريو وليمپياداسى اياقتالعان تۇستا 22-ساتىعا تابان تىرەگەن ەدىك. بىراق اۋىر اتلەتتەر سايىسىندا توپ جارعان نيجات راگيموۆتىڭ باس جۇلدە ولجالاۋ ءۇشىن دوپينگتىڭ «كومەگىنە» جۇگىنگەنى انىقتالدى. سونىڭ كەسىرىنەن ءبىراز ساتىعا تومەندەدىك.
تاعى ءبىر ايتا كەتەرلىك جايت, زىلتەمىرشىلەر سايىسىندا 85 كگ سالماق دارەجەسىندە كۇش سىناسقان دەنيس ۋلانوۆ پەن رۋمىنيالىق گابريەل سىنكرەيان بىردەي ناتيجە كورسەتتى. ەكەۋى دە قوسسايىستا 390 ۇپاي جيدى. اۋىر اتلەتيكانىڭ ەرەجەسىنە ساي ونداي جاعدايدا كىمنىڭ جەكە سالماعى جەڭىل بولسا, سول سپورتشىنىڭ اسىعى الشىسىنان تۇسۋگە ءتيىس. ءسويتىپ, سىنكرەياننىڭ باعى جانىپ, ول قولا مەدالدى يەلەندى. ءبىزدىڭ ۋلانوۆ ءتورتىنشى ورىندا قالىپ قويدى. كوپ ۇزاماي «بىلىقتىڭ» بەتى اشىلدى. بالقان تۇبەگىنىڭ بەتكەۇستارى دوپينگ قولدانعانى ءۇشىن جۇلدەدەن قاعىلدى. ارادا ەكى جىل وتكەننەن كەيىن اشعابادتا وتكەن الەم چەمپيوناتى بارىسىندا بۇكىلالەمدىك اۋىر اتلەتيكا فەدەراتسياسىنىڭ (IWF) پرەزيدەنتى تاماش ايان ريو وليمپياداسىنىڭ قولا مەدالىن ءبىزدىڭ دەنيستىڭ موينىنا ءىلدى.
دميتري بالاندين
ءجۇزۋ (200 مەتر, براسس)
التىن
دانيار ەلەۋسىنوۆ
بوكس (69 كگ)
التىن
ەلدوس سمەتوۆ
دزيۋدو (60 كگ)
كۇمىس
ءجازيرا جاپپارقۇل
اۋىر اتلەتيكا (69 كگ)
كۇمىس
ۆاسيلي لەۆيت
بوكس (91 كگ)
كۇمىس
ادىلبەك نيازىمبەتوۆ
بوكس (81 كگ)
كۇمىس
گيۋزەل مانيۋروۆا
ايەلدەر كۇرەسى (75 كگ)
كۇمىس
وتگونتسەتسەگ گالبادراح
دزيۋدو (48 كگ)
قولا
فارحات حاركي
اۋىر اتلەتيكا (62 كگ)
قولا
كارينا گوريچەۆا
اۋىر اتلەتيكا (63 كگ)
قولا
الەكساندر زايچيكوۆ
اۋىر اتلەتيكا (105 كگ)
قولا
ولگا رىپاكوۆا
جەڭىل اتلەتيكا
ء(ۇش قارعىپ سەكىرۋ)
قولا
ەلميرا سىزدىقوۆا
ايەلدەر كۇرەسى (69 كگ)
قولا
ەكاتەرينا لاريونوۆا
ايەلدەر كۇرەسى (63 كگ)
قولا
يۆان دىچكو
بوكس (+91 كگ)
قولا
داريعا شاكىموۆا
بوكس (75 كگ)
قولا
دەنيس ۋلانوۆ
اۋىر اتلەتيكا (85 كگ)
قولا
توكيو – 2020
2020 جىلى توكيودا الاۋى تۇتانۋعا ءتيىس وليمپيا ويىندارى جەر-جاھاندى شارلاعان كوروناۆيرۋس ىندەتىنىڭ سالدارىنان ءبىر جىل كەيىنگە شەگەرىلگەنى بارشاعا ايان. بۇل – ەل تاريحىنداعى ەڭ ءساتسىز وليمپيادا. كۇنشىعىس ەلىنە 97 سپورتشىمىز اتتانعانىمەن, ۇلى دۇرمەكتە ءانۇرانىمىز بىردە-ءبىر رەت شىرقالعان جوق. باس جۇلدەنى ولجالاۋ بىلاي تۇرسىن, تىپتەن كۇمىسكە دە قول جەتكىزە المادىق. سەنىم ارتقان سەركەلەرىمىزدىڭ سەگىزىنىڭ عانا قولا مەدالدى يەلەنۋگە عانا شاما-شارقى جەتتى.
جاپونيانىڭ استاناسىندا ەل سەنىمىنىڭ اقتالماۋى سالدارىنان كوماندالىق سايىستا 83-ورىنعا سىرعىپ تۇستىك. الپاۋىتتاردى ايتپاعاندا, بۇرىندارى تەك ارتىمىزدان سىعالاپ جۇرگەن وزبەكستان, گرۋزيا, ۋگاندا, ەكۆادور, قاتار, باگام ارالدارى, فيليپپين, يندونەزيا, فيدجي, ەستونيا, بەرمۋد ارالدارى, پۋەرتو-ريكو, موڭعوليا, سان-مارينو, يوردانيا, مالايزيا, تىپتەن قىرعىزستان مەن تۇرىكمەنستان سپورتشىلارى وتانداستارىمىزدىڭ الدىن وراپ كەتتى.
ەلدوس سمەتوۆ
دزيۋدو (60 كگ)
قولا
يگور سون
اۋىر اتلەتيكا (61 كگ)
قولا
ءزۇلفيا چينشانلو
اۋىر اتلەتيكا (55 كگ)
قولا
قامشىبەك قوڭقاباەۆ
بوكس (+91 كگ)
قولا
ساكەن بيبوسىنوۆ
بوكس (51 كگ)
قولا
نۇريسلام ساناەۆ
ەركىن كۇرەس (61 كگ)
قولا
دارحان ءاسادىلوۆ
كاراتە (67 كگ)
قولا
سوفيا بەرۋلتسەۆا
كاراتە (+61 كگ)
قولا
ءسويتىپ, 1996-2001 جىلدار ارالىعىندا الاۋى تۇتانعان جەتى جازعى وليمپيا ويىندارىندا ەل قۇراماسى 14 التىن, 22 كۇمىس جانە 34 قولا مەدالدى ولجالادى. بارلىعى – 70 جۇلدە! ەڭ كوپ ولجاعا كەنەلگەن بوكسشىلار. شارشى الاڭدى شايقاعاندار 24 رەت (7 التىن+7 كۇمىس+10 قولا) جەڭىس تۇعىرىنا كوتەرىلدى. جەڭىل اتلەتتەر (2+2+4) مەن اۋىر اتلەتتەردىڭ (1+3+4) دە كورسەتكىشتەرى كوڭىل كونشىتەرلىك. ولاردىڭ ارقايسىسىنىڭ قورجىنىندا سەگىز جۇلدەدەن بار. سونداي-اق جاھاندىق دودادا گرەك-ريم كۇرەسى (1+2+2), ۆەلوسپورت (1+1+0), قازىرگى بەسسايىس (1+0+0), ءجۇزۋ (1+0+0), ەركىن كۇرەس (0+2+4), دزيۋدو (0+2+2), نىسانا كوزدەۋ (0+2+1), ايەلدەر كۇرەسى (0+1+4), كاراتە (0+0+2) جانە تاەكۆوندودان دا (0+0+1) مەدالدىى يەلەندىك.