اقمولا وبلىسىنىڭ پوليتسەيلەرى ءىز-ءتۇزسىز جوعالىپ كەتكەن 45 جاستاعى ايەلدى ىزدەستىرىپ جاتىر, دەپ حابارلايدى Egemen.kz sinegor.kz-كە سىلتەمە جاساپ.
1979 جىلى تۋعان دوسانوۆا گۇلنۇر ەرنازارقىزى 12 ماۋسىمدا ساعات 13:30 شاماسىندا ۇيدەن شىعىپ كەتىپ, قايتىپ ورالماعان. ونىڭ جوعالعانى تۋرالى حاباردى پوليتسياعا اپكەسى 17 ماۋسىم كۇنى حابارلاعان.
بۇعان دەيىن جوعالعان ايەلدى تۋىستارى وزدەرى ىزدەگەن. ەشقانداي ناتيجە بولماعان سوڭ پوليتسيانىڭ كومەگىنە جۇگىنگەن. گۇلنۇر ەرنازارقىزىنىڭ بۇعان دەيىن دە ۇيدەن بىرنەشە رەت كەتىپ قالىپ, بىراق قايتا كەلگەن كەزدەرى بولعان ەكەن.
ايەلدىڭ بەلگىلەرى: بويى – 160-165 سانتيمەتر, دەنە ءبىتىمى ارىق, شاشى يىعىنا دەيىن, قارا ءتۇستى, ەرەكشە بەلگىلەرى جوق. ول قارا شالبار, اق جانە كوك جولاقتارى بار كوك سپورتتىق كوستيۋم جانە اق اياقكيىم كيگەن.
استانا مەن كورشىلەس وبلىستاردىڭ پوليتسيا دەپارتامەنتتەرىنە باعىت-باعدار جولداندى. پوليتسيا قىزمەتكەرلەرى مەن جوعالعان ايەلدىڭ تۋىستارى اراسىنان ارنايى ىزدەستىرۋ توپتارى قۇرىلدى.
پوليتسەيلەر تاكسي جانە مارشرۋتتىق اۆتوبۋس جۇرگىزۋشىلەرىنەن, سونداي-اق تەمىرجول جانە اۆتوۆوكزال قىزمەتكەرلەرىنەن جوعالعان ايەل تۋرالى سۇراستىرىپ جاتىر. ىزدەۋ جۇمىستارى ءالى دە جالعاسادى.